„Radšo serbskich kralow hač němskeho kejžora!“
Minjenu njedźelu sy, wujědujcy z Bělšec do směra Budestec, na kromje B96 zaso „pisanu“ črjódku ludźi z plakatami a z najwšelakorišimi chorhojemi wuhladał.
Budyšin (SN/MiP). Mjez chorhojemi zmahowachu so mjez druhim serbske a němske, chorhoje Europskeje unije a Ukrainy, kaž tež chorhoje w barbach tučele. Skupina angažowanych zetkawa so hižo wot junija zańdźeneho lěta pod hesłom „#B96 zrunać“ nimale kóždu pjatu njedźelu popołdnju, zo by jasne znamjo přećiwo njedźelnišim zetkanjam reichsbürgerow a dalšich „rozhorjenych staćanow“ podłu B96 stajała. Wona je so potajkim hižo do wulkeho hibanja za wjace demokratije w towaršnosći wot spočatka tutoho lěta sem w přenjesenym a w posłownym zmysle „na puć podała“.
Šulerjo ze zamołwitosću za druhich
Wojerecy (SN/MiR). 17 młodostnych w třećim lěće wukubłanja na hladarja abo hladarku změja wot 9. hač do 27. měrca we Wojerowskim klinikumje „Łužiska jězorina“ wosebitu zamołwitosć. Woni staraja so na staciji dermatologije wo hladarski kaž tež organizatoriski wotběh. Při tym budu jim nazhonići hladarjo kaž tež wučerjo a nawodźa praktiskich zwučowanjow poboku. Cil projekta je, zo sej šulerjo při cyłotnym zastaranju pacientow a organizaciji stacije trěbnu wěstotu a sebjewědomje za praktiski eksamen na polu hladanja zdobywaja, z kotrymž w lěću swoje wukubłanje zakónča.
Krótkopowěsće (07.03.24)
Doba zapodaća namjetow kónči
Njebjelčicy/Drježdźany. Doba zapodaća za lětuše wubědźowanje „Simul+ Kreativ“, z kotrymž chce Sakske ministerstwo za regionalne wuwiwanje „na inowaciju złožowacemu so wuwiću we wjesnych kónčinach“ polěkować, wuběži 11. měrca. Tež za segment „Žiwa dwurěčnosć“, za kotryž je dotal dźesać namjetow dóšło, su po słowach Katje Buder z krajneho kuratorija „přizjewjenja hišće móžne“.
Konsum alkohola problematiski
Drježdźany. Z njedawno wozjewjeneje 4. rozprawy Sakskeho statneho ministerstwa za socialne a towaršnostnu zwjazanosć nastupajo drogi a wotwisnosće wuchadźa, zo konsumowachu za čas wot lěta 2017 do 2021 něhdźe 420 000 Saksow w starobje 15 do 64 lět „alkohol na problematiskim niwowje“. Tuž su „prewencija kaž tež poradźowanske a pomocne poskitki nadal trěbne“, za kotrež nałožuja něhdźe 7,5 milionow eurow wob lěto.
Zhromadna lěkarska praksa
Muž do betonoweho sćežora zrazył
Daloko do zašłosće so podać
Wotrow. Kamjenski muzej zapadneje Łužicy přeprošuje sobotu, 9. měrca, w 10 hodź. na archeologisku ekskursiju na Wotrowske hrodźišćo. Zajimcy na ekskursiji njech so pod abo pod telefoniskim čisłom 03578 788310 přizjewja. Dorosćeni płaća za poskitk 6,50 eurow, dźěći 3,50 eurow. Městnosć zetkanja k ekskursiji poda so po přizjewjenju.
Spominaja na ewakuěrowanje
Kamjenc. Njedźelu, 10. měrca, je tomu 79 lět, zo bu wonkowna stacija koncentraciskeho lěhwa Groß-Rosen w Kamjenskim Knježim Dole ewakuěrowana. Jeći so tehdy do kaceta w Dachauwje transportowachu. Na cofnjenskich maršach tamnišeho lěhwa Kamjenscy interněrowani zemrěchu. Spěchowanske towarstwo wopomnišća w Kamjencu přeprošuje na wopomnjenske zarjadowanje njedźelu w 10 hodź., zo bychu znamjo přećiwo nacionalsocializmje sadźili.
Inwesticije nadal předwidźane
Slepo (AK/SN). Budyska firma BME, specializowana na produkciju składowakow ćopłoty, chce so w Slepom zasydlić a tak nowe dźěłowe městna wutworić. Tutón zaměr wuzběhowaše jednaćel zawoda dr. Andreas Golbs wutoru na posedźenju gmejnskeje rady. „Naš rozsud za stejnišćo Slepo steji. Dohromady chcemy 22 milionow eurow inwestować“, wón rozłoži. Zo pak předewzaće woprawdźe přińdźe, je tež wot toho wotwisne, hač planowana ekologiska milinarnja budźe. Jeli tomu tak njebudźe, „budźemy rozsud wo městnosći hišće raz pruwować“, Golb doda. Ekologiska milinarnja ma być kooperacija třoch firmow: BME, prolignis a innercity. Firma prolingis hišće na stejnišću Slepo dwěluje. Jeli-zo wona wotskoči, potom tež druhej firmje njepřińdźetej. Potom wotpadnje tež planowanych 120 dźěłowych městnow BME.
Dobre lěto za baćony
Prěnje baćony nawróća so poněčim ze swojich zymskich kwartěrow
Budyšin/Nuknica (SN/MG). Za baćony běše zašłe lěto přewšo dobre. Po statistikach přirodoškitneho instituta w Drježdźanach lehnješe w Sakskej loni wjace hač 400 porikow. Hačrunjež pak bě telko porow přitomnych, njeje situacija młodźatow spokojaca. „Tuchwilu narodźi so přerěznje 1,7 młodźatow. Kwota měła poprawom pola 2 ležeć, zo by so populacija zdźeržała“, měni Sylvia Siebert, nawodnica přirodoškitneho instituta w Drježdźanach. Štož płaći za cyłu Saksku, ma tež w Budyskim wokrjesu płaćiwosć. Kaž piše přirodoškitny zwjazk Nabu na swojej internetnej stronje, sydaše loni 25 registrowanych baćonow na swojich jejach.
Na pjeć městnach po cyłym wokrjesu běchu so baćony znowa zasydlili. Mjez nimi tři serbske wsy: Jědlica, Žuricy, Hnašecy a Nowoslicy. Tam narodźichu so nadpřerěznje mnohe młodźata, tak Nabu dale. Někak dwaj do tři młodźatow mějachu tam na porik.
Krótkopowěsće (06.03.24)
Tójšto požadarjow za dźiwadło
Zhorjelc. Gerharta Hauptmannowe dźiwadło w Zhorjelcu pyta naslědnika za dotalnu generalnu hudźbnu direktorku Ewu Strusińsku, kotraž dom na kóncu hrajneje doby wopušći. Srjedź meje chcedźa rozsudźić štó Nowu Łužisku filharmoniju nawjeduje. Požadali su so štyri žony a 70 muži. Pjećo z najlěpšimi wuhladami nětko stajnje jedne předstajenje opery „Lětacy Hollandźan“ Richarda Wagnera diriguja.
Čorny Chołmc: Nowa managerka
Čorny Chołmc. Susann Wuschko je nowa kulturna managerka Kulturneho centruma Krabatowy młyn Čorny Chołmc ptzwr. Z wotchadom Doris Kašporoweje je z Łužicy pochadźaca kulturna slědźerka 1. měrca dźěłowe městno wobsadźiła. We Łužicy znata je Susann Wuschko wosebje, dokelž wona poboku Kulowskeho genealogi a biografa Hansa-Jürgena Schrötera wo Janku Šajatoviću slědźi.
48 hodźin na dobro druhich
Rjemjeslnikow do „Króny“ witali
Policija (05.03.24)
Skućićel čeknył – swědkojo pytani
Němske Pazlicy. 36lětna bě njedźelu swój čerwjeny Citroën na parkowanišću při wulkohaće wotstajiła. W času mjez 10.45 hodź. a 14.15 hodź. buchu durje awta, pozdatnje přez ranžěrowanje druheho jězdźidła, wobškodźene. Skućićel pak bě městnosć njeskutka cyle jednorje wopušćił. Nětko pyta policija swědkow njezboža. Je-li něchtó tole wobkedźbował, njech so na Kamjenskim policajskim rewěrje přizjewi.
Nakładne awta kontrolowali
Budyšin. Na awtodróze A 4 su zastojnicy njedźelu kontrolowali, hač so nakładne awta na zakaz jězdźenja njedźelu dźerža. Cyłkownje 15 LKWjow wuhladachu, kiž so na to dźerželi njeběchu. Na šoferow čaka nětko 120 eurow pokuty.
