Wučba hornjoserbšćiny kroči po digitalnych pućach

Drježdźany (SN/MiR). Lubina Hajduk-Veljkovićowa je zhromadnje z wjacorymi fachowcami wideja za serbšćinu wuknjacych produkowała. Serbska spisowaćelka a awtorka wuwučuje na Instituće za slawistiku Drježdźanskeje Techniskeje uniwersity (TU) hornjoserbšćinu. „Sym za čas korony na internetnych stronach slawistiki Hamburgskeje uniwersity wuknjenske wideja za rusku gramatiku a leksiku ze­znała. W tym spóznach potencial za wuknjenje serbšćiny“, tak wona jako awtorka a nawodnica projekta za zhotowjenje widejow, kotrež su z podatym QR-kodom online přistupne, zwěsći. Dotal wšak w serbskej rěči wuwučowanske wideja za zdobywanje rěčneho certifikata po europskim referencnym ramiku njepředležachu. „Nětko pak prěnje wideja ze specifiskej leksiku kaž wo městach a zarjadnistwach na niwowach A2, B1 a B2 mamy“, wujasni wona a doda: „Tute su zjawnje přistupne.“ We wobłuku „medije“ zaběraja so protagonisća we widejach mjez druhim z rozhłosowym studijom MDR, Serbskimi Nowinami kaž tež z časopisomaj Serbska šula a Płomjo.