Diskusija wo zastupnistwje serbskeho ludu hižo lětdźesatki traje a budźe zawěsće tež přichodne lěta dale aktualna
Korporacija zjawneho prawa by najkmańša juristiska struktura – fachowcy rěča tež wo „wosobje“ – była, kotraž Serbam kulturnu awtonomiju zaruča. Wot lěta 1990 je prawidłownje rěč wo wutworjenju tajkeje korporacije, dotal bjez konkretnych wuslědkow.
Wulka lěpšina mjenowaneho modela je, zo zmóžnja statne zrěčenje mjez „serbskim ludom, Zwjazkowej republiku Němskej kaž tež zwjazkowymaj krajomaj Braniborskej a Sakskej“, kaž Serbski sejm wotpowědny naćisk mjenuje. Na zakładźe wobstejacych dojednanjow z wulkimaj cyrkwjomaj bě jón wuběrk „Wustawa a prawo“ zdźěłał. Wuraznje wobhladuja jón jako tezowu papjeru a wuchadźišćo za wobšěrnu debatu. Prěni krok tohole diskursa bě seminar „Serbske samopostajowanje w Sakskej“, kotryž bu kónc nowembra online wuhotowany.
Nazhonity a renoměrowany fachowc z hosćom