„Lěto župow“ je we Łužicy mjeztym přeco: Zhromadne aktiwity rozrostuja

Wojerecy (SN/mb). Wonaj staj „mikroteam“ wutworiłoj: Marija Šołćic, motiwatorka za serbšćinu w kónčinach Kulow, Wojerecy a Halštrowska hola, a Lucian Kaulfürst, kotryž tute zastojnstwo w Malešecach, Kubšicach a Bukecach wukonja. Wčera měještaj pod hesłomaj „bookii-klub“ a „rěčeć, natočić, wuspytać“ zaso zhromadnu akciju na starosći, tón raz we Wojerecach. A nawječor staj kooperaciju župnemu předsydstwu předstajiłoj. Wojerowska župa je jenička, kotraž ma wšě druhe župy jako susodow a tradicionelnje zwisk do wšěch směrow Łužicy. Tak su so wčera tež na planowane lětuše zhromadne wuradźowanje z předsydstwom župy „Delnja Łužica“ přihotowali.

„Lěto župow“ 2021 składnostnje stoćin załoženja regionalneje struktury Domowiny w lěće 1921 we Wojerecach běše akteram po wšej Łužicy z nastorkom, so na pohłubšenje wuměny a zhromadneho dźěło wusměrić. A wězo tež lěto zhromadneje zabawy. Tak wostawa na přikład wulět župow do Błótow z čołmikowanjom a spěwanjom njezapomnity.