Samo na sebi móhł wón lětsa woswjećić jubilej a snano tomu tak budźe, jeli so wobydlerjo gmejny Ralbicy-Róžant 12. junija za njeho a dalšu dobu z nim wupraja. Wšako je Hubertus Ryćer zastojnstwo wjesnjanosty delanskeje gmejny wot 1990 do 1994 (tehdy bě Róžant hišće samostatna gmejna) a wot lěta 2001 hač donětka tři wólbne doby wukonjał, štož wučinja 25 lět. Přihotowany na to wón je a ma tež wulki lóšt, swoje zastojnstwo dale wukonjeć.
K tomu pohonjeja jeho dotalne wuspěchi, kotrež je sej dyrbjał zdźěla zhromadnje z gmejnskej radu wšelakeje zestawy wuwojować. Ale skónčnje bě to wšo na dobro gmejny a wobydlerjow. Tych a jich wašnja wšak hižo ze štyrjoch lět jako hłownohamtski a 21 lět čestnohamtski wjesnjanosta znaje.
Kompromisy tworić dyrbjał
Njeswačidło (JK/SN). Korona je w Njeswačanskim gmejnskim zarjedźe zawiniła stop zarjadniskeho dźěła. Nimo wjesnjanosty Gerda Schustera (CDU) stej tež nawodnica financneho zarjada a nawodnica twarskeho wotrjada schorjenej. Někotre dalše sobudźěłaćerki su runje tak schorjene abo maja karanteny dla doma wostać. Tež rěčne hodźiny minjeny tydźeń přewjesć njemóžachu. Wo tym informowaše zastupowacy wjesnjanosta Norbert Braun (rjemjesło a přemysło) na zašłym posedźenju gmejnskeje rady, kotrež bě mjenowanych přičin a přewidneho dnjoweho porjada dla poměrnje krótke.
Njebjelčicy. Hudźbno-literarny wječor z Madlenku Šołćic wotměje so dźensa w 19 hodź. w Njebjelčanskej „Bjesadźe“. Dramaturgowka a zastupjerka intendanta za serbske dźiwadło při Němsko-Serbskim ludowym dźiwadle Madlenka Šołćic čita ze spisowaćelskeho tworjenja patera Romualda Domaški (1869-1945) štyri humoristiske powědančka. Wone satiriske skicy słušeja do jeho najzajimawšich wuměłskich wupłodow. Dujerski kwintet SLA wobrubi literarne čitanje z wubranymi hudźbnymi kruchami z pjera Kurta Mederacke. Publikum smě so tuž na zabawjacy wječork wjeselić. Zarjadowanje wospjetuje so jutře, štwórtk, w 19.30 hodź. na Ralbičanskim Radlubinje.
Přewjedu „rěčnu swětłownju“
Bydlenski mobil pokradnył
Brěza. Wobsedźerjo bydlenskeho mobila su jutry póndźelu popołdnju w Brězy (Birkau) pola Hodźija přestawku zapołožili. Jako so po poł hodźinje wróćichu, bě jězdźidło preč. Policija wuhlada je bórze na to w Strahwaldźe, hdźež awto do směra na Žitawu jědźeše. Zastojnicy chcychu mobil zadźeržeć, šofer pak spyta ćeknyć, při čimž policajske awto wobškodźi. Zajěwši na łuku spyta skućićel pěši twochnyć. Jeho pak spěšnje dosahnychu a zajachu. Škoda wučinja 17 000 eurow.
Slepo (AK/SN). Njedaloko dwórnišća ma w Slepom medicinski zastaranski centrum (MVZ) nastać. Za to je gmejna tak mjenowanu Lehnigkec wilu kupiła. Hnydom w susodstwje planuja štyri busowe zastanišća. Woběmaj projektomaj je gmejnska rada na swojim zašłym posedźenju přihłosowała. Wjesnjanosta Jörg Funda (CDU) ma nětko planowanja zahajić a za móžnosćemi financowanja a spěchowanja pytać. „Tajki medicinski centrum wutworić steji w našim wjesnym wuwićowym koncepće. Hižo wjacore lěkarske praksy su so pola nas naprašowali“, wjesnjanosta rozłoži.
Busowe zastanišća su zhromadny projekt Zhorjelskeho wokrjesa, wobchadneho zaměroweho zwjazka ZVON a Slepjanskeje gmejny. Naprawu chcedźa ze spěchowanskimi srědkami zwoprawdźić. Na te wašnje maja so zjawne wobchadne zwiski zawěsćić a zjawny bliskowobchad zesylnić, wšako móhli wobydlerjo z busom hač k lěkarskim praksam jěć.
Róžant (SN/MWj). Něšto stow křižerjow ze wšitkich serbskich katolskich wosadow je so wčera k dźaknym křižerskim kemšam w Róžeńčanskej putniskej cyrkwi zhromadźiło. Dokelž woni w lěće 2020 scyła jěchać njesmědźachu a loni jenož we wobmjezowanej měrje, so w zašłymaj lětomaj tež dźakna Boža mša wotměć njemóžeše. Loni su ju w mjeńšej formje w jednotliwych wosadach swjećili. Ćim dźakowniši křižerjo běchu, zo móžachu so wčera móhłrjec jako wukónc swojeje słužby w Róžeńće zetkać.
Hłowny celebrant bě Radworski farar Beno Jakubaš. Wón swjećeše Božu mšu hromadźe z wjacorymi serbskimi duchownymi a z čłonami Budyskeho tachantskeho kapitla swjateho Pětra a strowješe tež wšitkich wěriwych, kotřiž běchu přez Serbski rozhłós z kemšerjemi zwjazani.
Lena Hauptmann nominowana
Halle. Delnjoserbska šansoneta Lena Hauptmannojc je ze swojim duwom LeDazzo nominowana za wubědźowanje „Women in Jazz – next generation virtuell 2022“ a zdobom za Jazzowe myto města Halle 2023. Hač do 12. meje móža zajimcy swoje tři hłosy za dohromady 22 jazzowych hudźbnicow z Argentinskeje, Němskeje, Awstriskeje, Pólskeje, Ruskeje a ze Słowjenskeje zapodać, a to online pod .
Incidenca z kóždym dnjom niša
Budyšin. Incidenca w Hornjej Łužicy dale woteběra. Po Roberta Kochowym instituće je wona dźensa w Budyskim wokrjesu 274,5. RKI zdobom wo dalšich 446 natyknjenjach z koronawirusom informuje. Zhorjelski wokrjes je wčera za dobu wot Zeleneho štwórtka wo 241 infekcijach, mjez nimi je 45 dźěći, rozprawjał. Incidenca po RKI je tam dźensa 186,4.
Pilnje jejka debili
Předjězbu njewobkedźbował
Dźěwin. Wjacori zranjeni běchu wuslědk wobchadneho njezboža jutrowničku popołdnju w Dźěwinje. 91lětny wodźer awta njebě tam předjězbu dalšeho jězdźidła wobkedźbował a do njeho zrazy. Štyri wosoby so ćežko zranichu, mjez nimi bě dźewjeć měsacow stary ćěšenk.