Třělacy duchowni su na Cypernskej kupje rozdźělne reakcije wubudźili. Prawosławne biskopstwo Konstantia na juhowuchodźe kraja bě na swojej internetnej stronje fota a wideja wozjewiło, na kotrychž su duchowni na zwučowanišću cypernskeje narodneje gardy widźeć, wužiwajo mašinske třělby a pistole. Rěčnik biskopstwa rjekny, zo chcychu so mužojo na swój čas we wójsku dopominać. Zwjazk duchownych rěčeše porno tomu wo „dospołnje wopačnym signalu“.

Po šěsć lětach je so mužej w Indoneziskej poradźiło, krokodila wot wobruče wuswobodźić, kotrež zwěrjo wokoło šije nošeše. Do toho běchu samo wukrajni fachowcy z pospytom zwrěšćili, reptil popadnyć a jemu ćežu wotewzać. Nětko je so 35lětnemu z Javy poradźiło, zwěrjo z picu z wody wabić, je sputać a wobruč přerězać. Krokodil je zaso swobodny.

Bratislava (dpa/SN). Tumulty a namócnosće su wčerawšu debatu słowakskeho parlamenta wo wojerskim zrěčenju z USA přewodźeli. Hižo na spočatku blokowachu prawicarscy zapósłancy rěčniski pult, tak zo njemóžeše zakitowanski minister Jaroslav Naď rěčeć. Wospjet dyrbjachu posedźenje hary dla přetorhnyć. Dźensa chcychu wo zrěčenju rozsudźić, kotrež zmóžnja USA, swoju wojersku prezencu w kraju wutwarić a wojerskej lětanišći Sliač a Kuchyňa wutwarić. Opozicija tole raznje wotpokazuje.

Njewočakuja přećeženje

Berlina (dpa/SN). Němska towaršnosć chorownjow z toho wuchadźa, zo chorownje žołmu wirusa omikron derje zmištruja. „Njeliču přichodne tydźenje wjace z přećeženjom strowotnistwa“, rjekny šef předsydstwa Gerald Gaß nowinarjam. Tuchwilne škitne naprawy su „jasnje k tomu přinošowali, zo njeje žołma tak mócna kaž wočakowane“. Budźe-li wjeršk srjedź měsaca docpěty, su wolóženja bjeze wšeho móžne, wón rjekny.

Wulkopósłanča wobkrućena