Milan Kundera, jedyn z najwuznamnišich europskich spisowaćelow swojeho časa, je zemrěł. Jeho tragikomiske lubosćinske stawizny miliony čitarjow jimaja.

Minjenu srjedu je Morawska krajna biblioteka w Brnje wozjewiła, zo je 94lětny čěski a francoski staćan zemrěł. Swoje zawostajenstwo bě Kundera hišće za žiwe dny tutomu wažnemu kulturnemu zarjadnišću w swojim ródnym měsće dowěrił.

Jeho knihi buchu do wšěch swětowych rěčow přełožene a předawachu so po milionach eksemplarach. Wón přija mnohe wuznamjenjenja kaž Prix Médicis, ryćerski rjad francoskeje čestneje legije a Myto Jerusalema. Z romanom „Njeznjesliwa lochkosć byća“, kotryž spisa 1984 w francoskim eksilu, bu Kundera swětosławny. Hollywood je tutu tragisku lubosćinsku stawiznu wo pinčnicy Terezy a lěkarju Tomašu, zwisowacu z tematiku eksila, sfilmował. W Čěskej je tónle jeho najwuspěšniši roman hakle lěta 2006 wušoł. W emigraciji spisa Kundera wjacore romany w francošćinje. Centralna tema w jeho tworjenju běše žiwjenje w eksilu.