Malešecy (UM/SN). Wjaceswójbny bydlenski dom Při lěsu w Hućinje by Malešanska gmejna rady saněrować dała. W 1986 natwarjenym štyri poschody wysokim domje je 24 bydlenjow. „Mamy koncept za wobšěrne saněrowanje. Wšitko pak steji a padnje z financowanjom“, praji Malešanski wjesnjanosta Matthias Seidel (CDU). Koncept předwidźi, po standarće NDR natwarjene bydlenja tak modernizować, zo su wone za młodych ludźi atraktiwne. „Tehdyše rozrjadowanje stwow dźensa hižo prašane njeje. Wone su přemałe“, tak wjesnjanosta. Na zakładźe analyzy Ochranowskeho architekta Daniela Neuera su studiju zdźěłali, hač je projekt móžny. Ze studije wuchadźa, zo by z podružu, kaž je wsach z wašnjom, 36 lět trało, prjedy hač bychu kóšty zaso zarunane byli. A to hačrunjež so twarski staw domu jako dobry posudźuje. Hospodarsce zastupujomna doba by była 20 lět. „W Drježdźanach njeby to problem był“, Seidel měni. „Podruž kaž tam pak sej pola nas kazać njemóžemy. Tohodla dyrbimy naležnosć hinak financować.“
Za test přepjany był
Biskopicy. Z wopitymi kolesowarjemi dyrbi so policija nastajnosći zaběrać. Zo pak je něchtó tak pjany, zo ani alkoholowy test njezmištruje, so přehusto njestawa. Wutoru wječor su policisća w Biskopicach tajki pad dožiwili. Tam chcychu kolesowarja kontrolować. Tón pak přikaz, zo ma zastać, ignorowaše. Na to policisća jeho z awtom přesćahnychu a před nim zastachu. Muž pak njebě kmany tohorunja zastać a do słužbneho awta zastojnikow zajědźe. Na awće nasta při tym něhdźe 150 eurow škody. Poskićeny alkoholowy test Biskopičan zmištrować njemóžeše. Zastojnicy jemu tuž dalšu jězbu z kolesom zakazachu a přikazachu, zo ma krej dać, zo móhli zwěsćić, kelko alkohola je wón pił. Muž dyrbi so nětko wohroženja nadróžneho wobchada dla zamołwić, w policajskej rozprawje rěka.
Pančicy-Kukow. Na zwučene wašnje je w Kukowje hižo prěni kónc tydźenja róžownika mejemjetanje, kotrež młodźinski klub organizuje. Tři dny trajacy swjedźeń zahaja jutře, pjatk, w 16.30 hodź. z kinom za dźěći. Tomu slěduje w 19 hodź. kino za dorosćenych. Wot 21 hodź. su wšitcy na party z DJjom Guidom a Hangover Crew přeprošeni. Sobotu poskićuja w swjedźenskim stanje wot 15 hodź. kofej a tykanc. W 16 hodź. je mejemjetanje dźěći a młodostnych předwidźane. Mejske reje z kapału Serbeat a DJjom Guidom započnu so w 20.30 hodź. ze zaćahom mejskeho pora. Něhdźe w 21 hodź. předstaja młodostni swój žortny program. Njedźelu k rańšemu piwku wot 11 hodź. a k wobjedej wot 12 hodź. zahudźa Chróšćanscy muzikanća. Při wustupje chóra Šule Ćišinskeho móža sej hosćo kofej a tykanc słodźeć dać. W 15.30 hodź. zahudźi skupina Šwintuchi.
Zhromadnje rejować
Rakecy (SN/MWj). Wot spočatka róžownika maja w Rakecach nowu fyzioterapeutisku praksu. Załožił je ju z Noweje Wjeski pochadźacy Frank Zarjenk, a to na zawěrno wosebitym městnje, mjenujcy na starym dwórnišću. Tam 31lětny z mandźelskej a dźěsćom, kotremuž so bórze dalše přidruži, bydli. Jeho sotra je před 13 lětami dwórnišćo kupiła a tam tohorunja bydli. „Mamy tu wjele měra a runje tak wjele městna. Mjez naju bydlenjomaj bě hišće dosć ruma, tak zo sym so rozsudźił, tule swójsku praksu załožić“.
Trojorěčna poezija w Rumunskej
Reșița/Rešica. We wobłuku tele dny wotměwacych so 24. Němskich literarnych dnjow w rumunskim městačku Reșița bu wčera mjez druhim serbsko-němska zběrka basnjow Traiana Popa „Posledni sněh – Der letzte Schnee“ předstajena. Awtor a nakładnik edicije čitaše z njeje někotre swoje teksty w rumunskim originalu a Benedikt Dyrlich w serbskim a němskim přełožku.
Pilotowy projekt jutře zahaja
Drježdźany. Njedostatk wučerjow z masiwnym wupadom wučby je we wjesnych kónčinach Sakskeje wosebje wulki. Techniska uniwersita Drježdźany startuje pilotowy projekt ze 14 studowacymi za dobu šěsć tydźenjow jutře na šulomaj w Běłej Wodźe a Žitawje. Njeńdźe wo zaručenje regularneje wučby. Skerje maja studowacy stajnje pjatk přidatne poskitki za mjeńše wuknjenske skupiny zmóžnić.
Wjacore meje podrězane
Stróža (CS/SN). Nalěćo je w zahrodźe čas sadźenja. Na přirodowych wikach na dworje zarjadnistwa biosferoweho rezerwata Hornjołužiska hola a haty w Stróži pola Hućiny bě sobotu wuběr najwšelakorišich rostlin za balkon a zahrodu přewšo wulki. Runje tak wulki bě nawal wopytowarjow, kotřiž hižo dopołdnja w syłach přichadźachu. W běhu dnja bě jich potom něhdźe 4 300 ludźi, kotřiž nimo 90 stejnišćow producentow a wikowarjow dundachu a sej jich poskitk wobhladachu. Najpožadaniše běchu rostliny. Cyle spěšnje wupředate běchu kiwije, kotrež so přez zymu dźerža. Kaž stajnje bě tež wulki wuběr kulinariskich wosebitosćow, kotrež sy pak na městnje woptać abo tež sobu domoj wzać móhł, kaž rybu, chlěb, měd, mjaso, kołbasu a wjele dalšeho.
Bóšicy (SN/MiR). Wjace hač dwajtysac wopytowarjow zličichu organizatorojo lětušeho „Bóšičanskeho třiróžka“. Najebać wótrych zwukow motorskich, kotrež so zašłu sobotu a njedźelu po cyłej gmejnje znošowachu, sćěhowaše publikum zahoriće prezentacijam historiskich kaž tež načasnych mašinow, kotrež techniske wuwiće jězdźidłow předstajachu. Sobotu rano spektakl zahajiwši, dźakowaše so Bóšičanski wjesnjanosta Stanij Ryćer (rjemjesło Bóšicy) Budyskemu krajnemu radźe Udo Wićazej, kotryž běše so za přizwolenje zarjadowanja zasadźował. Njeswačanski wjesnjanosta Gerd Schuster (wobaj CDU) pak wuzběhowaše angažement sobudźěłaćerjow zarjadnistwa a twarskeho dwora. „Jeli wy to chceće, tute zarjadowanje tež za dwě lěće zaso budźe“, rjekny Udo Wićaz a doda: „Njemóže być, zo zarjady rozsudźa, hač so tajke zarjadowanje přewjedu.“ Hakle tydźeń do planowaneho zahajenja běše wone doskónčne přizwolenje dóstało.