Policija (18.12.15)
Ottendorf-Okrilla. Z trikom je njeznaty zawčerawšim 51lětneho muža w nakupowanišću w Ottendorfje-Okrilli wobšudźił. Cuzy jeho narěča a prošeše, zo by jemu pjenjezy zaměnił. Při tym 51lětny paduchej pokaza, kelko pjenjez w swojej móšni ma, a njepytny, zo jemu tón wjacore bankowki z móšnje wućahny. W tym zwisku policija namołwja, cuzym ženje njepokazać, što je w móšni. Ludźo měli jara kedźbliwi być, hdyž jich něchtó narěči a chce pjenjezy zaměnjene měć.
Policija (17.12.15)
Sulšecy. Njedaloko Kulowa chcyše policija wčera rano awto z čěskim čisłom kontrolować. Jako so zastojnicy jězdźidłu bližachu, stupi šofer na płun a ćekny. W Sulšecach pak wón kontrolu nad awtom zhubi a do žiweho płota zajědźe. 41lětneho šofera policisća nachwilnje zajachu. W awće namakachu wšelake dźěle kolesa a wotpowědny grat. Kriminalna policija nětko pruwuje, hač buchu namakane wěcy něhdźe pokradnjene.
Policija (16.12.15)
Chelno. Nimale zražku z policajskim awtom zawinił by 32lětny kolesowar, kiž bě zawčerawšim wječor na zwjazkowej dróze B 96 z Chelna do Čorneho Hodlerja po puću, jako nadobo na tamny bok puća zajědźe. Policisća chcychu jeho něhdźe w 22.30 hodź. kontrolować, muž pak ćekny na polo. Tam jeho skónčnje tola dosahnychu a naměrichu pola njeho 1,12 promilow alkohola w kreji. Nimo toho bě drogowy test pozitiwny. Jako chcychu pozdźišo 32lětnemu krej brać, so wón mócnje wobaraše, tak zo změje so nětko přidatnje zamołwić.
Policija (15.12.15)
Wojerecy. Z dotal njeznateje přičiny je wčera popołdnju woheń we Wojerowskim předawanišću za zahrodnu potrjebu blisko lěsneho pohrjebnišća wudyrił. Při tym rozpřestrěchu so płomjenja tež na wosebitu wustajeńcu, w kotrejž předewšěm adwentne a hodowne debjenki poskićachu. Wjacore wohnjowe wobory mějachu płomjenja spěšnje pod kontrolu, škoda je přiwšěm poměrnje wulka. Na zbožo pak so nichtó zranił njeje. Kriminalna policija nětko pruwuje, hač ma tónle pad něšto z wohenjomaj minjeny kónc tydźenja we Wojerecach činić. Tam běštej so njedźelu wječor kontejner za staru papjeru kaž tež wosobowe awto paliłoj.
Policija (14.12.15)
Łomsk. Mało wjesela na swojej rubiznje měješe 28lětny muž, kiž je sobotu rano we Łomsku w Radworskej gmejnje Nissan Primera z garaže pokradnył. Na awtodróze A 4 při Kodersdorfskej wotbóčce jeho policija zadźerža a zaja. Kaž so wukopa, njeměješe paduch jězbnu dowolnosć a steješe pod wliwom drogow.
Policija (11.12.15)
Rakecy. Wjace hač 300 zakazanych silwesterskich praskotakow je 43lětny Rakečan w swojim bydlenju chował. Kaž policija zdźěla, měješe je pod swojim křesłom schowane, mjez druhim dwě tak mjenowanej kulobombje. Wobstarał bě sej wón wšitko w Čěskej. Wobydler je policiju na to skedźbnił.
Policija (10.12.15)
Rakecy. Njelubeho lista dla, kotryž bě 50lětna Rakečanka wčera w swojim listowym kašćiku našła, je tam k wulkozasadźenju policije a wohnjoweje wobory dóšło. Dokelž bě w lisće njeznaty běły próšk, alarmowachu specialnu jednotku wobory, zo bychu móžnym stracham zadźěwali. W lisće žonje něchtó hrožeše a ju křiwdźeše. Na to su 47lětneho muža, kotremuž běchu njedawno bydlenje wupowědźili, nachwilnje zajeli.
Policija (09.12.15)
Pěskecy. 18 měsacow stare dźěćo je so wčera w Pěskecach w zahrodowym haćiku zatepiło. Po informacijach policije bě hólčk 33lětnej maćeri twochnył, k susodźicom běžał a tam do hatka padnył. Jako susodka dźěćo wuhlada, přińdźe za hólčka kóždažkuli pomoc přepozdźe. Z helikopterom dowjezechu jeho do chorownje, hdźež zemrě. Kriminalna policija pad nětko přepytuje a za tym slědźi, kak móžeše k tragiskemu njezbožu dóńć.
Policija (08.12.15)
Wulka Dubrawa. Nimale runočasnje wčera policiji přizjewichu, zo běchu njeznaći we Wulkej Dubrawje cigaretowy awtomat pokradnyli a zo běchu runje tajki namakali. Joggowar w Budyšinje wuhlada jón w Sprjewi njedaloko kupjele. Wohnjowa wobora nastroj z wody wućahny. Po prěnich přepytowanjach so wukopa, zo běchu njeznaći w nim pyrotechniske wudźěłki rozbuchli, tak zo móžachu sej cigarety kaž tež pjenježnu kasetu přiswojić. Na to nakładowachu skóncowany aparat do jězdźidła a ćisnychu jón w Budyšinje do Sprjewje. Cyłkownje načinjenu škodu trochuja na wjacore tysacy eurow. Kriminalna policija pad nětko přepytuje.
Policija (07.12.15)
Biskopicy. Při ćežkim wobchadnym njezbožu je wčera wječor mjez Biskopicami a Póckowami młody muž žiwjenje přisadźił. 28lětny wodźer VWja bě so něhdźe w 23 hodź. z awtom suwać započał a z lěwym bokom jězdźidła do štoma zrazył. Zražka bě tak sylna, zo wón w znjezboženym awće zemrě, hišće prjedy hač wuchowanske mocy přijědźechu. Zasadźene běchu wohnjowe wobory z Póckowow, Smělnje a Biskopic kaž tež skupina spěšneje pomocy z Wjazońcy. Awto bě tak jara skóncowane, zo so wuchowarjam hakle po hodźinje poradźi, zemrěteho z njeho wućahnyć. Zo baterija VWja 50 metrow dale ležeše, swědči wo tym, kak mócna zražka bě. Tež swětłomjetak ležeše wjacore metry zdaleny. Policija nětko přepytuje, kak je k njezbožu dóšło.
