Praha (ČŽ/K/SN). Dowěra do čěskeje ekonomije je po pjećměsačnym rosće prěni raz spadła. W oktobru zniži so wona z dobrych 90 procentow cyłkownje wo 4,5 procentow na 86,4 dypki. Mjez předewzaćelemi spadny wona wo tři dypki na 86,5 procentow. Najbóle znižiła je so dowěra do hospodarstwa mjez přetrjebarjemi, mjenujcy wo cyłych 11,6 proc. Po čućiwym nalětnim deficiće dowěry do ekonomije w sćěhu přezcyłneho lockdowna je tole druhi najwyši minus wot wšeho spočatka. Tole wozjewja Čěski statistiski zarjad (ČSÚ) jako wuslědk woprašowanja w prěnjej połojcy winowca. Jako přičinu negatiwneho trenda mjenuje instanca nětčiše bujne rozšěrjenje koronawirusoweje pandemije w kraju a z tym zwisowacymi naprawami přećiwo njej. „Ludźo so nětkole wjele bóle hač hišće w septembru boja, zo so cyłkowna situacija dale pohórši a zo nastanu jim tohodla njemałe financielne problemy“, wuswětla połoženje jedyn z nawodnych sobudźěłaćerjow ČSÚ Jiří Obst. Wulka wjetšina po jeho słowach tež z tym liči, zo dóńdźe k wyšej bjezdźěłnosći.