Washington/Moskwa (dpa/SN). Ruske wojerske lětadło a wuskušowanske lětadło USA stej sej nad Baltiskim morjom jara strašnje blisko přišłoj. Wobě mašinje měještej runje hišće wotstawk połdra metra, kaž medije USA rozprawjeja.
Ruske zakitowanske ministerstwo je podawk wobkrućiło, dawajo ameriskemu pilotej winu. Tón bě so prowokatiwnje zadźeržał a wotpohladnje do směra na ruske lětadło lećał. Dźesać mjeńšin pozdźišo su dalše wuskušowanske lětadło USA wotpopadnyli a přewodźeli.
Zakitowanske ministerstwo USA argumentuje, zo bě lětadło USA w mjezynarodnym powětrowym rumje. „Pilot njeje ničo činił, štož by podawk zawiniło“, zdźěli rěčnica Pentagona. Ruske lětadło bě so na tajki snadny wotstawk zbližiło, we Washingtonje twjerdźa.
Berlin (dpa/SN). Nahladnosć socialdemokratow mjez wolerjemi dale woteběra. Po dźensa wozjewjenym „wólbnym trendźe Stern-RTL“ je SPD porno minjenemu tydźenjej dalši procent přisadźiła a na 23 procentow spadnyła. Tak leži nětko zaso na niwowje, kotryž měješe wona do nominowanja Martina Schulza za kanclerskeho kandidata socialdemokratow kónc januara. Porno tomu móžeše so lěhwo CDU/CSU wo procent na nětko 39 procentow polěpšić.
Přidobywši dwaj procentaj je Lěwica z dźesać procentami nětko samo dwucyfrowa. Tak by třeća najsylniša móc w zwjazkowym sejmje była. FDP a Zeleni maja po wosom procentach, AfD kaž minjene tydźenje sydom procentow.
W direktnym přirunowanju ze zwjazkowej kanclerku Angelu Merkel (CDU) dyrbi Schulz dalše straty na so brać. Móhli-li ludźo kanclera direktnje wolić by 53 procentow Angelu Merkel woliło, Martina Schulza jenož 22.
Choćebuz (SN). Kak hodźa so zwiski mjez braniborskimi a ruskimi předewzaćemi nawjazać a pohłubšić? Tele prašenje steješe w srjedźišću južnobraniborskeje hospodarskeje delegacije z 35 wobdźělnikami, kotřiž přebywachu wot 13. do 19. junuja w Ruskej. Tak pobychu zastupjerjo Industrijneje a wikowanskeje komory (IHK) Choćebuz mjez druhim w Pětrohrodźe a w regionje Kursk. Spěchowałoj běštej wuprawu braniborske ministerstwo za hospodarstwo a energiju kaž tež Europska unija. Wuslědki zetkanjow a rozmołwow su wčera w Choćebuzu předstajili.
Telko je tak derje kaž wěste – Bohuslav Sobotka je so hordoznje „woprował“. W politice so wuznawajo njeje wón přewidźał, zo wótry wichor z njepřestajneho spada nahladnosće stronsku łódź ČSSD hrozy powalić, a bywajo jeje kapitan za wuchownu kótwicu měł, z komandownju woteńć – hinak hač na prawej łódźi – jako prěni. Na to je čěska socialdemokratija skoku – zo by so na kurs nowych wuspěchow nastajiła – zjězd přewjedła. Personaliju sporjedźa tak, zo nutřkowneho ministra Milana Chovaneca staji na čoło strony a wonkownemu ministrej Lubomírej Zaorálekej nada funkciju managera winowcowych wólbow. Wobsahowje wupječe tež hnydom „wólbny program“, nic pak někajki – na 35 stronach napjelni jón z lutymi „wabjakami“ wolerjow. Tak načinja jim słódkeje huby z lubjenjom, w běhu přichodnych pjeć lět přerěznu mzdu zwyšić z nětko 28 000 na zboha 40 000 krónow (k přirunanju: wot lěta 2012 do 2017 bě přerězna mzda runje ze 24 000 na 28 000 krónow zlězła). Dźěławym kiwa program k tomu ze zniženjom dawkow po miliardach.
Z alternatiwnym konceptom měł kanadiski koncern Bombardier stejnišći w Budyšinje a Zhorjelcu zdźeržeć, skrućić a za přichod zawěsćić. Hižo 19. meje wuprajichu so za to zastupjerjo dźěłarnistwa IG metal, dźěłopřijimarjow a dźěłodawarjow. „Nowa koncepcija spřećiwja so planam koncerna, po kotrychž ma so Zhorjelske stejnišćo zawrěć“, zdźěli prěni społnomócnjeny IG metal wuchodneje Sakskeje Jan Otto po rozmołwje ze zwjazkowej hospodarskej ministerku Brigittu Zypries (SPD), kotraž bě na přeprošenje zapósłanca zwjazkoweho sejma Thomasa Jurka (SPD) minjeny štwórtk do Łužicy přijěła. Mjez druhim wopyta wona Hamorsku milinarnju. Při Bjerwałdskim jězoru zhoni wo turistiskim koncepće. Nimo toho wobdźěli so na rozmołwje z Łužiskim kruhom. Połhodźinska debata ze zawodnymaj radomaj łužiskeju stejnišćow Bombardiera bě tuž jedyn z dalšich wažnych dypkow.
Strach wobsteji, zo Zhorjelski zawod zawru
Carny Gózd (Schwarzheide) wuwiwa so k ćežišću za tak mjenowanu outlet-předań wulkich modowych předewzaćow. Tež Nike je so na kromje Łužicy zasydlił.
Praha ma jedyn, Lipsk tohorunja a Berlin samo štyri: Tak mjenowane zawodowe wobchody ameriskeho zhotowjerja za sportowe artikle Nike, kotryž produkuje twory a je potuńšene w fabrice předawa, so wulce rozšěrjeja. Nětko přisłuša Carny Gózd k městnam, hdźež so tajki outlet-store jewi.
Hrajna doba w kopańcy 2016/2017 je we wjetšinje ligow a klasow zakónčena. Tam je tež wěste, štó smě postupić a štó dyrbi zestupić. To rěka, ći jedni so wjesela a swjeća, ći tamni su zrudni a pytaja tróšt. Tule někotre mysle sportoweho rozprawjerja Ludwiga Zahrodnika
Kak wupada za serbske mustwa muži?
Koparjo Chróšćanskeje SJ su po prěnim lěće w krajnej klasy dosć derje wobstali. Po štyrjoch poražkach za sobu wupadaše to spočatnje skerje za debaklom, tola poněčim su so zhrabali, stopnjowali a předewšěm přećiwo načolnym mustwam wuběrnje hrali a dypki zběrali. Druhe zastupnistwo SJC je sej samo druhe městno w tabulce wuwojowało.
To samsne płaći za koparjow Sokoła Ralbicy/Hórki. Byrnjež tež woni we wokrjesnej wyšej lize zdźěla njewobstajnje hrali, je mustwo w druhej połseriji dypk po dypku hromadźiło a sej ze zdźěla wysokimi dobyćemi druhe městno w tabulce zawěsćiło. Wjeršk bě zawěsće zakitowanje pokala přećiwo ST Rakecam. Bohužel lětsa pola rezerwy Sokoła scyła njeběžeše, wo čimž swědči poslednje městno w tabulce.