Krótkopowěsće (16.06.15)
Za wjetšu politisku wahu
Wjelcej/Wětošow. Wolerski zwjazk Zeleny přichod Wjelcej je Łužiskej aliancy (ŁA) přistupił. To zdźěli wčera předsyda serbskeje strony Hanzo Wylem-Kell. Zwjazk skutkuje samostatnje jako wjesna skupina pod třěchu ŁA. Z přistupa nadźijeja so jeho čłonojo wjetšeje politiskeje wahi w boju přećiwo ničenju wobswěta wudobywanja miliny z brunicy dla.
Nowa tepjernja
Budyšin. Zakładny kamjeń su wčera za nowu tepjernju na Budyskej Thomasa Müntzerowej połožili. Tepjernja w blokowym systemje ma po principje koplowanja mocy a ćopłoty dźěłać. Budyski zastaranski zawod za energiju a wodu inwestuje jědnaće milionow eurow do projekta, kotryž budźe wot lěta 2017 tež milinu produkować.
Němske koparki dobyli
Winnipeg. Němske hrajerki su na swětowych koparskich mišterstwach w Kanadźe jako skupinske dobyćerki do wosmifinala zaćahnyli. Mustwo trenarki Silvije Neid je wčera we Winnipegu Thailandsku ze 4:0 porazyło. Wrota třělili běchu Melanie Leupolz, w druhim połčasu hrajaca Lena Petermann (dwoje) a Sara Däbritz.
Małe finale přěhrali
Policija (15.06.15)
Zhorjelc. Policiju a wuchowanske mocy wołachu wčera popołdnju na Wysočiny (Hochstein) zapadnje Zhorjelca. Tam běchu pasanća pytnyli, zo je blisko hórskeho hosćenca krosnowar znjezbožił. 28lětny muž bě so po krosnowanju z powjazom z hory dele pušćił, z wysokosće něhdźe třoch metrow na zemju padnył a so ćežko zranił. Z wuchowanskim awtom jeho do chorownje dowjezechu. Po wuprajenju swědkow powjaz cyle hač na zemju njedosahaše. Po wšěm zdaću bě krosnowar dołhosć powjaza wopak wobličił, tak zo dóńdźe k njezbožu.
Wuwědomić sej wěru a rěč
Wosmy serbski domizniski dźeń w Lejnom a Ptačecach wotměli
Lejno/Ptačecy (AK/SN). Serbski ewangelski cyrkwinski dźeń wokoło Wojerec spěchuje wuwědomjenje wěry. Wón budźi sensibelnosć a hordosć na serbske korjenje. „Jako swětny domizniski dźeń by wón jenož połojčny był. Tak pak twori jednotu mjez cyrkwju, serbskim ludom, kulturu a domiznu“, podšmórny Jan Malink wčera na 8. serbskim domizniskim dnju. Přišli běchu wěriwi Wojerowskeje Janskeje wosady kaž tež z Lejnjansko-Ptačečanskeje a Blunjanskeje. Wot Lejnjanskeje cyrkwje nóžkowachu woni do susodnych Ptačec. Po puću z městnami samo rejwachu, štož mjez přihladowarjemi kedźbnosć zbudźi.
Lěta 2008 zemrě z Hanu Grobinej poslednja nošerka wšědneje narodneje drasty w Lejnom, powěda jeje syn Günter Groba. Hač do lěta 1918 mějachu tam hišće serbske Bože słužby a hač do 1964 su pola Grobic serbsce rěčeli. „W lěće 2004 je naše domizniske towarstwo drastowe kemše organizowało“, dopomina so předsydka Martina Petschickowa. „Na to smy sej zakładny wobstatk narodneje drasty zešili, na čož smy dźensa hordźi.“
Z třomi dale
Budyšin (SN/at). Na rozsudnych wólbach noweho Budyskeho wyšeho měšćanosty 28. junija nastupja třo kandidaća. Nimo Alexandera Ahrensa (Lěwica, SPD, Budyski wobydlerski zwjazk) staj to Matthias Knaak (CDU) a kandidat-jednotliwc Mike Hauschild. Z terminom je dr. Andreas Hase městu pjatk wječor zdźělił, zo znowa njenastupi, kaž nowinski rěčnik André Wucht wobkrući. Dalšej kandidataj Andreas Thronicker a Jörg Urban (AfD) běštaj hižo na wólbnym wječoru 7. junija wuzamknyłoj, zo znowa nastupitaj.
„Ze swojej kandidaturu chcu tomu zadźěwać, zo nimaja wolerjo žaneje alternatiwy mjez kandidatomaj lěwicarskeho lěhwa a CDU“, rjekny Mike Hauschild našemu wječornikej. Njewočakowano dobry wólbny wuslědk 17,3 procentow jeho pohonja dale činić. „Lawski wěžer“ Andreas Thronicker namołwi swojich wolerjow, zo bychu Alexandera Ahrensa podpěrali. Najebać dalšu njekandidaturu wuchadźa dr. Andreas Hase z toho, zo „ma wulku zamołwitosć za přichod města“. Pod tym aspektom chce swoje wólbne poručenje hač do kónca tydźenja podać. AfD njeje so dotal k tomu wuprajiła.
Krótkopowěsće (15.06.15)
Štyri króć z přerězkom 1,0
Budyšin. Maturantam Serbskeho gymnazija wozjewichu minjeny pjatk pruwowanske wuslědki a predikaty. Kaž kubłanišćo zdźěli, je lětsa 56 šulerjow maturu złožiło. Wšitcy su pruwowanja wobstali. Štyrjo najlěpši docpěchu kónčny přerězk 1,0. Maturitna swjatočnosć z přepodaćom wuswědčenjow budźe 3. julija w Kamjenskim hotelu „Město Drježdźany“.
Chcedźa zwiski zesylnić
Dešno/Choćebuz. Hornjo- a delnjoserbska młodźina chce swoje zwiski zaso zesylnić. W prěnjej kročeli zetkachu so kónc tydźenja zastupnicy Pawka ze zastupnikami delnjoserbskeho młodźinskeho towarstwa Zapalaki. Mjez druhim wobhladachu sej domizniski muzej w Dešnje, Serbski muzej w Choćebuzu a wužiwachu čołmikowanje, sej mysle wuměnjeć.
Za sylnišu župu
Koncertuja při cyrkwičce
Radwor. Swój tradicionalny koncert při Radworskej starej cyrkwičce wotměje chór Meja njedźelu, 14. junija, w 16 hodź. Přeprosyli su sej Mejenjo Ralbičanskich młodostnych, a woni zahraja bajku wo wjerje, kotraž je kanibal. Hižo wot 15.30 hodź. poskića hosćom kofej a tykanc. Na lubowarjow spěwa a zabawy čaka rjane serbske popołdnjo.
W fabrice wjele dožiwić
Hórnikecy. Mjeztym hižo 12. swjedźenske hry wotměja so zajutřišim, njedźelu, wot 10 do 18 hodź. w Hórnikečanskej energijowe fabrice. Tam změja wiki z mnohimi rjemjeslnikami z regiona a dalšimi wikowarjemi. Jewišćowy program wuhotuja Hórnikečanski dujerski orchester, Kulowska rejwanska skupina, tamniši kolpingowy chór, kapała Franka Profta kaž tež hudźbna skupina Swingtime. Předewšěm za swójby budźe wjele poskitkow k hladanju a sobučinjenju.
Předawaja lisćiki za Mortkow
Stara technika fascinuje
Wětrowski oldtimerowy klub swjeći za tydźeń 30lětne wobstaće
Bóšicy (SN/MWj). Historiske jězdźidła su na kóždym wjesnym a dalšim swjedźenju jedyn z wjerškow. Často so ludźo dźiwaja, kak stara technika funguje a kak derje hladana je. Runje tomule hobbyjej wěnuje so Oldtimerowy klub wohnjokrute maćizny Wětrow. Mjeztym hižo 30 lět jeho čłonojo swoje dwu- a štyrikolesate lubuški hladaja, na nich šrubuja a je tež zjawnosći prezentuja.
Policija (12.06.15)
Wulka Dubrawa. W nocy na štwórtk běchu paduši traktorow w Budyskim wokrjesu po puću. W Porchowje, Łužnicy a we Wulkej Dubrawje měrjachu so woni na dohromady sydom traktorow. Dwě pokradnjenej mašinje je policija bórze po njeskutku zaso namakała. W třoch padach njebě so skućićelam poradźiło, motor zapinyć. Dwě pokradnjenej jězdźidle typa Fendt nětko pytaja. Dohromady nasta něhdźe 70 000 eurow škody.
Swjedźeń wjesela a sebjewědomja
Šěrachow-Korzym (CRM/SN). W lěće 1635 spožči so hornjołužiskemu městačku Šěrachow kejžorske prawo wikow. Wčera wječor zahaji so w tamnišej katolskej cyrkwi ze swjatočnym koncertom wjacednjowske swjedźenjowanje. Nimo měšćanosty Svena Gabriela (FDP) a fararja Martina Krausy je tež krajny rada Michael Harig (CDU) přitomnych w połnje wobsadźenym Božim domje postrowił.
Z koncertom pod nawodom kantorki Bernadett Schmidt skedźbni so zdobom na dołhu a wuspěšnu tradiciju hajenja cyrkwinskeje hudźby we wosadźe. Spěwarki a spěwarjo z cyłeje wokoliny wosadny chór zesylnichu. Z profesionalnymi spěwnymi solistami a instrumentalistami předewšěm z Budyšina poskići so kedźbyhódna hodźina hudźby, kiž smě so z prawom swjedźenska mjenować.
Krótkopowěsće (12.06.15)
Kontaktny forum za mjeńšiny
Strasbourg. Federalistiska unija europskich narodnych mjeńšin FUEN žada sej wot europskich statow připóznaće a škit rěčneje a kulturneje mnohotnosće. Tole potwjerdźi prezident Hans Heinrich Hansen wčera w Europskim parlamenće w Strasbourgu. Mjez druhim wón namjetowaše, zarjadować kontaktny forum za narodne mjeńšiny w parlamenće EU.
Žadaja sej runostajenje
Berlin. Zwjazkowa rada namołwja zwjazkowe knježerstwo, jenakosplažne partnerstwa na samsnu runinu z mandźelstwom stajić. To by rěkało, zo smědźa tež homoseksualne partnerstwa dźěći přiwzać. Zastupnistwo zwjazkowych krajow je dźensa w Berlinje z wjetšinu SPD, Lěwicy a Zelenych wotpowědnu rezoluciju knježerstwu schwaliło.
Poskića bórze wosebite baterije
