Z wudaća: štwórtk, 22 junija 2017

Tróšku kuriozne w Pěskecach při ministrantskej kopańcy zašłu sobotu bě, zo steještej pola Chróšćanskich ministrantow na přizjewjenskej lisćinje dekanatneho dušepastyrstwa za dźěći a młodźinu prašakaj, dokelž njebě jasne, hač so woni scyła wobdźěla. Na kóncu Božeje mšě w Pěskečanskej kapałce pak Radworski wosadny farar Beno Jakubaš zwěsći, zo je tam dosć Chróšćanskich hólcow a zo móža wobaj turněraj z cyłkownje dźewjeć mustwami přewjesć. Pola ministrantow 3. do 6. lětnika nastupichu na to štyri cyłki (Chrósćicy, Radwor, Ralbicy a Róžant) w modusu kóždy přećiwo kóždemu, pola koparjow 6. do 8. lětnika samo pjeć (Wotrow, Chrósćicy, Ralbicy/Róžant, Njebjelčicy a Kulow).

Turněrowy nawoda farar Jakubaš měješe hry z pomocnikami (Sabina Lanzyna, Rahel Zelnakec, Tereza Pöpelec a farar Gabriš Nawka) a sudnikami (Guido Zahrodnik, Nico Buša, Matijas Möller a Kilian Hrjehor) kompletnje pod kontrolu, tak zo móžachu po 16 partijach dobyćerjow mytować. Wobaj turněraj dobychu Chróšćanscy ministranća. Jan Hrjehor

LSV Bluń

– ST Radwor 1:2 (1:2)

Zestawa hosći: Wróbl – Henka, Zähr, Omran, von Karwin, Nuk, Zimmermann, Bejmak, Winar, Schulze (81. Buša), Kurjat (69. Wjeńka)

Strach njewjedrow přiběra

Berlin. Riziko njewjedrow dla w běhu wječora tež we Łužicy dale přiběra. Njewjedra traja zdźěla hač do nocy, dokelž nižina Pawoł wot zapada na wuchod přez Němsku ćehnje. Němska wjedrowa słužba warnuje tuž před njewjedrami ze sylnym wichorom, z městnami ze spěšnosću wjace hač 120 km/h. Móžne su krupy z wulkosću hač do třoch centimetrow kaž tež mócne zliwki.

Wusud wozjewjeny

Zhorjelc. W procesu wo rozbuchnjenju w jednym ze Zhorjelskich wjaceswójbnych domow z mortwym dźěsćom a wjacorymi zranjenymi je Zhorjelske krajne sudnistwo zawinowarja dźensa na lěto a šěsć měsacow jastwa zasudźiło. Chłostanje přećiwo 43lětnemu nanej wusadźichu sudnicy na pruwowanski čas.

Archeologow „mobilizowali“

Hradec Králové. Twar awtodróhi pola wuchodočěskeho města Hradec Králové archeologow njewšědnje wužaduje. Woni maja za powostankami wot prawěka hač do rakusko-pruskeje wójny lěta 1866 pytać. Kaž Hradecska uniwersita zdźěli, su nuzneho wurywanja dla samo dwa­ceći wukrajnych archeologow-praktikantow přeprosyli.

Na dźensniše zahajenje 12. mjezynarodneho folklorneho festiwala „Łužica 2017“ su čłonojo egyptowskeje skupiny Art appreciation­ folk dance group z Berlinskeho lětanišća wčera do Budyšina přijěli. Hač do njedźele budźe Budyski hotel Best Western­ Plus jich nowa domizna. Je to prěni raz, zo witamy na festiwalu ćěleso z Egyptowskeje. Foto: SN/Maćij Bulank

Domowina podpěruje wobydlersku iniciatiwu Federalistiskeje unije europskich narodnych mjeńšin Minority SafePack­ wo lěpši škit mjeńšin. Za to je milion podpismow trěbny. Wo tym, kak chcedźa iniciatiwu na festiwalu zapřijeć, je so Janek Wowčer z předsydu Domowiny Dawidom Statnikom rozmołwjał.

Budźe zběranje podpismow za Minority SafePack na folklornym festiwalu w Budyšinje, Hochozy a Chrósćicach rólu hrać?

D. Statnik: Na kóždy pad, festiwal steji za swětawotewrjenosć a mnohotnosć a je zdobom to, štož chcemy z woby­dlerskej iniciatiwu zachować. Tuž je jasne, zo za nju wabimy.

Kak a w kotrej měrje chceće to činić?

D. Statnik: Dokelž smy z organizaciju chětro wućeženi, je wabić a podpisma zběrać jenož na wěstych dypkach móžno. Wosobinsce chcu dźensa wječor na wotewrjenju festiwala we witanju za akciju wabić. Dale budźe to hłownje wobstatk moderacijow programow pjatk w Hochozy a sobotu popołdnju kaž tež wječor na statokach w Chrósćicach a njedźelu, předewšěm we wobłuku pokazkow łužiskich skupin a na finalu.

Budźeće z lisćinami podpisma zběrać?

Sakske knježerstwo dalše naprawy za spěchowanje Serbow wobzamkło

Drježdźany (SN/CoR). Pod hesłom „Serbsku rěč a kulturu dale konsekwentnje škitać“ stej frakciji CDU a SPD dźensa w Sakskim krajnym sejmje próstwu stajiłoj, zo ma so „Charta rěčow w Němskej“ podpěrać. Chartu běchu kraje 2014 hromadźe ze Zwjazkom a mjeńšinami wuwiwali, zo bychu w Europskej charće regionalnych­ a mjeńšinowych rěčow mjenowane rěče dale spěchowali. „Sakska chce so k loni wot konferency kultusowych ministrow wobzamknjenej charće wuznawać a chce tak hižo w sakskej wustawje zapisane spěchowanje Serbow dale zesylnić. Zdruha je debata w krajnym sejmje tež składnosć, wšitkim znowa temu serbska rěč a kultura wuwědomić. Njeje to kóždemu zapósłancej přeco prezentne, tuž je ćim wažnišo, wo tym zjawnje a hłubšo diskutować“, praješe sakska statna ministerka za wuměłstwo a kulturu dr. Eva-Maria Stange (SPD) wčera­ w rozmołwje z SN.

Sakska pyta wučerjow. Kaž z kultusoweho ministerstwa rěka, móžachu dotal jenož něšto wjac hač 60 procentow planowanych 1 400 městnow za přichodne šulske lěto wobsadźić.

Budyšin (SN/JaW). „Ličba přizjewjenjow na wučerske městna je nimale we wšěch šulskich družinach za wočakowanjemi wostała. W městach móžachu najwjac wobsadźić, we wjesnych kónčinach je dotal najwjac městnow njewobsadźenych“, zdźěli sobudźěłaćerka sakskeho kultusoweho ministerstwa Bianca Schulz.

Zo chce so ze žurnalistku stać, je za Charlene Seidel z Hórnjeje Hórki hižo nětko jasne. Dokelž pak so 16lětna šulerka 10. lětnika Budyskeho Serbskeho gymnazija serbšćinu, kotruž mjeztym pjeć lět wuknje, hišće dosć njewobknježi, chcyše poprawom swój šulerski praktikum w redakciji dźenika Sächsische Zeitung wukonjeć. „Su pak mi prajili, zo tam jako praktikant skerje jenož papjeru ničiš a pódlanske wěcy činiš“, Charlene wuswětla. Pola SN pak měješe nětko tydźenjej šansu pisać. A to wona chce.

„Započach wot toho časa, zo sym w šuli, małe stawiznički pisać“, Charlene powěda. Najprjedy běchu to jenož někotre sady a mnohe wobrazy. Spočatk 7. lětnika je prěnju knižku spisała. „Ta pak so jara špatnje čitaše. Chcych přiwuknyć a so polěpšić.“­ W 9. lětniku zwaži so tuž na dalši pospyt. Mjeztym je na appje „Wattpad“ 30 kapitlow wopřijacy krimi wozjewiła. A třeća kniha, thriller wokoło młodeje holcy, runje nastawa. Ideje za dalše stawiznički njepobrachuja, dohromady 60 tajkich je wona do knihi zestajała.

Budyšin (SN). Swoje čestnohamtske skutkowanje za přihoty 39. swjedźenja serbskeje poezije staj Benedikt Dyrlich a Měto Benada wot wčerawšeho dnja wusadźiłoj, kaž we wozjewjenju zdźě­lataj. Z přihotowanskim wuběrkom planowany a zdźěłany tuchwilny koncept je po jeju měnjenju „wuskeho časoweho ramika­ hač do planowaneho zahajenja swjedźenja 22. julija dla lědy hišće zwoprawdźomny“. Wobaj wobwinujetaj předsydu Zwjazka serbskich wuměłcow Jana Bělka, zo njeje mjez nim a nimaj hač „do dźensnišeho dnja k žanomu do­jednanju wo tymle skutkowanju dóšło“, za kotrež běchu jimaj gremije ZSW nadawk dali.

Předsyda ZSW Jan Bělk ma wumjetowanja za lózyskosć. Jako přičinu mjenuje wón rozdźělnej prawniskej poziciji wobeju stron nastupajo zrěčenje za Dyrlicha a Benadu, kotrež jeju skutkowanje za Swjedźeń serbskeje poezije rjaduje. Pozicija Bělka je, zo ma so tajke dojednanje na prawniske zasady złožować. Lětuši literarny­ swjatk ma wón za wohroženy.

Berlin (dpa/K/SN). Zeleni w zwjazkowm sejmje maja nowelu zakonja wo škiće přirody za njedosahacu, kaž ju wulka koalicija planuje. W naćisku njeje žaneje wotmołwy na hinjenje družin. Přede- wšěm wuspinkuje so ratarstwo. „Tak zapraja zwjazkowe knježerstwo, hłownemu winikej za hinjenje družin – industriel­nemu ratarstwu – puć zaraćić, zwurazni ekspertka Zelenych za přirodoškit Steffi Lemke. Nowelu je parlament dźensa při­wšěm schwalił.

Migracisku politiku změnić

Berlin/Brüssel (dpa/K/SN). Předsyda Iniciatiwy za stabilnosć Europy Gerald Knaus pomina nowu politiku Europskeje unije nastupajo ćěkancow. „Trjeba je cyłu politiku znowa rozjimać“, praji Knaus krótko do schadźowanja šefow statow a knježerstwow EU, na kotrymž dźe tež wo aspekty migracije. Po słowach Knausa su w tych krajach spěšne azylowe procedury­ trěbne, do kotrychž ćěkancy najprjedy přińdu.

Kónc tydźenja protestow