Dowolowa rozprawa wo słódkich njedźelach w Słowjenskej
Rafting jako jedne z najnowšich nazhonjenjow zalubi so zawěrno tež Michałej, byrnjež hórska woda zymna była.Naju kwas spočatk septembra bě so jako wulkotny swjedźeń wopokazał. Hižo póndźelu po tym hotowachmoj so na puć do słódkich njedźelow (Flitterwochen) w Słowjenskej. Naju prěnja stacija bě Bled w Julijskich Alpach, do kotrehož dojědźechmoj po někak dźewjećhodźinskej jězbje z awtom. W šikwanej pensiji so spěšnje zaměstnichmoj, prjedy hač wotkrychmoj sej městačko z mnohimi hosćencami a móžnosćemi přenocowanja. Tu słodźi, – rěkaše facit prěnjeho wječora.