Fachowa komisija so na nowostart dojednała
Hornja Łužica (UM/SN). Hornja Łužica móhła so při pytanju za kónčnym składźišćom atomowych wotpadkow zaso bóle do fokusa dóstać. Fachowa komisija, kotraž bu wot zwjazkoweho knježerstwa zasadźena, nětko w swojej kónčnej rozprawje na to skedźbnja, zo nimo sele a hliny tež kristalinowu kamjeniznu, ke kotrymž słuša granodiorit, do rozmyslowanjow zapřijima. Granit je kamjenizna, kotruž mamy wosebje tež w Hornjej Łužicy, w serbskim sydlenskim rumje.
Kotre žadanja měło kónčne składźišćo za wotpadki milinoweje produkcije z atomoweje energije spjelnjeć? Z tymle prašenjom so fachowcy hižo lětdźesatki zaběraja. Tak dyrbja maćizny zaručić wěstotu, zo za milion lět žana radioaktiwita do wokoliny njewustupi. Po rozprawje komisije měli so tuž sól, hlina a kristalinowa kamjenizna, wosebje pak granodiorit, runohódnje do rozmyslowanjow zapřijeć.