24lětna Annelie Ćemjerec pochadźa z Radworja a je na Budyskim Serbskim gymnaziju maturowała. Wot lěta 2012 do 2015, potajkim jako bě hišće šulerka, přebywaše wona ze swójbu w Malajziji. „Bě to wosebity čas. Domoródni so mje často prašachu, zwotkel pochadźam. Wotmołwich jim, zo drje sym z Němskeje, tež hdyž so ženje tak prawje jako Němka nječujach. Započach so tuž intensiwnišo so z tym zaběrać, što to woznamjenja Serb abo Serbowka być.“
Po nawróće do Łužicy bě za Annelie Ćemjerec předewšěm Sofija Cyžec wažny kontakt. „Z njej a dalšimi přećelemi organizowachmy mały festiwal techno-hudźby ‚Meta Solis‘. Scyła počach zaso wuši zwisk k serbstwu wuwiwać a so z tudyšej kulturu rozestajeć. A wuwědomich sej: My Serbja smy tola telko wjac. Njejsmy jeno stereotyp, kotryž nam wotwonka nadawaja. Móžemy runje tak kaž druzy tež swoju wšelakorosć pokazować.“