Nowe stawizniske standardne dźěło
Budyšin (SN/bn). „Hornja Łužica w Druhej swětowej wójnje“ rěka fachowa, dwuzwjazkowa kniha stawiznarja Michaela Richtera, kotraž je wotnětka na předań, hač do kónca měsaca za potuńšenu subskripcisku płaćiznu. Wudawaćel publikacije rjadu Spisy Serbskeho instituta (SI) je Ludowe nakładnistwo Domowina. Jednaćel LND Syman Pětr Cyž wuzběhny na wčerawšej, online zwoprawdźenej nowinarskej rozmołwje, zo „je zajim na knize wulki, tójšto skazankow je hižo dóšło. Z nimale dwaj kilogramaj ćežkimaj, wuběrnje rešeršowanymaj zwjazkomaj měrimy so předewšěm na historikarjow, chronistow a wšitkich na regionalnych stawiznach zajimowanych.“
Lektor LND Michał Nuk doda: „Kniha móhła nimo toho studentam wažne žórło być a hodźi so runje tak jako přewšo detailowany leksikon wužiwać, z čimž nabudźe raz standardneho dźěła. Tež 70 lět po kóncu nacionalsocializma je potrjeba na předźěłanju diktatury dale wulka, wosebje hladajo na to, zo bě kritiske reflektowanje za čas Němskeje demokratiskeje republiki znajmjeńša bjez ideologiskeho wliwa praktisce njemóžne.“
Spěchowanske towarstwo Annahütte Lausitz je minjenu sobotu ...
PhDr Mikławš Krječmar
Oratorij wuspěšnje znowa předstajili a nahrawali
Budyšin (SN/bn). „Dźakuju so wšitkim bywšim čłonkam a čłonam 1. serbskeje kulturneje brigady – takrjec 13. a 14. lětnikej Serbskeho gymnazija Budyšin –, zo su so hišće raz do našeho cyłka wróćili. Dźakuju so aktualnej wobsadce a wosebje nowačkam 10. lětnika, kotřiž su po dosć pustym lěće korony dla partituru w chětro krótkim času nazwučowali. Dźakuju so orchestrej Serbskeho ludoweho ansambla za sćerpnosć a wospjet wuběrne zhromadne dźěło. A dźakuju so hudźbnikam wokoło Malty Rogackeho!“ To rjekny wuměłski nawoda brigady Friedemann Böhme po najprjedy raz poslednim předstajenju oratorija Měrćina Weclicha a Madleny Nasticcyneje „Hrodźišćo“ w Budyskej „Krónje“.
Handy hasnyć!
Wustajeja fota wo nałožkach
Serbskosć w měsće žiwa
Prěnje Krabatowe wiki z kulturu a regionalnymi wudźěłkami zahorili
Wojerecy (AK/SN). Powěsćowu figuru Krabat a jeje historiski přikład Jana Šadowica chce město Wojerecy dołhodobnje krućišo zakótwić. Tole podšmórny wyši měšćanosta Torsten Ruban-Zeh (SPD) minjeny pjatk, jako zahaji prěnje Krabatowe wiki w tamnišim starym měsće. „Chcemy sej zhromadne dožiwjenje stworić, kotrež nas wjele lět přewodźa“, wón rjekny. Organizowali su wiki marketingowe towarstwo, Łužiska hala, Kulturna fabrika a wobydlerska iniciatiwa. Symbolisce přija šěsćlětna Leni Kölling wot wyšeho měšćanosty, wot Wolfganga Krausa jako Krabata a Dietera Klimeka jako Čorneho młynka k šulskemu zastupej sportowy wačok z překwapjenkami. Tež dalše dźěći na Krabatowych wikach tajki dar dóstachu. „Wiki z regionalnymi wudźěłkami su jara dobra ideja“, měnješe jeje mać Daniela Kölling. Na jewišću zawjeselichu mjez druhim dźěći Němčanskeje pěstowarnje „Pumpot“ a hudźbna šula Bischof z baladu wo Krabaće.
Jurij Šołta
13. awgusta 1961 hranicu zawrěli(4 a kónc)
Přiwótřenje zymneje wójny – přistup ZRN k NATO a załoženje Zwjazkoweje wobory 1955 – dowjedźe k reakciji Němskeje demokratiskeje republiki (NDR), zo přistupi Waršawskemu paktej a załoži Narodnu ludowu armeju (NLA) 1. měrca 1956. To pak ludowe hospodarstwo NDR sylnje wužadowaše. Wokoło lěta 1960 so hospodarske a nutřkopolitiske połoženje NDR přiwótři. Přewysoke, njerealistiske předewzaća w hospodarstwje a planach, přespěšne přetworjenje ratarstwa w běhu dweju měsacow nalěto 1960 na prodrustwa – hačkuli běchu za to štyri lěta planowane, wjedźechu k wosłabjenej ratarskej produkciji a tak k ćežam w zastaranju ludnosće z butru, zeleninu a mlokom.
W Zapadnym Berlinje dźěłaše nimale 65 000 staćanow NDR z Berlina a wokoliny, a wobydlerjo Zapadneho Berlina nakupowachu tunje zežiwidła we wuchodnym Berlinje. Nimale połojca w Błótach narosćenych kórkow, chrěna a dalšeje zeleniny předawachu burja w Zapadnym Berlinje. Sylne wotwabjenje młodych fachowych dźěłaćerjow, lěkarjow a technikarjow do ZRN kaž tež ćěkańca prodrustwownikow stej połoženje 1961 porno tamnym lětam chětro přiwótřiłoj.
Planuja prěni serbski poetryslam
Budyšin (SN/JaW). Serbski ludowy ansambl chce w nowej hrajnej dobje z wjacorymi nowosćemi publikum na swoje zarjadowanja wabić. Zdobom chce swoje zhromadne dźěło ze serbskimi institucijemi zesylnić. Tohodla wuhotuje SLA zhromadnje z Ludowym nakładnistwom Domowina 6. nowembra w Lejnje 1. serbski poetryslam. Składnostnje prezentacije 9. wudaća knihi „Paternoster“ je předwidźane, zo młodźi serbscy pisacy swoje teksty zjawnosći přednjesu a hudźbnicy ansambla prezentaciju ze swojej live-improwizowanej hudźbu wobrubja. „Zjawne předstajenje swójskich tekstow wužaduje sej tójšto zmužitosće wot pisacych samych a hišće wjace, hdyž hudźbnicy jich přednoški z improwizowanej live-hudźbu přewodźeja“, wujasni intendant SLA Tomaš Kreibich-Nawka na wutornej nowinarskej konferency k zazběhej noweje hrajneje doby w Budyšinje. „Wězo sej wotběh ze sobuskutkowacymi dorěčimy. Prěnje rozmołwy smy hižo měli.“ Kaž intendant rozłoži, chce ansambl zhromadny rjad z LND prawidłownje wospjetować, planowane su štyri razy wob lěto.
