Wochozy. Na tradicionalny dźeń kamjenjow přeprošuje 12. junija spěchowanske towarstwo Wochožanskeho parka błudźenkow. Tam změja tón dźeń pisany program. Planowane su bursa mineralijow a wiki dekoraciskich kamjenjow, kamjentnych debjenkow a rostlin za kamjentnu zahrodu. Za małych wopytowarjow přihotuja indiansku wjes z mnohimi zaběrami. Mjez druhim budu dźěći złoto pytać móc. Za dorosćenych započnje so w 10.30 hodź. darmotne wodźenje po parku. Dalše informacije nadeńdu zajimcy internetnje pod www.findlings­park-nochten.de.

Bukecy. „Wšitke kraje su jeho česće połne“ rěka hesło 76. serbskeho ewangelskeho cyrkwinskeho dnja, kotryž wotměje so sobotu a njedźelu, 11. a 12. junija, w Bukecach. Po zahajenju sobotu w 14 hodź. w cyrkwi slěduje swačina na wosadnej žurli, hdźež so Bukečanska drastowa skupina předstaji. Spěwna skupina PoŠtyrjoch popołdnjo wobrubi. W 15.30 hodź. přednošuje dr. Lubina Malinkowa pod hesłom „Pobóžni, prědarjo a profetojo“ wo nowych dohladach do nabožneho žiwjenja w Bukečanskej wosadźe.

Njedźelu w 10 hodź. budu swje­dźenske kemše z Božim wotkazanjom, kotrež rozhłosowej sćelakaj MDR a RBB live wusyłatej. Po wobjedźe w 11.30 hodź. je planowana přestawka z krótkimi při­noškami a ze zhromadnym spěwanjom. W 14.30 hodź. předstajitej chór Budyšin a cyrkwinski chór Lubijsko­Žitawskeje eforije pod nawodom cyrkwinskohudźbneho direktora Christiana Kühne z Lubija oratorij „Podlěćo“ w Bukečanskej cyrkwi. Přez wšón čas cyrk­winskeho dnja poskića zaběru za dźěći.

Wobydlerska iniciatiwa wobara so přećiwo južnej wobjězdce Budyšina

Hrubjelčicy (UM/SN). Před 15 lětami protestowachu wobydlerjo při Sprjewi z plakatami a rysowankami přećiwo tehdy planowanej zapadnej tangenće. Dróha je mjeztym dawno dotwarjena. Jenož dwaj kilometraj dale běchu minjenu sobotu podobne wobrazy widźeć. Při Sprjewinym kolesowanskim puću běchu blida nastajane, za kotrymiž ludźo diskutowachu. Jich zhromadny zaměr je sprjewiny doł před dalšim dróhotwarskim projektom zachować. Tón by hišće bóle do přirody zasahnył hač zapadna tangenta. „Tole wšitko by so zničiło, bychu južnu wobjězdku twarili“, praji Robert Maćij. Hrubjelčan je sobuiniciator akciskeho dnja. Wón pokaza na wulke duby při kolesowanskim puću a na kerčinu při rěce, kotrež skića njetopyrjam a ješćelcam žiwjenski rum. „To wšitko mamy woprować za dróhu, kotrejež zmysł spóznać njemóžemy“, praji Robert Maćij. Wšako nětko zapadna tangenta wobsteji. Wona dźě wobchad z Hornjeho kraja wokoło Budyšina do směra na awtodróhu abo do Biskopic a do Kamjenca wjedźe.

Dźeń młynow je na swjatkownej póndźeli při najrjeńšim wjedrje wulke syły zajimcow a lubowarjow historiskich drohoćinkow přiwabił. Jedne z tajkich městnow bě pola Chasowa.

Chasow (JK/SN). Zajim za najwšelakoriše młyny, hač wětrniki abo z wodu ćěrjene, hač prastare abo hižo z nowšeho časa, je dale jara wulki. Po dwěmaj lětomaj wobmjezowanych móžnosćow nawali so předwčerawšim tuž ćim wjace ludźi na znate a woblubowane městna, zwotkelž młyny daloko do kraja strowja.