Budyšin (SN/MG). Zo njeje internet stajnje jenož žohnowanje, ale druhdy tež pokleće, to dožiwjeja ći, kotrymž je něchtó na přikład intimne wobrazy připósłał. Tole móže so wězo we wzajomnym zrozumjenju stawać, ale tež nawopačne je móžno. „Sexting“ je nadzapřijeće za wonu formu wirtuelneje komunikacije, kotraž wobsteji z powěsćow, wobrazow a widejow.

Tři młode serbske žony, Sophia Hančikec, Hana Nukec a Celina Knopec, su so na temu nětko z krótkim widejom zwažili. Tutón su zhromadnje ze sobudźěłaćerku studija Lucija, Michelle Mikławškec, nadźěłali. Ma to być prěnje widejo cyłeho rjadu podobnych clipow. W dwumjeńšinskim wideju předstajeja strachi „sextinga“ za wobdźělenych, wosebje potom, hdyž so hranicy překročuja.