Zo njeby kóžda komuna wšitke jej napołožene nadawki spjelnić dyrbjała, dźěłaja města a gmejny we wěstych wobłukach hromadźe. To činitej nětko tež Budyšin a Hodźij.
Budyšin (CS/SN). Gmejna Hodźij a město Budyšin wutworitej zhromadny stawniski wobwod. To je Budyska měšćanska rada wčera jednohłósnje wobzamknyła. Susodna gmejna je so na sprjewine město z wotpowědnej próstwu wobroćiła, dokelž so tamniša stawnica na wuměnk poda. W gmejnach z mjenje hač 5 000 wobydlerjemi so njezadani, měć swójsku stawnicu abo swójskeho stawnika. Hodźij ma jenož něhdźe 3 000 wobydlerjow, štož woznamjenja jenož mało padow k wobdźěłanju. Dokelž je za městno stawnika kwalifikowany personal wuměnjenje, njemóža prosće dalši sobudźěłaćerjo zarjadnistwa zaskočić.
Lemke myto Fallady přijała
Neumünster. Spisowaćelka a filmowča Grit Lemke je z lětušej lawreatku Hansa Falladoweho myta města Neumünster. Literarne, z 10 000 eurami dotěrowane wuznamjenjenje spožčichu jej za knihu „Kinder von Hoy“, z kotrejž „z dokumentariskej strózbotu wuwiće Wojerec wot modeloweho města NDR hač k politiskej radikalizaciji po lěće 1989 z kolektiwneje perspektiwy wotbłyšćuje“.
Nowy rěčny rum
Njebjelčicy. Serbske šulske towarstwo wutwori zhromadnje ze Serbskim Sokołom a ZARI w jutrownych prózdninach nowy serbskorěčny rum. Młodźi koparjo nabudu we wobłuku sportoweho projekta na sportnišćach w Njebjelčicach, Ralbicach a Chrósćicach serbskorěčne znajomosće wo woblubowanym sporće a swojim ćěle.
Helikoptery za Ukrainu
Paduchow lepili
Wojerecy. W kupnicy při Kamjenskim kolenje we Wojerecach su zaso raz paduchow lepili. Sobudźěłaćer informowaše póndźelu popołdnju policiju wo podhladnym poriku. Zastojnicy narěčachu wobeju, jako běštaj wonaj nimo kasy šłoj. Kaž so wukopa, staj wobaj wjacore bleše palenca w cyłkownej hódnoće něhdźe 700 eurow w swojej drasće schowałoj. Jednaše so wo 31lětneho muža a wo 30lětnu žonu z Rumunskeje. Pokradnjene wěcy wostachu hnydom w kupnicy. Město toho dóstaštaj paduchaj chłostanske zdźělenje. Policija pad nětko dale přepytuje.
Njebjelčicy (SN/MiR). Sakski krajny zarjad za wobswět, ratarstwo a geologiju (LfULG) podpěruje Njebjelčanski „Koncept k wodźiznowemu a łučinowemu renaturowanju Jawory“. Budźe to pilotowy projekt k spěchowanju wodźiznow w Sakskej. Kónc februara je LfULG w zarjadniskim zwjazku Při Klóšterskej wodźe w Pančicach-Kukowje ideje k přesadźenju renaturěrowanja rěčki Jawory předstajił. Wosebitosć je, zo su do projekta štyri komuny zapřijate, měsće Kamjenc a Halštrow kaž tež gmejnje Njebjelčicy a Pančicy-Kukow. Dale přitomne běchu zarjady Budyskeho wokrjesa, krajne zarjadnistwo za rěčne zawěry Sakskeje a Sakska krajna direkcija. Wo planowanje projekta „Njebjesa – njebjeske městno“ kotryž mjeztym hižo dwaj lětdźesatkaj předleži, stara so planowanski běrow Stowasser. Nětko je LfULG studiju wo „Renaturowanju wodźiznow a łučiny Jawory“ do nadawka dała. Studija, kotruž LfULG zdobom financuje, ma zaměr, zo so komuny sylnje do wobsahoweho dźěła zapřijeja a zo nastanje na kóncu zhromadny wuslědk za plan.
Budyšin (CRM/SN). Jako hódnotny dar k zazběhej swjateho tydźenja hódnoćeše tachantski farar Wito Sćapan pasionski nyšpor bołmončku nawječor w Budyskej Cyrkwi našeje lubeje Knjenje. Ćežišćo hodźiny sakralneje hudźby w póstnym času, kiž so hižo wjele lět w měšćanskej Serbskej cykwi poskićuje, běše tónraz prapremjera sekwency „Stabat mater“ Budyskeho cellista a komponista Helfrieda Knopsmeiera.
Wón hraješe dotal stajnje w Smochčanskim kubłanišću swj. Bena z dalšimi smyčkarjemi Serbskeho ludoweho ansambla a skupiny Chordophone na Wulkim pjatku wot sławnych italskich mištrow a tež dalšich wuznamnych komponistow zhudźbnjenu baseń, pochadźacu prawdźepodobnje z 13. lětstotka. W sławnym duchownym poemje „Stabat mater dolorosa...“ wobspěwa so ćerpjenje Jězusa Chrystusa z perspektiwy jeho maćerje Marije – kaž znajemy to tež z kěrlusa „Stała mać je bolosćiwa“.
Dar Jürgena Maćija přiwzali
Budyšin. Wobstatk eksponatow fotografikarja Jürgena Maćija w Budyskim Serbskim muzeju je wospjet rozrostł. Budyski wokrjes je dar přiwzał, tak zo wopřijima zběrka wotnětka tež seriju „Agrarlandschaften“ a kasetu z 23 portretami a awtografami cyłkownje dźewjeć serbskich spisowaćelow, mjez druhim Kita Lorenca, Jurja Kocha a Jurja Brězana. Maćij „dźakuje so rukopisy přewostajacym awtoram za podpěru“.
Medicinska uniwersita we Łužicy
Choćebuz. Braniborski kabinet je wčera w Podstupimje wobzamknył, zo ma so w Choćebuzu medicinska uniwersita Łužica – Carl Thiem załožić. Naćisk zakonja dyrbi parlament wobjednawać. Koncept noweje uniwersity je naprawa wuwića strukturow we łužiskej pohórnistwowej kónčinje.
Digitalizacija so wudaniła