Snadnje woteběraca tendenca
Budyšin. Z incidencu 1 416,7 w Budyskim wokrjesu a 1 248,8 w Zhorjelskim je Roberta Kochowy institut dźensa snadnje woteběracu tendencu za Hornju Łužicu potwjerdźił. Wokrjes Budyšin je wčera wo 846 zwěsćenych nowych natyknjenjach z koronawirusom rozprawjał. Wokrjes Zhorjelc mjenowaše štwórtk 739 infekcijow, mjez nimi bě 140 dźěći, a dalši smjertny pad z 21. měrca.
Nalětnje wožiwjenje
Budyšin. Wo nalětnim wožiwjenju na wuchodosakskich dźěłowych wikach je Budyska wotnožka Zwjazkoweje agentury za dźěło wčera informowała. Wjace hač 1 100 wosobow je so zaso do dźěła dóstało, štož je stopnjowanje wo pjećinu porno předměsacej. W regionje bě w měrcu 17 481 bjezdźěłnych, 343 mjenje hač w februarje. Tudyša kwota bjezdźěłnosće aktualnje 6,3 procenty wučinja.
Luksusowy hotel nastanje
Chrósćicy. Towarstwo za wuwiće Hornjołužiskeje hole a hatow (OHTL) přeproša jutře, pjatk, w 16 hodź. na zjawne zarjadowanje w Chróšćanskej wjacezaměrowej hali Jednota. We wobłuku zdźěłanja Leaderoweje wuwićoweje strategije za spěchowansku dobu 2023 do 2027 chcedźa wo prašenjach naslědnosće zjawnje diskutować. Pod hesłom „Je naslědnosć tema za nas?“ chcedźa wo na region so wusměrjace temy turizm, bliskowočerstwjenje, přiroda, ratarstwo a rybarstwo rěčeć. Zaměr je zwěsćić aspekty naslědnosće, kotrež budu w regionje OHTL w spěchowanskej dobje 2023 do 2027 wažne. Wobydlerjo kaž tež zastupjerjo komunow, předewzaćow, towarstwow a cyrkwjow su přeprošeni sobu debatować.
Karty placali a spěwali
Ralbicy (JK/SN). Runja druhim gmejnam zarjadniskeho zwjazka Při Klóšterskej wodźe mějachu so radźićeljo Ralbic-Róžanta na minjenym posedźenju z tematiku čłonstwa a wobsaha Towarstwa za wuwiće Hornjołužiskeje hole a hatow (OHTL) zaběrać. K zazběhej předstaji nawoda regionalneho běrowa OHTL w Rakecach André Köhler zaměry a dźěławosć zwjazka. Dohromady skutkuje w nim 16 komunow. To je 13 gmejnow a města Budyšin, Wóspork a Kulow. W regionje łužiskeje hole a hatow wěnuja so wosebje štyrjom tematiskim wobłukam: serbskej kulturje, rybarstwu, biosferowemu rezerwatej a městu Budyšinej. Hłowny zaměr je, wuwić a skrućić dale wjesny rum na sewjeru Budyskeho wokrjesa. K tomu słuži wosebity spěchowanski program Leader.
Pomocliwosć ludźi znjewužiwaja
Kinspork. Wuměnkarka z Kinsporka je so tele dny z woporom wobšudnikow stała. Njeznatej žonje klinkaštej při durjach a prošeštej wo dar za ukrainskich ćěkancow. Dobroćiwa žona dari dźesać eurow. Hakle jako běštej njeznatej bydlenje wopušćiłoj, 80lětna pytny, zo jej debjenki w hódnoće něšto stow eurow pobrachuja. Nimo toho běštej jej skućićelce 170 eurow z móšnje pokradnyłoj.
Budyšin (SN). Wo trěbnych naprawach korony za lětuše jutrowne křižerske procesiony su zastupowacy Budyska krajny rada Udo Wićaz (CDU) a zastupjerjo strowotniskeho zarjada kaž tež křižerjo zawčerawšim w Budyskim krajnoradnym zarjedźe wuradźowali.
Hinak hač loni njeběchu lětsa wotpowědne dowolenja za procesiony trěbne. Nowe wot 3. apryla płaćiwe sakske koronaprawidła přewidźa jenož hišće bazowe škitne naprawy. Tuž strowotniski zarjad zwjetša někotre naprawy doporuča, mjez druhim, zo maja so wobdźělnicy zhromadneho konjenca z jich wosobinskimi datami zwěsćić. Dale doporuča křižerjam, přez swjate dny dwaj testaj přewjesć a dokumentować. Kaž hižo loni je strowotniski zarjad wotpowědne testy zamołwitym procesionow přepodał. Nimo toho skedźbni zarjad na to, zo maja křižerjo znajmjeńša 1,5 metrow wotstawka zadźeržeć a, hdźež to wonka móžno njeje, znajmjeńša nahubnik nosyć. W rumnosćach ma so FFP2 nahubnik nałožować. W gastronomiji maja so po nětčišich prawniskich předpisach 3G-rjadowanja wobkedźbować.