Policija (17.03.16)
Awće frontalnje do so zrazyłoj
Liboń. Na S 100 blisko Libonja pola Prěčec stej wčera připołdnju dwě awće do so zrazyłoj. Wodźer Passata bě z dotal njeznateje přičiny naraz na napřećiwnej jězdni dróhi, hdźež prasny frontalnje do napřećo přijěduceho Opela Zafira. 74lětneho šofera VWja, kiž so w swojim jězdźidle zatłusny, dyrbješe wohnjowa wobora z awta wurězać. Wodźer Passsata kaž tež 29lětna wodźerka Opela a jeje třilětna dźowka so ćežko zranichu, a dyrbjachu jich do chorownje dowjezć. Šěsnaće wohnjowych wobornikow je so wo zranjenych starało. Tež wuchowanski helikopter bě na městnje njezboža. Cyłkowna wěcna škoda na jězdźidłomaj wučinja něhdźe 45 000 eurow. Zastojnicy Zhorjelskeje policajskeje direkcije přičiny zražki nětko přepytuja.
Policija (16.03.16)
Dźěłaćerja wuchować zwučowali
Ptačecy. K njewšědnemu zwučowanju wołachu wčera dopołdnja wobornikow z Lejnoho (Geierswalde) a wokoliny na twarnišćo pola Ptačec. Tam napodobnichu, zo bě twarski dźěłaćer do jědnaće metrow hłubokeje dźěry padnył. Pozadk bě, zo na tamnišim twarnišću płunowodaj w tajkej hłubokosći pod Čornym Halštrowom kładu. Zwučowanje bě za wobornikow kaž tež za dźěłaćerjow myslene. Po něhdźe hodźinje běchu „znjezboženeho“ wuchowali, z čimž běchu wšitcy wobdźěleni spokojom.
Policija (15.03.16)
Awto z dwora pokradnyli
Koćina. Zawod w Koćinje běchu sej njeznaći w nocy na njedźelu jako cil wupytali. W njezamknjenym kamorje sobudźěłaćerja namakachu kluč ćmoweho Mitsubishija ASX. Tak mjenowany SUV z čisłom HY-MD 74 steješe na dworje zawoda, hdźež so paduši do njeho sydnychu a z nim wotjědźechu. Hódnotu lěto stareho jězdźidła trochuje jeho wobsedźer na 18 000 eurow.
Policija (14.03.16)
Młodeho požadarja azyla zbili
Budyšin. Policija pyta swědkow k zranjenju ćěła, kotrež sta so sobotu připołdnju na Drježdźanskej dróze w Budyšinje. Kaž rěčnik policije zdźěli, su tam štyrjo njeznaći 16lětneho požadarja azyla zadźerželi, jemu mjezwočili bili a do nohi kopnyli. Młodostny móžeše so wuswobodźić a do swojeho bliskeho přebywanišća ćeknyć. Po jeho wuprajenju běchu skućićeljo něhdźe 20 lět. Jedyn z nich bě čerwjeny sweatshirt woblečeny. Štóž je njeskutk sobotu w 11.30 hodź. wobkedźbował abo móže informacije wo skućićelach podać, njech přizjewi so pola policije pod telefonowym čisłom 03581/ 468 100.
Policija (11.03.16)
Pjenjezy z běrowa fuk
Prawoćicy. Njeznataj paduchaj staj so zawčerawšim připołdnju w Prawoćicach do běrowa zadobyłoj. Kaž Zhorjelska policajska direkcija dale informuje, pokradnychu móšnju ze štyricyfrowej sumu pjenjez. Na to skućićelej z ćmowozelenym kombijom wotjědźeštaj. Štóž je w Prawoćicach abo wokolinje srjedu mjez 11.30 a 12.30 hodź. tajke awto wuhladał abo snano samo skućićelow spóznał, njech so na Kamjenskim policajskim rewěrje pod telefonowym čisłom 03578/ 35 20 abo w kóždym druhim policajskim běrowje přizjewi.
Policija (10.03.16)
Natutkany z kolesom jěł
Běła Woda. Chětro hłuboko do škleńcy pohladał je zawčerawšim wječor muž w Běłej Wodźe. To pak jeho njewotdźerža so přiwšěm na koleso sydnyć. Jako policisća 43lětneho zadźeržachu, dokelž bě jim jeho njewěste wašnje jězdźenja napadnyło, naměrichu pola njeho 2,28 promilow alkohola w kreji. Tak drje wón tež swoju jězbnu dowolnosć zhubi.
Policija (09.03.16)
Smjertny wopor wohenja
Wjelećin. Woheń w bydlenskim domje hašeć su w dźensnišich rańšich hodźinach wohnjowu woboru, wuchowanske mocy a policiju do Wjelećina wołali. Jako swědcy krótko po 1 hodź. woheń pytnychu, płomjenja hižo z woknom pod třěchu sapachu. Hišće prjedy hač wohnjowa wobora dojědźe, so poradźi 93lětnu wobydlerku z twarjenja wuchować. Podhlada zajědojćenja z kurom dla dowjezechu ju do chorownje. Po tym zo mějachu wobornicy woheń pod kontrolu, namakachu w domje čłowječe ćěło. Hač do kónca redakciskeho časa njebě tale wosoba hišće identifikowana, po wšěm zdaću pak jedna so wo jednoho z wobydlerjow. Při hašenju bě dohromady 50 wobornikow zasadźenych. Jedyn z nich so snadnje zrani. Jeho dyrbjachu na městnje ambulantnje zastarać. Rozměr škody dotal znaty njeje.
Policija (08.03.16)
Korpus křiža namakali
Kamjenc. Pozłoćanu figuru Chrystusa su minjeny tydźeń w Kamjencu namakali a na policajskim rewěrje wotedali. Po wšěm zdaću pochadźa wona ze swjateho křiža, kotryž su njeznaći snano wonječesćili. Kaž Zhorjelska policajska direkcija zdźěli, dotal njewědźa, komu něhdźe 40 centimetrow wulki a wotnutřka prózdny korpus słuša. Tohodla nětko tež z pomocu medijow wobsedźerja pytaja. Komuž postawa (hlej wobraz) słuša, abo štóž wě, štó z přiwuznych, přećelow abo znatych za njej pyta, njech přizjewi so na Kamjenskim policajskim rewěrje pod telefonowym čisłom 03578/ 35 20.
Policija (07.03.16)
Po zražce zemrěła
Krušwica. Ćežke wobchadne njezbožo sta so wčera popołdnju na zwjazkowej dróze B 115 pola Krušwicy. 20lětna wodźerka Peugeota bě do směra na Mužakow runje Opel přesćahnyła, jako dósta so přejara na prawy bok jězdnje, hdźež so suwać započa. Na lěwym boku puća prasny frontalnje do kamjentneho stołpa. Młodu žonu dyrbjachu alarmowane wuchowanske mocy wožiwić, wona pak hišće na městnje njezboža zemrě. Jeje sobujěduceho dowjezechu z helikopterom do chorownje. Wobdźěłanja njezboža dla wosta zwjazkowa dróha něhdźe tři hodźiny zawrjena.
Towarstwowy dom hašeli
Čorny Chołmc. Po wšěm zdaću zapalerstwa dla paleše so sobotu wječor drjewjana kólnja na Čornochołmčanskej Kubicec hórce. Płomjenja wupřestrěchu so tež na susodny towarstwowy dom. Byrnjež wobornicy woheń poměrnje spěšnje podusyli, nasta škoda w rozměrje něhdźe pjećcyfroweje sumy.
Policija (04.03.16)
Paduši w towarstwowym domje
Nowa Łuka. Njeprošeni hosćo su so w nocy na srjedu do towarstwoweho domu w Nowej Łuce zadobyli. Po tym zo běchu durje namócnje wočinili, pokradnychu z rumnosćow žiwidła a wšelake alkoholiske napoje.
Wopita na rewěr přijěła
Radeberg. Maš-li něšto na policajskim rewěrje wobstarać, da do toho radšo žadyn alkohol njepij, a scyła nic, hdyž sej tam z awtom dojědźeš. To wě nětko 54lětna šoferka w Radebergu, kotruž běchu tam na policiju skazali. Dokelž pak zastojnicy „chorhojčku“ čujachu, dyrbješe wona do alkomata duć. Při tym naměrichu 0,78 promilow alkohola w kreji. Awto smědźeše žona hnydom stejo wostajić.
