Budyšin (SN/BŠe). Wjace króć su wjelki w Budyskim wokrjesu lětsa w nazymje wulke škody pola plahowarjow wowcow zawinowali, štož ma nětko konsekwency. Tak maja so wjacore rubježne zwěrjata zatřělić. Kaž nowinska rěčnica krajneho Sakskeho zarjada za wobswět, ratarstwo a geologiju (LfULG) Karin Bernhardt na naprašowanje wobkrući, předležitej tuchwilu za dwě kónčinje Budyskeho wokrjesa hódnoćenje fachowcow, zo smědźa so wjelki tam zatřělić. Zakład za zatřělenje je dokumentacija wjelčich nadpadow, při čimž maja so kriterije spjelnić, kotrež su dokładnje postajene. „Jelizo wjelki w běchu dweju tydźenjow skót we wotpowědnej kónčinje nadpadnu, byrnjež plahowarjo přicpějomne škitne naprawy dodźerželi, je zatřělenje po posudku fachowcow móžno“, Bernhardt wuwjedźe. Dokładnje rjadowane je postupowanje w paragrafje 6 sakskeho wjelčeho managementa. Jelizo posudk fachowcow předleži, móže potrjecheny wokrjes jednać.
Kotrej wjelčej črjódźe stej tuchwilu potrjechenej, wo kelko wjelkow so jedna a hdy maja so rubježne zwěrjata zatřělić, dotal znate njeje.
Choćebuz (SN). Předewzaće Łužiska energija a milinarnje (LEAG) zahaji klětu 1. januara w Janšojskej brunicowej jamje naprawy zawěsćenja. Kaž z nowinskeje zdźělenki LEAG wuchadźa, słuža tele dźěła zaručenju doby geotechniskeje wěstoty a znowawužiwanju pohórnistwowych přestrjenjow. Nadawk je braniborski krajny zarjad za hórnistwo, geologiju a surowizny wuprajił. Postajenje złožuje so na wuběžacu regularnu zawodnu dowolnosć za Janšojsku jamu kónc lěta 2023. Wšako procedura přizwolenja za kónčne zawodne planowanje po wšěm zdaću hišće dalše měsacy traje.
W Janšojskej jamje dźěła tuchwilu něhdźe 500 ludźi direktnje. Nimale 200 z nich zasadźuja při nadawkach za znowawužiwanje pohórnistwowych płonin. 300 přeńdźe do druhich jamow abo do renty.
Chróst. Jasnje a intensiwnje słónco tónle dźeń z módreho njebja swěći. Mróčałki scyła žane njewuhladaš. Karsten Herrmann hlada na monitor a spokojom nyga. „Tuchwilu swoju milinu dospołnje sami produkujemy a dodawamy ju samo hišće do zjawneje syće“, rozłožuje jednaćel twornje Capillar Schleifkörperwerk GmbH w Chrósće, wjesnym dźělu gmejny Wulka Dubrawa. To zmóžnja nowa fotowoltaikowa připrawa na třěše produkciskeje hale, kotruž je Porchowske předewzaće Solar Direkt tzwr natwariło. Lětsa w juliju přepodate su instalowane module hižo tójšto słónčneho swětła na elektrisku energiju přeměnili. Milinu twornja w bohatej měrje trjeba. Wšako pala w elektriskich pjecach hładźenske ćělesa (Schleifkörper) za wobdźěłanje metala, škleńcy a kamjeniny (Steingut). „Loni smy zličbowanku 50 000 eurow za milinu měli,“ rozprawja Karsten Herrmann. „Z pomocu noweje fotowoltaikoweje připrawy chcemy tutu zličbowanku w přichodźe społojčić.“
Lubnjow (PB/SN). Błótowski muzej a čołmarjo wulkeho přistawa w Lubnjowje běchu znowa hromadźe dźěłali, zo bychu wopytowarjam minjeny prěni kónc tydźenja w adwenće wosebite „Hody w Błótach“ wobradźili. Na Lubnjowskich adwentnych wikach sy to dožiwił, štož zwjetša tam přeco wuhladaš. Porno tomu skutkowachu wiki w Muzeju pod hołym njebjom na Lědach tak, hač bychu „z dospołnje hinašeje doby“ byli. Po nimale hodźinu trajacym čołmowanju z wulkeho Lubnjowskeho přistawa zanurichu so hosćo do swěta, kajkiž běše před wjace hač sto lětami w Błótach.
Radwor (SN/BŠe). W regionje produkowane zežiwidła měli tež ludźo w regionje kupować. Nimo toho so tak dźěło a próca producentow hódnoća. Tuž wěnowaše so towarstwo za wuwiće Hornjołužiskeje hole a haty (OHTL) na swojej regionalnej konferency minjeny štwórtk w Radworskim hosćencu „Meja“ regionalnym wudźěłkam a pokaza přitomnym móžnosće zwičnjenja.
Choćebuz (AK/SN). Parlamentariski statny sekretar zwjazkoweho hospodarskeho ministerstwa Michael Kellner (Zeleni) ma zdobywanje fachowcow za Łužicu jako jedne z najwjetšich wužadanjow strukturneho wuwića. „Widźimy, zo demografiska změna we wuchodnej Němskej, we Łužicy, hišće sylnišo slědy zawostaja hač w zapadnej Němskej“, wuswětli wón minjenu srjedu w Choćebuzu. Tam zetka so ze zastupjerjemi Łužiskeho kruha, do kotrehož su so měšćanosća a wjesnjanosća kónčiny zjednoćili. Kóždy potencial dyrbi so wužiwać, tohodla budźe Zwjazk kwalifikowanje dźěłowych mocow doprědka ćěrić a tež připućowanje fachowcow wolóžić.