Z wudaća: póndźela, 20 februara 2017

Do policajskeho awta prasnył je muž při wobchadnej kontroli w Zwickauwje. Jako chcychu 31lětneho kontrolować, je tón njejapcy na płunowy pedal stłóčił a do awta policistow zrazył. Na to so wukopa, čehodla bě muž tak nuzne měł: Wón steješe pod wliwom drogow a njeměješe jězbnu dowolnosć, awto njebě přizjewjene a měješe pokradnjene čisłowe taflički. Nimo toho namaka policija w jězdźidle tež hišće drogi a 31lětneho zaja.

Z wotmachom po myjerni awtow jěła je 84lětna žona w delnjosakskim Hollenstedće. Wona pak wosta njezranjena a dźě­še po njezbožu ze swojim rolatorom domoj. Staruška bě sobotu z wulkej spěšnosću do myjernje zjěła a něhdźe 90 000 eurow škody zawostajiła. Policija na to tuka, zo je prosće płunowy pedal a borzdźidło zaměniła.

Mnichow (dpa/K/SN). Za wuchodnu Ukrainu, w kotrejž dochadźa přeco zaso k wojowanjam mjez wójskom knježerstwa a proruskimi mocami, ma so přiměr znowa docpěć. Wonkownaj ministraj Ruskeje a Ukrainy, Sergej Lawrow a Pawel Klimkin, staj składnostnje swojeho zetkanja w Mnichowje wotpowědne dojednanje wobkrućiłoj. Zdobom zwyša Ruska ćišć na Ukrainu. Přichodnje chce wona připóznać pasy a druhe wupokazy wustajene wot separatistow Donjecka a Luganska. Z nimi móhli wobydlerjo tychle kónčin bjez wizuma do Ruskeje pućować. Ukrainske knježerstwo naprawu zasudźa a rěči wo zranjenju dojednanjow w Minšćanskim měrowym planje.

Bratislava (dpa/K/SN). Słowakski ministerski prezident Robert Fico je přetrał wotum njedowěry. Powěsćernja TASR, rozprawja, zo bě na kóncu schadźowanja parlamenta jenož hišće 130 zapósłancow přitomnych, z kotrychž je 60 za wotsadźenje premiera hłosowało. Šło je w dwanaće hodźin trajacej debaće předewšěm wo spochi stupace płaćizny miliny, štož wuskutkuje so na njedobro pjeć milionow wobydlerjow kraja. Při tym bě Fico loni přilubił, zo so elektrika potuńši. Debata je sčasami wichorojta była. Opoziciji Fico wutykowaše, zo dźe jej „jenož wo chaos a destrukciju“. Premier dyrbješe sej wumjetowanje lubić dać, zo „ludnosć wobšudźa“.

Wulki bratr z dalokeho zapada trjeba jenož porst zběhnyć, a hižo su němscy politikarjo jara posłušni. Tak so zda. Zwjazkowa zakitowanska ministerka von der Leyen a zwjazkowa kanclerka Merkel zakitowaštej minjeny tydźeń plany čehodla měła Němska swoje wudawki za brónjenje na wonej dwaj procentaj tukrajneho bruttoprodukta zwyšić. Za tři procenty pledowaše samo zwjazkowy prezident Gauck w swojej narěči na Mnichowskej wěstotnej konferency, kotruž njeje chorosće dla sam dźeržeć móhł. Chce wón znowa preferowanje wojerskeho wottrašenja kaž w 1970­tych lětach w napřemobrónjenju mjez NATO a Waršawskim paktom? Hižo tehdy su wone tři procenty rólu hrali.

Němscy politikarjo wušiknje wustupuja a móža sej přihłosowanja wjetšiny němskeje ludnosće wěsći być, dokelž ta poprawne pozadki lědma spóznawa. To prosće wostrózbja. Axel Arlt

Čěska narodna banka chce kurs króny porno euru zwyšić

Praha (HJS/SN). Češa móža wyskać: Kurs domoródneje króny porno euru budźe w aprylu abo meji přiběrać, wot nětko 27 na potom jenož hišće 25 krónow. Nowy šef Praskeje narodneje banki Jiří Rusnok je ministerskemu prezidentej Bohuslavej Sobotce wobkrućił, zo jeho dom z wot lěta 2013 trajacym kumštnym wosłabjenjom čěskeje měny přestanje. Tole běchu jeho předchadnicy zawjedli, zo bychu hrožacej deflaciji zadźěwali, konjunkturu wožiwili a čěskim eksportowacym předewzaćam pomhali. Čěska je wot eksporta runje tak wotwisna kaž Němske hospodarstwo.

Mjeztym zo so čěske produkty wot toho časa na swětowych wikach lěpje předawachu, dyrbjachu „normalni“ Češa za dowol w europasmje wjace zapłaćić. Škodowki so kaž ćopłe całty předawachu, dowol w Italskej pak móžachu sej jeno ći dowolić, kotřiž derje zasłužachu. Tole ma přichodnje nimo być. Narodna banka přihotuje w dorěčenju z knježerstwom w Praze wobydlerjam perfektny wólbnobojowy dar. W susodnym kraju wuzwola – runje tak kaž w Němskej – lětsa nazymu nowy parlament.

Berlin (dpa/SN). Kanclerski kandidat SPD Martin Schulz chcył po informacijach medijow Agendu 2010 korigować. Mjez druhim so wón za to zasadźa, podlěšić dobu, w kotrejž so ludźom bjezdźěłnostny pjenjez I wupłaći. Tuchwilu dóstawaja bjezdźěłni pod 50 lětami maksimalnje dwanaće měsacow bjezdźěłnostny pjenjez, staršim přijimarjam płaća jón hač do 24 měsacow. „Hdyž něchtó z 50 lětami po 15 měsacach bjezdźěłnosće hižo Hartz IV dóstawa, dźe to na eksistencu“, rjekny Schulz nowinarjam Bild. Hladajo na Agendu 2010 bywšeho knježerstwa SPD a Zelenych wón praji, „zo njejsu zmylki nječestne. Hdyž pak su woči­­widne, měli so wone korigować.“ Schulz chce swoje plany přichodnje konkreti­zować.

Waršawa (dpa/SN). Tydźeń po wobchadnym njezbožu z jeje słužbnym awtom su pólsku ministersku prezidentku Beatu Szydło z chorownje pušćili. Hižo jutře chce wona posedźenje ministerskeje rady nawjedować. Jeje pancerowany Audi bě pjatk tydźenja w Oświęcimje, hdźež Szydło bydli, z małym awtom koliděrował a po tym frontalnje do štoma zrazył. Szydło so při tym zrani. Po informacijach medijow bě wona naraženja wěstotneho pasa dla poćerpjeła a sej rjebło złamała. Z helikopterom dowjezechu politikarku knježaceje strony Prawo a sprawnosć do Waršawskeje wojerskeje chorownje.

Winu na njezbožu, při kotrymž so tež šofer a wosobinski stražnik premierki zraništaj, dawa knježerstwo 21lětnemu šoferej Fiata Seicento. Tón wšak to wotpokazuje a dóstawa podpěru wot politikarjow opozicije. Woni wumjetuja šoferej Audija pobrachowace nazhonjenja z wulkim a ćežkim awtom. 21lětny muž nazhonja mjeztym wjele solidarity: Ludźo su za njeho dotal 32 000 eurow za nowe awto nazběrali.

Sobudźěłaćerjo zaměroweho zwjazka za škit wody a pódy Horni kraj Kalawa, kotryž ma swoje hłowne sydło w błótowskim Radušu, su tele dny započeli błóto z Chmjelowskeje hrjebje njedaloko Noweho puća w Nowym Chmjelowje (Neu-Schmellwitz) na kromje Choćebuza wubagrować. Naprawu přewjeduja w dorěčenju ze zamołwitymi přirodoškita, zo njeby sensibelny system rostlin a zwěrjatow w kónčinje škodu poćerpjeł. Foto: Michael Helbig

Moskwa (ČŽ/K). Józef W. Stalin je najebać swoje złóstnistwa dźensa w Ruskej popularniši hač před dźesać lětami. Hdyž bě lěta 2006 za njeho „horliwosć“, „česćownosć“ a „sympatije“ runje 37 procentow woprašanych začuwało, je to nětko 46 procentow. Historiski maksimum to za tónle časowy wotrězk. Tole zdźěla powěsćernja ČTK, powołaca so na wuslědki zwěsćowanja ruskeho njewotwisneho srjedźišća Lewada. W minjenych dźesać lětach je tež popularnosć Leonida Brježnjewa a Wladimira Putina přibyła – Brježnjewowa zrosće z 39 na 47 procentow, Putinowa ze 76 na 83. Něhdyši generalni sekretarajo Nikita Chrušćow, Boris Jelcin a Michail Gorbačow, kotřiž běchu spytali chromjacy socialistiski system tak a hinak „sporjedźeć“, su porno tomu najmjenje woblubowani. Z dalšeho woprašowanja ruskeje institucije wuchadźa, zo ma nimale třećina Rusow za to, zo je žiwjenje w Ruskej nětkole w Putinowym času najlěpše zašłych sto lět. 29 procentow posudźa „lěta“ Brježnjewoweho knjejstwa jako „idealny čas“, byrnjež w nim k stagnaciji dóšło, kotraž wjedźeše naposledk k rozpadej Sowjetskeho zwjazka.

SJ Njebjelčicy

– LSV Hory II 2:3 (0:1)

Zestawa domjacych: Ričel – Hahn, Zeller, Lejnart, Kral, Hübental, Hanuza, Šram, Korjeńk, Janca, Dubaw, Hommel, Mjechela, Čornak, Hoelzel

Swoju druhu přihotowansku hru mějachu koparjo Njebjelčanskeje SJ znowa na kumštnym trawniku Kamjenskeho sportoweho kompleksa. Tónkróć rěkaše hósć LSV Hory II. Njebjelčanska trenarska dwójka bě znowa nuzowana někotrych aktiwnych z druheho zastupnistwa sobu zapřijeć. Zwjeselace pak bě, zo je so dołholětny kapitan Chrystof Dubaw po dlěšej přestawce zaso cyłkej přidružił. Spěšne a direktne hraće hosći Njebjelčanam tak prawje njetyješe. Šansow bě mało, a tak hósć do přestawki po jědnatce nawjedowaše (42.).