Z nowymi črijemi ćeknył

Budyšin. Stare črije na nowe zaměnił je muž sobotu w nakupowanišću na Budyskej Delnjokinjanskej dróze. Jako chcyše kupnicu bjez płaćenja wopušćić, jeho sobudźěłaćer narěča. Na to muž strowotne problemy wudawaše, so wutorhny a ćekny. Nowe črije běchu něhdźe 45 eurow hódne. Hač při pytanju za skućićelom stare črije něšto pomhaja, njeje znate.

Na Njepilic statoku wěnuja so dale rěči, nałožkam a drasće

Rowno (AK/SN). Spěchowanske towarstwo Rownjanskeho Njepilic statoka chce slepjanšćinu dale hajić a nałožować. Tole wuzběhny předsyda Manfred Nikel pjatk na hłownej zhromadźiznje, kotruž mjenuja „hoklapnicu“. 15 čłonow wobdźěli so kóždy druhi tydźeń na kursu serbšćiny pod nawodom Juliany Kaulfürstoweje. „Něchtóžkuli z nas hižo dosć derje serbsce rěči. Nětko chcemy tež slepjanšćinu pisać nawuknyć“, praji Manfred Nikel. Dalši nadawk je nałožki w běhu lěta pěstować. Z tym wotpowěduje w lěće 1999 załožene towarstwo swojej zasadźe „Kak to jo było“.

Pančicy-Kukow. Přichodny škotowy turněr serbskich seniorow wotměje so jutře, wutoru, w Karstenowej piwowej stwičce w Pančicach-Kukowje. Započatk budźe w 14 hodź. Nowačkojo su kaž kóždy raz rady witani, zdźěli hłowny organizator Měrćin Nowak. Dalši škotowy turněr wotměje so 26. měrca w Radworskim hosćencu Meja.

Radźićeljo wuradźuja

Chrósćicy. Přichodne posedźenje Chróšćanskeje gmejnskeje rady wotměje so jutře, wutoru, w 19 hodź. w Chróšćanskim gmejnskim a kulturnym centrumje. W zjawnym dźělu zaběraja so radźićeljo z dwěmaj priwatnymaj twarskimaj předewzaćomaj. Přizamknje so njezjawny dźěl. Wobydlerjo su wutrobnje přeprošeni.

Hraja we Łužiskim seminarje

Praha. Po tym zo je Chróšćanska lajska dźiwadłowa skupina swoju komediju „ALOJS mobilizuje“ dźewjeć razow na serbskich wjeskach zahrała, čaka na hrajerki a hrajerjow nětko nowosć. Sobotu, 2. měrca, we 18 hodź. předstaja woni swoju inscenaciju w Praskim Łužiskim seminarje. Zajimcy z čěskeje stolicy a z Łužicy su wutrobnje witani.

Přehladka hišće přistupna

Njedźelu, 16. junija, ma so runja druhim městnam we Wojerecach a wokolinje 2. dźeń wotewrjeneje zahrody wotměć. Za to pytaja nětko sobuwojowarjow, kotřiž bychu swoje zelene oazy druhim zajimcam spřistupnili a wopytowarjow witali.

Wojerecy (SiR/SN). Před njecyłymaj lě­tomaj je hłowna iniciatorka Roswitha Petschick z Małeje Nydeje z podpěraćelemi a partnerami organizaciju do ruki wzała a ze swojej priwatnej iniciatiwu prěni dźeń wotewrjeneje zahrody w starym Wojerowskim wokrjesu přihotować započała. Akcija bě tehdy wulki wuspěch. Hladajo na najwšelakoriše dobre wothłosy sej projekt wospjetowanje runjewon žadaše.