Bórze njewotwisne zastaranje
Ze solarnej připrawu chce gmejna swoje wudawki trajnje znižić
Njebjelčicy (SN/JaW). Towaršnosć „Łužiska přiroda a energija“, kotraž ma swoje hłowne sydło w Njebjelčicach, smě na třěše Njebjelčanskeho gmejnskeho centruma fotowoltaikowu připrawu instalować. To je gmejnska rada na swojim minjenym wuradźowanju štwórtk z wjetšinu hłosow rozsudźiła.
Do toho běštaj čłonaj předsydstwa towaršnosće Elke Altmann a Wolgang Giese rozłožiłoj, što planuja. Hladajo na stupace kóšty za milinu – tuchwilu wšak wójny w Ukrainje dla hišće spěšnišo stupaja – je planowane z fotowoltaikowu připrawu krok po kroku cyły gmejnski centrum awtarknje z milinu zastarać. Započeć chcedźa tak spěšnje kaž móžno za prěni dźěl připrawy něhdźe 30 kwadratnych metrow třěchi z modulemi wuhotować. „Produkowanu milinu pak składujemy pak direktnje w centrumje wužiwamy, bjez toho zo ju přez cuze milinowody wodźimy. To lutuje kóšty. Hdyž wjace miliny produkujemy hač přetrjebamy, dodawamy nadbytk do syće“, rozłoži Wolgang Giese.
Poradźeny zazběh w młynje
Na mnohich městnach su so ludźo kónc tydźenja wjeselili, zo móžachu zaso raz rjanu zabawu dožiwić. To bě sobotu při chodojtypalenju runje tak pytnyć kaž wčera na nalětnim swjedźenju.
Čorny Chołmc (SiR/SN). Rjany a dołho wočakowany wobraz skićeše so wčera w Čornochołmčanskim Krabatowym młynje: spokojni wopytowarjo, wjele přećelnych słowow a najlěpša nalada, a to při wulkotnym nalětnim wjedrje. Bjez dźiwa, zo jednaćel Tobias Čižik nalětni swjedźeń rjany zazběh lětušeho programa zarjadowanjow mjenowaše. „Wjeselimy so, zo je po dwěmaj lětomaj koronoweje přestawki zaso wjele wjerškow móžnych, kaž na přikład Krabatowe swjedźenske hry a dalše podawki.“
Prěni raz bě wčera Orchester łužiska brunica z hosćom w Krabatowym młynje. 35 hudźbnikow chce tam přichodnje časćišo přijěć. Wo tym hižo dlěje rozmysluja. Dotal pak so plan korony dla zwoprawdźić njehodźeše.
To bě sobotu runjewon perfektne wjedro, jako su po wšej Hornjej ...
Greenpeace-skupina w Njebjelčicach dźěłała
Njebjelčicy (SN/MiR). Hornjołužiska Greenpeace-skupina je w našich kónčinach skerje mało znata. To njezadźiwa, wšako skutkuja w njej předewšěm ludźo ze Žitawy a z wokoliny. Nětko pak su sej woni kónčinu mjez Njebjelčicami a Miłoćicami wotkryli.
Sobotu popołdnju su so woni wo wuměłsku twórbu pólskeje wuměłče Ivony Stypułkowskeje starali, kotruž bě wona we wobłuku LandArt-projekta w oktobrje 2019 stworiła. Blisko něhdyšeho nasypa Njebjelčanskeho spjateho jězora je mandala – mjez zelenymi stwjelcami młódneje trawy pak su čornošěre zornowcowe kamuški lědma hišće spóznać. Mjenowane kamuški tworja figuru kwětki z wjacorymi łopjenjami. Bohata zeleń na tutym městnje pokazuje płódnosć pódy. Tež łopješka na młodych štomikach pokazachu na to, zo je póda dosć płódna. „Smy sej rady sem dojěli“, powěda Bettina Schwoerer, „Tomaš Čornak bě nam, na jednej z našich lońšich akcijow wo Njebjelčanskej gmejnje a jeje zasadźenju za trajnu perspektiwu rozłožował, kotraž ma tež hišće sćěhowacym generacijam intaktny wobswět skićić. Za to so z našim dźěłom na LandArt-projekće dźakujemy.“
Krótkopowěsće (02.05.22)
Po poł lěće: Žane smjertne pady
Berlin/Budyšin/Zhorjelc. Roberta Kochowemu institutej (RKI) njebuchu po nimale poł lěće žane dalše smjertne pady w zwisku z koronawirusom zdźělene. Pandemija přiwšěm přewinjenja njeje. Incidenca w Budyskim wokrjesu je po RKI 411,1. W Zhorjelskim wokrjesu zwěsćichu 174 nowych infekcijow a incidencu 330,9. Tamniši krajnoradny zarjad informuje dodatnje wo třoch zemrětych pacientach za dobu wot 21. do 23. apryla.
Myto žurnalistomaj z Ukrainy
Bonn. Mjezynarodny zjawnoprawniski sćelak Němska žołma spožči lětuše myto „DW Freedom of Speech Award“ ukrainskimaj žurnalistomaj Jewgenyjej Malolstce a Mstylawej Černowej. Wobaj rozprawjataj tuchwilu z Mariupola. Wuznamjenjenje hódnoći angažement a zasłužby za swobodu rěčenja.
Pakety do Ukrainy zadarmo
Policija (29.04.22)
Płót tu zaso je
Ochranow. Dźěle pokradnjeneho płotu su zawčerawšim w Ochranowje zaso namakali. Swědk so pola policije přizjewi, po tym zo bě jědnaće wotrězkow płotu na jednej ležownosći wuhladał. Wone běchu so něšto dnjow do to toho z metalotwarskeje firmy zhubili. Hódnotu wotrězkow trochuja na něhdźe 1 500 eurow. Firma swój płót mjeztym zaso ma. 42lětny podhladny změje so padustwa dla zamołwić.
Greenpeace a mandala
Miłoćicy. Před lětomaj nastaty mandala mjez Miłoćicami a Njebjelčicami ma so wobnowić. Zdokonjeć chcedźa to jutře, sobotu, čłonojo hornjołužiskeje skupiny Greenpeace. Njebjelčanski wjesnjanosta Tomaš Čornak (CDU) chce jim na pućowanju gmejnu předstajić. Zdobom wobdźěla so na mejestajenju popołdnju na nawsy w Njebjelčicach. Njedźelu potom wotměje so w Miłočanskej skale měnjenska bursa rostlinow. Wot připołdnja w 13 hodź. hač do 17 hodź. móža zajimcy swoje młode rostliny sobu přinjesć a je z tymi druhich poskićerjow měnjeć. Tež nakup za mały pjenjez je móžny.
Požohnuja motorske
Ralbicy. Wodźerjo motorskich su njedźelu, 1. meje, do Ralbic přeprošeni. Tam so w 14 hodź. nyšpor z požohnowanjom mašinow a wodźerjow započnje. Přizamknje so zhromadny wulět.
Swójbny dźeń na statoku
Smědźa so na dorost wjeselić
Wuhódanje jutrowneje křižowki
Lětsa chcedźa twarić započeć
Róžant (SN/MWj). Po wšěm zdaću hišće lětsa prěnje twarske nadawki za nowu Ralbičansku pěstowarnju wupisaja a tež twarskim firmam přepodadźa. Prawdźepodobnje budźe so při tym wo hłubokotwarske dźěła jednać. Tole zdźěli wjesnjanosta Hubertus Ryćer (CDU) na wčerawšim posedźenju gmejnskeje rady.
Jeje čłonojo zaběrachu so mjez druhim z hospodarskim planom 2022. W nim je dalše planowanje projekta jedna z najwjetšich inwesticijow komuny. Kaž Ryćer dale zdźěli, ma pěstowarnja po najnowšich wobličenjach 8,1 milion eurow płaćić. 90 procentow z toho dóstanu spěchowane. Swójski podźěl gmejny wučinja přiwšěm něhdźe milion eurow. Při wobličenju je wobkedźbowane, zo móhli wudawki za twaršćizny a scyła za twarske kóšty wo hač do 25 procentow rozrosć. Za to móže gmejna hač do dźesać procentow wjace spěchowanja dóstać.
