Nastać ma strowotniski centrum
Hamor (AK/SN). Hamorska gmejna chce w ramiku strukturneje změny strowotniski centrum twarić. Na to je tamniši wjesnjanosta Achim Junker (CDU) na minjenym posedźenju gmejnskeje rady pokazał. 29. měrca je gmejna próstwu wo spěchowanske srědki Zhorjelskemu wokrjesej a Sakskej agenturje za strukturne wuwiće (SAS) posrědkowała. „Chcemy w centrumje zaměstnić štyri lěkarske praksy, fyzioterapiju, strowotne studijo, apoteku a bydlenje z wobstajnym hladanjom“, wón rozjasnjowaše. Wot měrca 2023 hač do měrca 2026 chcedźa projekt zwoprawdźić. W nowembru zaběra so regionalny přewodźowanski wuběrk z próstwu. Twarić započeć měli po móžnosći klětu w měrcu. Z podpěru wuwićoweje towaršnosće Delnjošleska Hornja Łužica tzwr (ENO) Zhorjelskeho wokrjesa a towarstwo Perspektiwa Hamor běše gmejna próstwu wo spěchowanje stajiła. Nětko nadźija so na spěchowanje we wysokosći 95 procentow twarskich kóštow ze zakonja wo sylnjenju struktury Zwjazka. Moderny, bjez barjerowy a inowatiwny ma strowotniski centrum być.
Wikuja wotnětka ze symjenjom
Budyska měšćanska biblioteka stara so wo zachowanje družinow
Budyšin (CS/SN/MiR). W Budyskej měšćanskej bibliotece nochcedźa lětsa hižo jenož knihi a druhe medije wupožčować. Ně, wot póndźele maja tam pod hesłom „Symjo požčeć – mnohotnosć žnjeć“ wupožčowarnju najwšelakorišeho symjenja za wusyw. Titki, kotrež poručeja, wobsahuja symjo zwjetša starych a rědkich družin rostlinow. Tak wabja na přikład Kralowna Neckara, Cherokee Trail of Tears abo Bosniska butrowa buna wopytowarjow biblioteki, sej titku sobu wzać a na swójsku hrjadku na zahrodźe wusywać. Wupožčowarnja w bibliotece ma zajimcam k informaciji wo starych družinach rostlinow słužić. Mjez tutymi su symjenja solotwje a čerwjeneje abo zeleneje zahrodneje łobody (Gartenmelde). Klětu maja so hišće symjenja tomatow přidružić. Organizatorojo so nadźijeja, zo so poskitk z dalšimi družinami rostlin hišće powjetša a to přez symjenja, kotrež čitarjo a zajimcy do knihownje přinjesu. Projekt w zhromadnym dźěle z towarstwom za zachowanje wužitnych družin rostlinow (VEN) přewjedu.
Krótkopowěsće (13.04.22)
Štyri wólbne namjety
Budyšin. Wólbny wuběrk města Budyšina je wčera štyri namjety za wólby tudyšeho wyšeho měšćanosty 12. junija přizwolił. Su to w slědźe, kotryž komunalny wólbny porjad postaja, Alexander Ahrens (SPD), Karsten Vogt (CDU), Andrea Kubank (Lěwica) a Andreas Thronicker jako požadar-jednotliwc. Dale namjetowany Jens Reime wobkrućeny njebu, trěbna ličba podpěracych podpismow předležała njeje.
Natyknjenja na nišim niwowje
Budyšin. W Budyskim wokrjesu incidenca dale spaduje. Po Roberta Kochowym instituće je wona dźensa 748,0. RKI informowaše zdobom wo 501 natyknjenjach z koronawirusom a dalšim smjertnym padźe. Wo 451 infekcijach, mjez nimi je 70 dźěći, a štyrjoch w zwisku z koronu zemrětych mjez 28. měrcom a 3. aprylom rozprawješe wčera wokrjes Zhorjelc. Tamniša incidenca 649,7 po RKI je dźensa tróšku zwyšena.
Ameriska baza w Čěskej?
Policija (12.04.22)
Ćežke njezbožo
Rachlow. 38lětny muž budźe so dyrbjeć dlěje w chorowni lěkować dać. Tón bě zašłu sobotu z Wulkich Ždźarow na wokrjesnej dróze 9221 z awtom typa Opel Astra znjezbožił. W křiwicy zajědźe wón z jězdneje, při pospyće směr korigować, zrazy do dweju štomow, prjedy hač njewosta wosrjedź jězdneje stejo. Šofer so při njezbožu ćežko zrani. Awto je dospołnje skóncowane.
Ilegalne zetkanje šoferow mopedow marki Simson
Zhromadnje jejka debili
Wulki zajim žurnalistow
Budyšin. Narodne zetkanje pućowanskich žurnalistow je wunjesło, zo běše we wobłuku jězby po Sakskej, jězba do Budyšina najpožadaniša. Poskitk bě 8. apryla pjeć žurnalistow a žurnalistkow do sprjewineho města přiwabiło, zdźěli Budyske měšćanske zarjadnistwo. Tura po Hornjej Łužicy a z tym tež po Budyšinje steješe pod hesłom „Hwězdy a spirituelne městnosće podłu Via Sacry“. Nastork za tule temu su podawki składnostnje 300lětneho wobstaća Ochranowa a 125 lět Ochranowskeje hwězdy. Wyši měšćanosta Alexander Ahrens (SPD) je hosći postrowił.
Wobnowja dróhu
Chrósćicy. Šoferojo, kotřiž časćišo tak mjenowany „serbski highway“ z Chrósćic do Nowoslic wužiwaja, maja so přichodny tydźeń na poćeženja nastajić. Kaž krajnoradny zarjad zdźěli ponowja na S 101 mjez Chrósćicami a Hrańcu wot 19. do 22. apryla asfalt. Wot wotbóčki do Noweje Wjeski hač do Chrósćic budźe puć dospołnje zawrjeny. Wobjězdka powjedźe přez Nowu Wjesku, Worklecy, Wudwor a Kozarcy do Chrósćic.
Medijowy projekt přewjedli
Kubłanje na polu digitalnych medijow je dźeń a wažniše. Wšako započinaja dźěći hižo w předšulskej starobje a zdźěla hižo zašo so z nimi zaběrać a z jich pomocu wuknyć.
Nawrót jutrowneje tradicije
Dorost debjerjow jutrownych jejkow w Nowej Łuce so předstajił
Nowa Łuka (JoS/SN). Na wikach jutrownych jejkow w Nowej Łuce bě sej zašły kónc tydźenja do tamnišeho wjesneho hotela syła zajimcow dochadźała. Hladajo na pandemiju dyrbjachu organizatorojo wšitko jara spěšnje přihotować. Wšako bě so towarstwo za spěchowanje regionalneje kultury srjedźneje Łužicy 2. apryla a z tym přewšo krótkodobnje rozsudźiło, wiki w małej formje přewjesć. „Mějachmy jenož dźesać dnjow chwile wšitko přihotować“, rjekny Kirsten Bejmina. Wona dźakowaše so předewšěm jejkadebjerjam, kotřiž běchu hnydom připrajili, so wobdźělić. Někotři wšak běchu so tež hižo sčasom naprašowali, hač so wiki wotměja a hač móža so wobdźělić. Tradicija wikow w Nowej Łuce je wšěm wobdźělenym wažna naležnosć. K tym, kotřiž so hižo 30 lět sobu najstaršim wikam jutrownych jejkow we Łužicy zwjazani čuja, słuša čłonka towarstwa Edeltraut Gründel a jeje mandźelski Manfred z Wojerec kaž tež swójba Roßbach z Choćebuza.
