Wjele ludźi wjeseleše so 1. hodownika na wotewrjenje prěnjeho adwentneho kalendroweho durčka. Mustwo SJ Njebjelčic (SJN) chcyše čłonam a fanam tež tute wjeselo wobradźić. Trenar Daniel Pohling měješe ideju, zo tity z poprjančkami rozdawaja. Tuž napječechu swójby hrajerjow poprjančki za rjanu akciju.

Prjedy hač pak k zapakowanju dóńdźe, dawaše hišće mała zhromadźizna mustwa muži. Daniel Pohling je prěnju połseriju hišće raz wuhódnoćił. Ze štwórtym městnom je mustwo dotal spokojom. Při domjacych hrach je SJN na druhim městnje. Tola wonkowna statistika je jara skromna. Z jednym dypkom su čerwjene košle najšpatniše wonkowne mustwo. To dyrbi so na kóždy pad hišće něšto činić. Po krótkim wuhledźe na přihot za druhu połseriju a wobkrućenju cilow, dóńdźe k poprawnemu dźělej wječora.

Kóždy hrajer je samopječene poprjančki sobu přinjesł. Kaž w produkciskej liniji, sedźachu wšitcy hrajerjo pódla so a su překwapjenske tity spakowali. Na kóncu bě jich něhdźe 40 titow, kotrež dyrbjachu nětko rozdźělić.