Berlin/Waršawa (RD/SN). „Pólska je loni Italsku wot pjateho městna na lisćinje najwjetšich hospodarskich partnerskich krajow Němskeje wutłóčiła. Jenož China, Nižozemska, USA a Francoska hišće před njej leža.“ To je Oliver Hermes, prezident wuchodneho wuběrka němskeho hospodarstwa, minjeny tydźeń na internetnje přewjedźenym lětnym schadźowanju gremija wozjewił. Strózbje wón doda, zo je cyłkowne mnóstwo dowožowanjow a wuwožowanjow susodneju krajow 123 miliardow eurow wučinjało, nimale trójce telko kaž wikowanje z Ruskej.
Pólske hospodarstwo, to wobkrućeja wšelake hospodarske instituty a dalše žórła, je koronapandemiju nimale bjez škody přetrało a je dale w pozběhu. Tak móžeše knježerstwowy šef Mateusz Morawiecki, kiž bě schadźowanju jako čestny hósć přišaltowany, hordźe zdźělić: „Smy 2020 jeničce spad nutřkokrajneho bruttoprodukta 2,7 procentow zwěsćili; to je jedna z najlěpšich hódnotow po cyłej Europskej uniji.“
Waršawa. Mjez biskopami Pólskeje tele dny njeměr knježi. Minjeny měsac su dóstali namołwu bamža Franciskusa „Ad limina apostolorum“. Hłowa katolskeje cyrkwje žada sej rozprawu wo połoženju w biskopstwach kraja. Vatikan kaza sej tajku rozprawu stajnje po pjeć lětach. Koronapandemije dla je mjeztym sydom lět zašło. W tym času pak je so w pólskej cyrkwi něštožkuli stało.
Andrzej Kobyliński, duchowny a docent na Waršawskej katolskej uniwersiće Kardinala Stefana Wyszyńskeho, je sej wěsty, zo budźe prezentacija rozprawy přez pólskich biskopow w oktobru we Vatikanje wšo druhe hač přijomna. W tydźeniku Polityka wón w rozmołwje rozłožuje, čehodla tomu tak budźe.
Praha (ČŽ/K/SN). Prěnje woprašowanje žonow w Čěskej je wujewiło, zo třećina z nich wita, njetrjebać hižo -ová rěkać, dwě třećinje chcetej wšak uzus ze starodawna wobchować. Čěski parlament bě historisku změnu njedawno wobzamknył. Přewróćacy přisamom je fakt, zo smědźa so žony po zmandźelenju wzdać přidawka -ová k swójbnemu mjenu. To bě dotal jeno wukrajnicam dowolene było, a Čechowkam w tym padźe, hdyž su so na wukrajnika wudali. Starši tež rozsudźa, hač nowonarodźenej dźowčičce kóncowku -ová přidadźa abo nic. Namjet k naprawje bě społnomócnjena knježerstwa za čłowjeske prawa, zapósłanča ANO Helena Válková, hromadźe ze zapósłancom Piratow Ondřejom Profantom zapodała. Namjet Piratow, njezapisać do wupokaza splah wosoby, porno tomu přepadny. Naležnosć nastupajo -ová bě tež nutřkowny minister Jan Hamáčk podpěrał. 91 zapósłancow ze 171 přitomnych namjetej přihłosowaše.
Drježdźany (SN). Sakska a wojewódstwo Dolny Śląsk chcetej wušo hromadźe dźěłać. To wuchadźa z wozjewjenja, kotrež staj sakski ministerski prezident Michael Kretschmer (CDU) a maršal Cezary Przybylski wčera w znowa wotewrjenym delnjošleskim běrowje při Carolininym naměsće w Drježdźanach podpisałoj.
W srjedźišću partnerstwa steji mjezu překročace zhromadne dźěło we wobłukomaj wědomosć a kultura, ale tež nastupajo nutřkownu wěstotu a zmištrowanje ekologiskich wužadanjow inkluziwnje klimoweje změny, kaž statna kenclija informuje.
Dalši zaměr je, zo so wobydlerki a wobydlerjo wobeju regionow dale zbliža a na te wašnje procesej europskeje integracije zaměrnje polěkuja. Kooperaciju w hospodarstwje, energijowej politice a w strukturnej změnje stej sej wobě stronje wosebje předewzałoj. K lěpšej wobchadnej infrastrukturje w pomjeznym rumje zhromadnje přinošować rěka, tam atraktiwny kolijowy blisko-, dalno- a nakładny wobchad zmóžnić. Wutworić maja so programy wuměny w slědźenju, kubłanju, kulturje a za młodźinu.
Praha. „Češi do toho!“, tutu bojowu parolu móžachmy póndźelu zdypkom w třoch po cyłym susodnym kraju słyšeć. Piwowe zahrody běchu kopate połne, tójšto přiwisnikow kulowateje kože je při najrjeńšim wjedrje swojej wubrance palcy dźeržało. Čěscy koparjo nastupichu mjenujcy w swojej prěnjej hrě přećiwo šotiskemu mustwu a su přećiwnika ze Zjednoćeneho kralestwa suwerenje porazyli. Swojich wulkotnych dwojich wrotow dla je 25lětny hrajer Patrik Schick nowy koparski rjek Čěskeje. Tak móžachu tam skónčnje zaso wjesele swjećić.
Bratislava (SŽ/K/SN). W padźe morjenja nowinarja Jána Kuciaka a jeho slubjeneje Martiny Kušniroveje dóńdźe k nowemu sudniskemu jednanju. Słowakske Najwyše sudnistwo (NS) je wčera wusud prěnjeje instancy, wuwinowacy wobskorženeju Mariána Kočnera a Alenu Zsuzsovu, zběhnyło a Wosebitemu chłostanskemu sudnistwu wróćiło. Z tutej naprawu wotpowěduje wone prócowanjam statneho rěčnistwa, kiž bě z nowymi dopokazami wo cyłej měrje „sobuskutkowanja na njeskutku“ do apelacije šło. K tomu móžeše wobsahi telefoniskich rozmołwow mjez Kočnerom a Zsuzsovej předpołožić, přeradźacych jeho jako skazarja mordarstwa a ju jako posrědnicu. Předsyda senata NS Peter Paluba rjekny, zo je niše sudnistwo přechwatnje rozsudźiło a wšelke dopokazy ignorowało.
Nan morjeneho Jána Kuciaka ma rozsud NS za prěnju kročel k dobyću wěrnosće. Mać zamordowaneje njewěsty Zlatica Kušnirová rjekny: „Sym wjesoła, zo je sprawnosć dobyła.“ Słowakska prezidentka Zuzana Čaputová praji, zo je NS ze swojim rozsudom přewšo wažnu kročel k wobnowjenju dowěry do justicy sčiniło.
Praha (dpa/SN). Zastupjerjo židow w Čěskej skorža přiběraceje antisemitiskeje šćuwańcy w interneće dla. W zwisku z koronapandemiju so zapřisahanske teorije rozšěrjeja, rěka we wčera wozjewjenej lětnej rozprawje čěskeje federacije židowskich wosadow. Wot cyłkownje 874 přeńdźenjow su loni 866 blogowych zapiskow, komentarow, karikaturow a dalšich awdiowizuelnych zapisow w interneće zwěsćili, kotrež běchu přećiwo židam wusměrjene. W lěće 2019 bě ličba tajkich nadpadow w interneće hišće 685.
Ličba registrowanych padow fyziskeje namocy přećiwo židam a jich zarjadnišćam zwosta porno tomu w jednocyfrowym wobłuku. Čěska wostanje potajkim kraj, w kotrymž móža so přisłušnicy tejele mjeńšiny wěsći čuć, tež w přirunanju z druhimi krajemi srjedźneje a zapadneje Europy, kaž w mjenowanej rozprawje rěka.
W Čěskej bydli po trochowanjach mjeztym zaso něhdźe 15 000 a 20 000 židow. W lětach wobsadniskeje fašistiskeje Němskeje w Druhej swětowej wójnje bě so nimale 80 000 čěskich židow z woporom holocausta stało.
Zlín. Prěni króć w stawiznach čěskich coologiskich zahrodow je so młodźo afriskeho słona narodźiło. Zašłu njedźelu rano je słonica Kali jeho w Zlínskim zwěrjencu porodźiła, rěčnica coowa zdźěli. Tamne zwěrjata ze słonjaceje skupiny su drohotny dorost bjez wulkich ćežow do swojeho cyłka přiwzali. Plahować afriske elefanty w zwěrjencach je wosebje komplikowane. Hižo před třomi lětami bychu so hladarjo eksotiskich tołstokóžnikow w Zlínskim zwěrjencu nimale nad přirostom wjeselili. Bohužel pak bě so mały elefant tehdy mortwy narodźił.