E-awta zaměrnišo spěchować
Zwjazkowa centrala přetrjebarjow žada sej nowe wusměrjenje
Berlin (dpa/SN). Na dróhach Němskeje měło přichodnje wjele wjace elektroawtow jězdźić – a to tež dale z pjenježnej podpěru stata. Nowa amplowa koalicija SPD, FDP a Zelenych pak chcyła spěchowanje tajkich wozydłow bóle na klimowe zaměry wusměrić. Centrala přetrjebarjow žada sej w tym zwisku zaměrniše powabki, zo bychu sej ludźo e-awto kupili. „Bych sej jasnu kročel zwjazkoweho knježerstwa přał“, rjekny šef wšoněmskeho zwjazka přetrjebarskich centralow Klaus Müller powěsćerni dpa. Tež pola syće stacijow za nabiwanje jězdźidłow měli wjace činić. Müller rjekny: „Stat njetrjeba kóžde luksusowe awto spěchować, byrnjež elektriske było.“ Premije za kup tajkich awtow měli so jenož hišće wupłaćić, je-li wóz tuńši hač 40 000 eurow, tuchwilu płaći hornja mjeza 65 000 eurow za zakładny model. „Trjebamy nuznje fungowace wiki trjebanych elektroawtow. To měli wosebje małe a srěnje modele być.“ Mnozy su na trjebane wozy pokazani, dokelž njemóža sej nowy dowolić.
Kriza jako šansa
To a tamne (04.01.22)
Wopak parkowane awto z traktorom preč storčił je muž w bayerskim Garmisch-Partenkirchenje. Wosobowy wóz so při tym wospjet přećisny a je dospołnje skóncowany. Hněwny wobydler bě jón přez blisku dróhu na parkowanišćo storčił. Dalši wobydler na třěše ležace awto wuhlada a wołaše policiju, tukajo na wobchadne njezbožo. Policija zawinowarja spěšnje namaka a přizjewi jeho wěcneho wobškodźenja dla.
Wjewjerčku z nuzy wuswobodźili su wohnjowi wobornicy w Drježdźanach. Wona bě nowe lěto z woknom do bydlenja zalězła a za wulkim kamorom tčacy wostała. Wobydlerjo njezamóchu ju wuhnać. Po tym zo běchu kameradojo kamor wurumowali a dźěru do zadnjeje sćěny wurězali, móžachu zatłusnjenu wjewjerčku skónčnje wuswobodźić. A njezranjene zwěrjo móžeše na swobodu.
Bamža poćežuje spad porodow
Vatikan (B/SN). Druhi hodowny swjaty dźeń, swjateje swójby, je při składnosći tradicionalneho modlenja Jandźelknjeza na Pětrowym naměsće w Romje bamž Franciskus wobžarował: „Wjele mandźelstwow nochce žane abo jenož jedne dźěćo měć. To je tragedija.“ Nimo toho wobroći so bamž z listom na mandźelstwa po cyłym swěće, w kotrymž potwjerdźi, zo trjebaja dźěći wěstotu, kotraž jim pomha dowěru k swojim staršim měć. Pontifeks pokaza zrozumjenje za přiwótřene połoženje swójbow w času pandemije a přeje sej, zo wostanje swójba „městnosć schadźowanja a zrozumjenja“. Loni w měrcu pod nawodom Vatikanskeho swójbneho zarjada zahajene lěto „Amoris-laetitia“ (lěto swójby) na swětowym zetkanju swójbow z bamžom w juniju w Romje zakónča.
K smjerći arcybiskopa
Dźěći zaso w šuli wuknu
Berlin (dpa/SN). Najebać starosće koronawirusa dla su dźensa we wjacorych zwjazkowych krajach po zakónčenju hodownych prózdnin zaso wučbu w šulach zahajili. Byrnjež dokładny rozměr noweje warianty omikron hišće znaty njebył, su so šulerki a šulerjo w Braniborskej, Berlinje, Sakskej, Mecklenburgsko-Předpomorskej a Porynsko-Pfalcy do prezencneje wučby wróćili. W Durinskej je wona dźensa a jutře hišće distancna. Srjedu chcedźa tam rozsudźić, kak ma potom dale hić.
Razniše naprawy na sewjeru
Kiel (dpa/SN). W Schleswigsko-Holsteinskej płaća razniše škitne naprawy koronawirusoweje warianty omikrona dla. Wot jutřišeho je ličba wobdźělnikow na zarjadowanjach na 50 wosobow nutřka a sto pod hołym njebjom wobmjezowana, dotal bě jich najwjace tysac. Kontaktne wobmjezowanje za šćěpjenych a wustrowjenych na najwjace dźesać wosobow njepłaći jenož nutřka, ale tež w zjawnym rumje.
Biden přilubja Ukrainje pomoc
Wot spočatka noweho lěta wučinja popłatk za wustork wuhlikoweho ...
Chcedźa „stopy za zakonje“ wutworić
Berlin (dpa/SN). Wotnětka maja w němskej stolicy tak mjenowany Lobbyjowy register. Do njeho maja so profesionalni zastupnicy a profesionalne zastupniče zajimow hač do kónca februara zapisać, informacije wo jich nadawkarjach a nadawkarkach podać kaž tež k jich nadawkam w zwjazkowym sejmje a při zwjazkowym knježerstwje. Zdobom su lobbyisća/lobbyistki winowaći/winowate, so po kodeksu měć, kotrehož ranjenje chłostaja z hač do 50 000 eurami.
Lauterbach: Nowe naprawy trěbne
Berlin (dpa/SN). Zwjazkowy minister za strowotnistwo Karl Lauterbach (SPD) liči ze spěšnymi rozsudami nastupajo skrótšenje časa karanteny při infekcijach z koronawirusom. W boju přećiwo dalšemu rozšěrjenju žołmy warianty omikron wočakuje wón přichodny pjatk „na kóždy pad nowe wobzamknjenja“, rjekny Lauterbach sćelakej RTL. Rozrisać chcedźa mjez druhim prašenje, w kajkej měrje móhli třeći króć šćěpjenym karantenu spušćić, kaž bě to njedawno bayerski minister za strowotnistwo Klaus Holetschek (CSU) namjetował.
Zastupnicy Zwjazka a zwjazkowych krajow chcedźa so 7. januara na internetnej konferency schadźować, zo bychu wo dalšej strategiji wuradźowali. Lauterbach je w tym zwisku potwjerdźił, zo „hladajo na rozšěrjenje warianty omikron čas chwata. Změjemy wjele infekcijow, a te potom wjele nješćěpjenych trjechja, kotřiž njejsu škitani. Tohodla so w tym nastupanju jara starosću.“
Atom spěchować abo nic?
Namjet komisije EU zakład nowych diskusijow w amplowej koaliciji
Berlin (dpa/SN). Po wjele diskutowanym namjeće komisije EU nastupajo indirektne spěchowanje modernych atomowych a płunowych milinarnjow rěka prašenje, kak nowe zwjazkowe knježerstwo SPD, FDP a Zelenych z nim wobchadźa. „Namjet EU chcemy spěšnje pruwować a so w zwjazkowym knježerstwje wothłosować“, rjekny ministerka za wobswět Steffi Lemke nowinarjam. Wona bě plany komisije nastupajo atomowu technologiju hižo kónc tydźenja raznje kritizowała, runje tak kaž minister za hospodarstwo a škit klimy Robert Habeck (wobaj ze strony Zelenych).
„Komisija EU zbudźa wulki strach, zo do přichoda kmane a dołhodobne inwesticije na dobro atomoweje technologije blokuje a wobškodźi“, Lemke wuzběhny. „Tež zemski płun mam dale za dwělomny.“ Financny minister a předsyda FDP Christian Lindner so porno tomu zasadnje pozitiwnje k namjetej komisije EU nastupajo moderne płunowe milinarnje wupraja.
To a tamne (03.01.22)
Dwanaćelětny hólc w Halle je silwesterski wječor swojeho wopiteho nana z awtom domoj dowjezł. Muž bě po informacijach policije wokoło 20 hodź. doma zazwonił a wo to prosył, zo jeho něchtó wotewza, dokelž bě alkohol pił. To je dwanaćelětny po słowje wzał a sydny so za wodźidło nanoweho awta. Swědk, kiž bě w nim wobeju wuhladał, zawoła policiju, kotraž jeju doma na zbožo stroweju zetka.
Z prózdnym tankom a chětro natutkanaj staj mužej njedaloko Regensburga spytałoj awto z awtodróhi ćišćeć. Zastojnicy zwěsćichu pola kóždeho z njeju 2,5 promilow alkohola w kreji. Jako wonaj twjerdźeštaj, zo je tón tamny jěł, dyrbještaj wobaj krej wotedać. Pjanaj mužej reagowaštaj panisce, jako wuhladaštaj sykawu, dokelž měještaj ju za šćěpjenje přećiwo koronawirusej. Jězbnu dowolnosć ani tón jedyn ani tón tamny njeměješe.
