Moskwa/Berlin (dpa/SN). Po swojim krótkowopyće w Kijewje je zwjazkowy kancler Olaf Scholz (SPD) dźensa ze swojimi prócowanjemi wo wottwar napjatosćow w krizy na Ukrainje w Moskwje pokročował. Tam wočakowaše jeho ruski prezident Wladimir Putin na dlěšu rozmołwu, za kotruž su po informacijach Krjemla wjacore hodźiny zaplanowali. Formelnje jedna so wo nastupny wopyt Scholza w času, w kotrymž su němsko-ruske poćahi tak špatne kaž hižo dołho nic.

Zwjazkowy kancler bě wčera w Kijewje potwjerdźił, zo chcył so pola Wladimira Putina za wotputanje krizy zasadźeć.

Jězba Scholza wotměwa so před pozadkom spekulacijow ze stron USA wo móžnym ruskim nadpadźe na Ukrainu hišće tutón tydźeń. Američenjo běchu wčera připowědźili, zo přepołoža personal wulkopósłanstwa ze stolicy Kijewa do Lwowa blisko mjezy k Pólskej. Mjeztym je Ruska wospjet potwjerdźiła, zo žadyn wojerski nadpad na Ukrainu njeplanuje.

Z napjatosću wočakuja podpěru zapósłancow CDU/CSU za předsydu

Berlin (dpa/SN). Frakcija unije w zwjazkowym sejmje chcyše dźensa předsydu CDU Friedricha Merza za noweho nawodu wuzwolić. Zo Merz wjetšinu hłosow wšěch 197 zapósłancow CDU a CSU dóstanje, je tak derje kaž wěste. Z wulkej napjatosću přiwšěm wočakuja, kak sylna podpěra na dobro 66lětneho hospodarskeho politikarja w frakciji woprawdźe je. Merz bě w lětach 2000 do 2002 hižo raz předsyda frakcije unije. W lěće 2009 so wón na dobro karjery w hospodarstwje ze zwjazkoweho sejma wróćo sćahny a je hakle po wólbach zwjazkoweho sejma 2021 zaso do parlamenta zaćahnył.

Předsyda krajneje skupiny CSU Alexander Dobrindt chcyše Merza za naslědnika dotalneho frakciskeho předsydy Ralpha Brinkhausa (CDU) namjetować. Po informacijach CSU stanje so to w nadawku a po dorěči ze stronskim předsydu Markusom Söderom, kiž wostanje debaty wo koronapolitice dla w Mnichowskim krajnym sejmje. „Njejsym nawoda opozicije, to budźe Friedrich Merz“, je ­Söder njedawno nowinarjam rjekł.

Ze 60 lětami zapozdźenja je wužiwar biblioteki w sewjerorynsko-westfalskim Mönchengladbachu wupožčenu knihu wróćił. Wona ležeše w pakćiku z južneje Francoskeje – zhromadnje z dwustronskim rukopisnym zamołwjenjom. Mjeztym 81lětny wupožčowar prosy w swojim lisće „tysac króć wo wodaće“. Jedna so wo knihu Friedricha Engelsa z lěta 1883. Titul móžachu nětko z dołheje lisćiny zhubjenych knihow šmórnyć.

40 lět z falšowanej jězbnej dowolnosću po puću był je muž w Osnabrücku. Wobšudnistwo so wukopa, jako chcychu lěta 1982 wupisany papjerjany dokument na po wšej EU płaćiwu plastikowu kartku zaměnić. Sobudźěłaćerjej zarjada za jězbne dowolnosće napadny, zo drje bě formular originalny, kołki a podpisma pak běchu falšowane. Wobsedźerjej hrozy jednanje falšowanja dokumentow dla.