Waršawa (dpa/SN). Zastupnicy čłonskich statow Europskeje unije schadźowachu so wčera na zarjadowanju agentury za škit mjezow Frontex we Waršawje. Tam su wuradźowali, hač njemóhli łódźe z wuchowanymi ćěkancami z Italskeje do druhich přistawow EU dale pósłać. Zeńdźenje wotmě so na žadanje knježerstwa w Romje. Wone sej žada, zo měła so wuchowanska misija EU „Triton“, kotruž Frontex koordinuje, na druhe kraje rozšěrić. Dotal sćelu we wobłuku Triton wšitke łódźe z ćěkancami do italskich přistawow.
Kaž Frontex po wuradźowanju zdźěli, chcedźa dźěłowu skupinu załožić, kotraž trěbne změny pruwuje a nowy plan za wuchowansku misiju zdźěła. Přezjedni sej běchu, zo měli Italsku bóle podpěrać. Móžnym změnam dyrbjeli nimo Frontex a Italskeje wšitke potrjechene kraje přihłosować. Zwjazkowe knježerstwo žadanje Italskeje dotal skeptisce wobhladuje, dokelž móhło to dalšich migrantow pohnuć so na strašnu jězbu po Srjedźnym morju nastajić.
Triest (dpa/SN/MkWj). Z wušim hospodarskim zhromadnym dźěłom chcedźa politisce zamołwići tradicionalne konflikty mjez šěsć krajemi zapadneho Balkana poněčim přewinyć. To je zaměr konferency wodźacych zastupnikow Serbiskeje, Albanskeje, Bosniskeje, Makedonskeje, Montegra a Kosowa, kotruž su dźensa w sewjeroitalskim Triesće přewjedli. Wobdźěliła je so na njej tež zwjazkowa kanclerka Angela Merkel (CDU), kotraž bě tule kóždolětnu konferencu před třomi lětami do žiwjenja zwołała. Konkretnje dźe wo twar awtodróhow a płunowodow mjez krajemi kaž tež wo jednotne cłowne postajenja.
Drježdźany (dpa/SN). Zeleni sej žadaja, transporty skotu w Sakskej časćišo kontrolować. Dotalne kontrole pokazuja, kak trěbne tajke naprawy su, rjekny frakciski šef Zelenych w krajnym semje Volkmar Zschocke nowinarjam. Přepruwowanja pak měli so personelnje lěpje zawěsćić a na wšu Saksku rozšěrić.
Po informacijach ministerstwa za škit přetrjebarjow běchu wot julija 2016 do meje 2017 cyłkownje 16 wotpowědnych kontrolow w nadróžnym wobchadźe přewjedli. Při tym zwěsćichu wjacore ranjenja weterinarnych předpisow. Zschocke w tym zwisku kritizuje, zo so wot ministerki Barbary Klepsch (CDU) loni připowědźene zesylnjene kontrole nimale jenož na awtodróhu A 4 we wobłuku Kamjeničanskeje policajskeje direkcije wobmjezuja. „Wot systematiskich kontrolow po wšej Sakskej je tale praksa hišće chětro zdalena. Trjebamy nuznje personalne zesylnjenje hamtskich weterinarow a wobchadneje policije“, Zschocke rozłoži. Kontrolerojo pak njetrjebachu žane transporty přetorhnyć.
Starši ludźo we Wojerecach měli so bóle na wšědnym žiwjenju wobdźělić a njepřebywać jenož w swojim bydlenju. Tomule zaměrej ma słužić wosebity dźeń srjedź septembra.
Wojerecy (AK/SN). Po lěće 2013 přeproša město Wojerecy znowa na dźeń seniorow, kotryž je zwjazany z wosebitymi seniorskimi wikami. Termin 13. septembra organizuje syć towarstwow a zwjazkow zhromadnje z přiradomaj za seniorow a za zbrašenych na žurli Wojerowskeje lutowarnje. „Chcemy k wuměnje nazhonjenjow a k mjezsobnemu zeznaću pozbudźeć“, podšmórny předsydka přirady seniorow Gabriele Mark wčera na nowinarskej rozmołwje.
Trik tola njefungował
Kamjenc. Na prěni pohlad wušikny trik bě sej zawčerawšim paduch w Kamjencu wumyslił. We wulkej kupnicy na přemysłowej přestrjeni Při wětrniku měrješe so 31lětny zhromadnje ze swojim synom na polcy z narunankami za kolesa a tykny sej wobswětlenski set do nachribjetnika. Zo njebychu jeho při kasy lepili, přepoda wón nachribjetnik z rubiznu přistajenej při informaciskim stejnišću blisko zachoda kupnicy. Na swojim dalšim puću ke kasy wza sej muž jenož hišće blešu wody, kotruž tež zapłaći. Po tym zo běštaj wobaj kasu wopušćiłoj, pósła nan swojeho syna k informaciji, zo by tam nachribjetnik wotewzał. Kedźbliwy swědk pak bě wšitko wobkedźbował a přistajenu kupnicy na padustwo skedźbnił. Na to zawołachu policiju, kotraž sej personalije muža zapisa a njeskutk přizjewi.
Budyšin. Tunl Budyskeje zapadneje tangenty budźe wot pjatka, 14. julija, wot 18 hodź. hač do póndźele, 17. julija, rano w pjećich dospołnje zawrjeny. W tym času tam jězdnju ponowja. Wokołopuć budźe wupisany.
Radźićeljo so zetkaja
Róžant. Twarske nadawki za energetiske saněrowanje Róžeńčanskeho gmejnskeho domu budu jedna tema přichodneho posedźenja gmejnskeje rady Ralbicy-Róžant, kotrež wotměje so jutře, štwórtk, we 18.30 hodź. w Róžeńće. Dale přepodadźa nadawk za wutwar třećeho a štwórteho twarskeho wotrězka Łazkowskeje dróhi Při Klóšterskej wodźe. Nimo toho wobzamknu płaćiznu, za kotruž chce gmejna nowe twarske ležownosće w Sernjanach předać.
Hat chcedźa porjeńšić
Kulow. Zo by Kulowski měšćanski hat dale atraktiwny był, chce měšćanske zarjadnistwo teren wokoło njeho porjeńšić. Tak chcedźa pućiki wokoło hata ponowić, nowe móžnosće k posydnjenju nastajić a plateau saněrować. Přichodnu zymu chcedźa wodu wotpušćić, zo móhli brjóh hata skrućić. W běhu lěta wotměwaja so wokoło hata wjacore młodźinske a dalše zarjadowanja.