We Wojerecach dźěłaja zaměrnje na projektach, kotrež su we wobłuku změny strukturow nastali. Tak dźe wo slědźerski campus, ponowjenje Łužiskeje kupjele, wodarnju w Ćisku, zwěrjenc a Šibojski jězor.

Wojerecy (AK/SN). Wojerecy wužiwaja dale zaměrnje šansy a perspektiwy ­změny strukturow. Tole wuzběhny wyši ­měšćanosta Torsten Ruban-Zeh (SPD) njedawno we Wojerecach. „Tuchwilu je nimale 300 milionow eurow spěchowanskich srědkow za projekty wobkrućenych a zdźě­la hižo zasadźenych. Wulki dźěl ­toho – 89 milionow eurow – je za slědźerski campus předwidźany“, wón wujasni. Z cyłkownje 51 projektow stej mjeztym dwaj zwoprawdźenej, na 14 projektach tuchwilu dźěłaja a dwanaće projektow planuja. Za tři projekty při­zwolenje předleži. Zbywace projekty su jako namjety do přichodneje spěchowanskeje periody zapisane.

„W januaru je prěnje posedźenje jury w Drježdźanach předwidźane, hdźež ma so architekturny běrow za nowy slědźerski campus wuzwolić“, Ruban-Zeh wuswětli. „Za to je wjacorych požadarjow. Tež z Wojerec je so běrow požadał, kotryž z Drježdźanskimi fachowcami hromadźe dźěła.“