Zły Komorow (SN/at). Město Zły Komorow njebudźe próstwu wo pruwowanje přisłušnosće k serbskemu sydlenskemu rumej stajić. Wotpowědny namjet, kotryž běchu měšćanscy zapósłancy dr. Gudrun Andresen (CDU), Christina Nicklisch (USW), Gerhard Wolf-Peter Hannig (Lěwica) a Rolf-Peter Rössiger (SPD) zhromadnje zapodali, njeje na wčerawšim posedźenju zhromadźizny měšćanskich zapósłancow wjetšinu dóstał. Wothłosowanje wunjese 14 hłosow za namjet, runje telko přećiwo njemu a hłosawzdaći. Mjez wotpokazarjemi běchu dwaj z frakcije SPD a jedyn z frakcije Lěwicy.
Kaž zdźěli podpěraćel serbskich naležnosćow w měsće a bywši zapósłanc Krajneho sejma Braniborskeje dr. Gerd-Rüdiger Hoffmann, je frakcija SPD tomu zadźěwała, zo bychu přitomnym čłonce Rady za naležnosće Serbow Uće Henšelowej, Mětej Nowakej z přisłušneho ministerstwa w Podstupimje a społnomócnjenej za serbske naležnosće wokrjesa Hornje Błóta-Łužica Waltraudźe Ramotowej prawo rěčenja přizwolili.
