Najebać kyriliske pismiki móhli němscy přiwisnicy kopańcy na Confed-cupje w Ruskej wjace rozumić, hač je jim wědome. Mnohe němske słowa dźě maja hižo lětstotki krute městno w ruskej rěči. Powěsćernja dpa mjenuje za to přikłady kaž landschafty, buterbrody, parikmacher, jarmarka, schlagbaum, wachtjor, fejerwerk abo rejs.
37lětna samodruha je swojeho ćěšenka njewočakowano, ale bjez komplikacijow w awće na zwjazkowej dróze B 217 blisko delnjosakskeho Hamelna porodźiła. Z mandźelskim bě wona po puću do porodźernje. Při tym je dźěćko porika spěšnišo na swět chcyło, hač staj sej to mysliłoj. Dokelž bě nan doma handy zabył, zadźerža wón w swojej nuzy awto z módrej swěcu na třěše, w kotrymž pak njesedźeše nuzowy lěkar. Krótko na to wšak so „baby B 217“ narodźi.
Brüssel (dpa/SN). Do swojeho prěnjeho wobdźělenja na wjerškowym zetkanju Europskeje unije je francoski prezident Emmanuel Macron Němsku namołwił, zhromadnje z Francoskej „aliancu dowěry“ wutworić a wozrodźenje europskeje ideje nastorčić. „Přeju sej, zo wróćimy so k duchej kooperacije, kajkiž knježeše swój čas mjez Françoisom Mitterandom a Helmutom Kohlom“, rjekny 39lětny Macron němskim nowinarjam do wjerška EU, kotryž wotměwa so dźensa a jutře w stolicy Belgiskeje Brüsselu.
Francoski premier warnuje před rozpadom EU. Wón kritizuje Pólsku a Madźarsku, bjez toho zo by jej wuraznje mjenował. „Někotři politiscy nawodźa wuchodneje Europy“ napřećo Europskej uniji cynisce postupuja. Woni rozdźěleja pjenjezy EU, bjez toho zo bychu hódnoty Europskeje unije respektowali. „Europa njeje žana kupnica. Europa je dóńtowe zjednoćenstwo“, wón praji.
Je to prěni wjeršk EU, na kotrymž so Emmanuel Macron wobdźěla. W srjedźišću steja prašenja wěstoty, zakitowanja a brexita. Tež swobodne wikowanje a škit klimy chcedźa wobjednawać.
Moskwa (dpa/SN). Po wukazanju nowych sankcijow ze stron USA přećiwo Ruskej krizy na Ukrainje dla je Moskwa wažne rozmołwy wobeju wonkowneju ministerstwow wotprajiła. Poprawom chcyše so ruski zastupowacy wonkowny minister Sergej Rjabkow dźensa ze zastupowacym wonkownym ministrom Thomasom Shannonom zetkać. „Nowe sankcije USA k dalšim rozmołwam a k dialogej njepřeprošeja“, rjekny Rjabkow po informacijach ministerstwa wčera w Moskwje.
USA rozsud Ruskeje wobžaruja. „Je nam žel, zo je so rozsudźiła so móžnosće wzdać, dorozjimać bilateralne zadźěwki, kotrež rusko-ameriske poćahi haća“, praji rěčnica wonkowneho ministerstwa we Washingtonje.
Wonkownaj ministraj Ruskeje a USA, Sergej Lawrow a Rex Tillerson, běštaj so na konsultacije dojednałoj, zo móhli wulku ličbu problemow w rusko-ameriskich poćach wobjednawać. Nowe sankcije Zjednoćenych statow Ameriki běchu politiski dar ukrainskemu prezidentej Petrej Porošenkej na toho njedawnym wopyće USA, Rjabkow rjekny.
Hamor (AK/SN). Zaměrowy zwjazk Łužiska jězorina Sakskeje chce Hórnikečanski jězor a Košynski nasyp dale wuwiwać. Za to dadźa tuchwilu zaměrnje masterskej planaj zdźěłać. „Trjebamy nuznje ramik jednanja za dalše wuwiće“, rjekny zastupowacy předsyda zaměroweho zwjazka Dietmar Koark minjenu wutoru na zhromadźiznje w Hamorje. Tam su radźićeljo zwjazka směrnicy jednohłósnje schwalili. „Masterski plan Košynski nasyp“ ma inženjerski běrow Neuland z Wopakeje zdźěłać. Za to zaplanuja 31 000 eurow. Zaměrowy zwjazk přewozmje 8 000 eurow sumy. Swobodny stat projekt po 75 procentach ze swojeho programa „FR-Regio“ spěchuje, štož wučinja 26 000 eurow. „Za wobaj projektaj dóstanjemy najwyšu sadźbu spěchowanja. Normalnje swobodny stat jeničce 60 procentow přinošuje“, rozłoži Daniel Just, jednaćel zaměroweho zwjazka Łužiska jězorina Sakskeje. „Na zakładźe intensiwnych prócowanjow su nam najwyšu spěchowansku sadźbu přizwolili.“