Choćebuz (UL/SN). Foyer Choćebuskeho dźiwadła Piccolo bě połnje wobsadźeny, jako su wiolinistka Priscila Baggio Simeoni, gitarist Dan Baron, dujer Karl Berkel a spěwarka Lena Hauptmann předwčerawšim 47. Choćebusku hudźbnu nazymu zahajili. Program wopřiješe nimo twórbow z Južneje Ameriki, Francoskeje a Nowoseelandskeje tež wulět do hudźbnych stawiznow Němskeje demokratiskeje republiki, a to z titulom skupiny Karussell „Wie ein Fischlein unterm Eis“. Zazběh pak tworješe štučka z Łužicy: Dan Baron a Lena Hauptmann prezentowaštaj swoju loni z Němskim popowym a rockowym mytom wuznamjenjenu kompoziciju „Tysac cowanjow“, w stilu bossa nova spisany spěw z delnjoserbskim tekstom. Wuměłcaj běštaj pod hesłom „Serbski jazz“ projekt iniciěrowałoj, z kotrymž chcetaj w tymle žanru „ze swójskimi wjeršemi a zynkami nowe akcenty sadźeć“.
Sobotu a njedźelu, 28. a 29. požnjenca před 75 lětami, schadźowaše so wjace hač 4 000 serbskich młodostnych a dalšich Domowinjanow w Radworju na prěnim zetkanju čłonow dźěłowych brigadow a Serbow po wójnje docyła. W lěću 1946 běchu so w serbskich wsach Kamjenskeho a Budyskeho wokrjesa wjesne jednotki Serbskeje młodźiny jako wobstatk narodneje organizacije Domowiny załožili, kotrež młodźinski sekretar třěšneho zwjazka Jurij Brězan jako předsyda cyłkownje nawjedowaše.
Domowinske dźěłowe brigady z Radworja, Šunowa a Pančic-Kukowa zahajichu njedźelu, 7. pražnika 1946, „Akciju Koslow“, z kotrejž su w dobrowólnym dźěle pomhali zakłady za nowotwar w poslednich dnjach wójny zničeneje wsy wotstronić. W přichodnych tydźenjach su tež brigady Serbskeje młodźiny z Jaseńcy, Dobrošic, Konjec, Budyšina a Baćonja a sydom dalšich brigadow zničene abo wobškodźene statoki zaso natwarili abo zwuporjedźeli. Koslowčenjo njech při swojim nowym wopomnišću sylnišo na to mysla!
Znowa su so čłonojo kulturneho konwenta Hornja Łužica-Delnja Šleska minjeny pjatk w Budyskim Kamjentnym domje schadźowali. Hłowny dypk dnjoweho porjada bě wobzamknjenje klětušeho etata.
Serbske Nowiny su dale w předsydstwje Europskeho zjednoćenstwa nowin w mjeńšinowych a regionalnych rěčach (MIDAS) zastupjene.
Triest (SN/JaW). Edita Slezáková wostanje prezidentka MIDAS. Zastupnicy čłonskich mjeńšinowych dźenikow su ju pjatk popołdnju na hłownej zhromadźiznje w italskim Triesće na dalše štyri lěta w zastojnstwje wobkrućili. Slezáková připowědźi, zo „je to poslednja doba jako prezidentka za mnje“, a namołwi, „prezidentstwo dyrbi do młodych rukow“. Dale wobkrućichu čłonojo MIDAS nimo dr. Tonija Ebenera – šefredaktora němskeho dźenika w Južnym Tirolu Dolomiten –, Bojana Brezigara – zastupnika słowjenskeho dźenika w Italskej Primorski Dnevnik –, Martxela Otamendija – šefredaktora baskiskeho dźenika w Španiskej Berria –, Bence Balásza – šefredaktora madźarskeho dźenika w Rumunskej Szabadság tež šefredaktora Serbskich Nowin Janeka Wowčerja jako čłona předsydstwa.
Hišće hač do njedźele wuhódnoćeja zastupnicy a zastupniče čłonskich medijow Europskeho zjednoćenstwa nowin w mjeńšinowych a regionalnych rěčach MIDAS w italskim Triesće koronapandemiju a jeje wuskutki.
Triest (SN/JaW). Nazhonjenja, kotrež su čłonojo Europskeho zjednoćenstwa nowin w mjeńšinowych a regionalnych rěčach MIDAS w běhu mjeztym połdra lěta trajaceje koronapandemije nazběrali, stejachu dźensa dopołdnja na MIDAS-konferency w Triesčanskim „Narodnim domje“ w srjedźišću. Po lěće přestawki korony dla wuhotuje prezencne zetkanje tónraz słowjenski dźenik w Italskej Primorski Dnevnik a dźensa rano witaše šefredaktor nowiny Igor Devetak přitomnych mjez druhim tež serbsce.
Budyšin (SN/CoR). Zajim za premjeru dwuzwjazkoweje knihi „Die Oberlausitz im Zweiten Weltkrieg – Studie zu den wendisch-deutschen Kreisen in Sachsen und Niederschlesien 1936–1946“ wčera wječor bě wjetši hač ličba dowolenych městnow pod koronawuměnjenjemi na žurli Budyskeho Kamjentneho domu. Dohromady 59 přizjewjenych zajimcow su Paul Fischer jako hosćićel, jednaćel LND Syman Pětr Cyž a zastupowaca direktorka Serbskeho instituta (SI) dr. Susanne Hozyna na knižne předstajenje witali, na kotrejž so awtor a šěsć lět při SI přistajeny historikar dr. Michael Richter njewobdźěli.
Njedawno zhonichmy tu we Łužicy zrudźacu powěsć, zo je znaty a za Serbow so horjacy přećel Serbow Ladislav Smejkal w Čěskej Lípje zemrěł. Wón bě na 50 lět w tamnišim domiznowědnym muzeju jako historikar nowočasnych stawiznow dźěłał. Je organizował a přihotował tójšto wustajeńcow k stawiznam Čěskeje Lípy a wokoliny w času 1914 do 1945.