Moderne zestajenki nas přeco zaso raz zaběraja – předewšěm potom, hdyž maja wone po rěčnej stronce něšto wosebiteho na sebi. Dźensa ma hić wo tajke kompozita, wuprajace so wo bliskosći a dalokosći něčeho.
Prěnja družina, wutworjena ze spočatnym dźělom blisko-, njeje jara wobšěrna. Wona so mjenje bóle wobmjezuje na někotre běžne zestajane słowa a dwusłowne pomjenowanja, a to: bliskowobchad, bliskowobchadny srědk, bliskowočer- stwjenje, bliskowočerstwjenišćo, bliskobój, bliskowuchodny konflikt. Nastali su wone po přikładźe němskich wotpowědnikow z prědnim dźělom Nah-, mjenujcy: Nahverkehr, Nahverkehrsmittel, Naherholung, Naherholungsgebiet, Nahkampf, Nahostkonflikt. W padźe němskeje zestajenki Nahaufnahme wužiwamy serbsce wot tohole typa wotchilnu twórbu foto/fotografija z bliskosće.
Lipsk (SN). Jědnaće sakskich šulskich rjadownjow su zańdźeny kónc tydźenja na Lipšćanskim jewišću Schaubühne Lindenfels z mytom „Film běži“ na 5. sakskim šulerskim filmowym festiwalu počesćili. Mjez nimi běchu tři łužiske kubłanišća, zdźěli sakske statne ministerstwo za kultus. Jedne z prěnich městnow a 300 eurow zdoby sej 8. lětnik Sepičanskeje (Schwepnitz) swobodneje šule ze swojim paskom „Stawk“. Nad 2. mytom a 200 eurami wjesela so šulerjo z Lubijskeho Gymnazija sotry a bratra Scholl za film „Ćěkanje z republiki“. Z 3. mytom a 100 eurami počesćichu šulerjow 9. lětnika Wojerowskeho Lessingoweho gymnazija. Jich produkcija rěka „Schody“. Wosebite myto za jeje angažement spožčichu wučerce Lydiji Hertmanowski ze Sepičanskeje šule.
Zarjadowar wubědźowanja je statne ministerstwo za kultus. Myto za lubuška publikuma dźěše lětsa do Schkeuditza. Dobyli su je šulerjo 4. lětnika Thomasa Müntzeroweho horta ze swojim filmom „Zakuzłany swět bajkow“.
Wojerecy (AK/SN). „Serbska swójba sedźi pódla was w hosćencu a so w swojej maćeršćinje rozmołwja. Kak byšće reagowali“, prašeše so dr. Katharina Elina sobotu wobdźělnikow dźěćaceje uniwersity we Wojerowskej kulturnej fabrice. „Bych so prašała, hač woni wo mni rěča“, rjekny dźesaćlětna Lila Beck, „bych pak swójbu rady zeznała.“ Dr. Katharina Elina nygny a na to nawjaza. Kulturnej pedagogowce dźěše wo předsudki a klišeje napřećo Serbam. Zakład předsudkow stej njewěda a njewěstosć. We wšědnym dnju su předsudki hłuboko zakótwjene. „Što nas wotdźeržuje cuzu rěč nawuknyć?“, chcyše Njeswačanka wědźeć. 25 serbskich słowow je wona dźěći sobotu nawučiła.
Budyšin (SN/MiR). Lětuši studijny dźeń pod hesłom „Studenća pomhaja šulerjam“ na Budyskim Serbskim gymnaziju bě wusměrjeny na šulerjow 11. lětnika. Młodostni wužiwachu minjeny pjatk dopołdnja poskitki, kotrež běchu kubłanska referentka Domowiny Rejzka Wałdźic, Serbske młodźinske towarstwo Pawk, Zwjazk serbskich studowacych a gymnazij zhromadnje přihotowali. Poskitki słužachu tomu, gymnaziastow wo tym informować, kotre puće wjedu po maturje k wukubłanju, studijej abo dźěłu w kraju a wukraju.
Budyšin (SN/MiR). Młody muž ze strachoćiwymaj wočomoj, z nachribjetnikom na chribjeće stupi do šulskeje rjadownje. „Wzmiće swoje stólcy, zestajejće je před taflu, wzmiće wšitko sobu, maće minutu chwile.“ Šulerjo 9. lětnika Budyskeje Serbskeje wyšeje šule to činja. Někotři hladaja spłóšiwje, druzy zaso smějo so, ale strachoćiwje, a dalši reaguja z tym, zo napominanje spěšnje sćěhuja.
Budyšin/Drježdźany (SN). Dohromady 115 hornjoserbšćinu wuknjacych dorosćenych je so na naprašowanju Multimedialneho centruma za nawuknjenje rěčow Drježdźanskeje Techniskeje uniwersity wobdźěliło. Wone je so wot 17. septembra hač do 10. oktobra 2015 přewjedło. Wo tym informuje Załožba za serbski lud na swojej internetnej stronje. Naprašowanje je wobstatk projekta k wuwiwanju interaktiwneho online-programa k samonawuknjenju hornjoserbskeje rěče, kotryž bě załožba do nadawka dała.
Budyšin (SN/MiR). 65 šulow po cyłej Sakskej su na šulu bjez rasizma - šula za kuražu pomjenowane. Wosom z nich je z Budyskeho wokrjesa. Do kruha słušeja mjez druhim Wósporčanska šula w swobodnym nošerstwje, Wojerowski Lessingowy a Foucoultowy gymnazij kaž tež Kamjenska 2. wyša šula. Za šěrjenje ideje zasadźuje so cyłoněmska Syć za demokratiju a kuražu (NDC). „Hač so bórze tež jako Budyski Serbski gymnazij w tymle kruhu angažujemy, wo tym chcemy w šulskim nawodnistwje rozmyslować“, rjekny nawoda gymnazija René Wjacławk. „Pruwować chcemy tež, hač stanjemy so šula bjez rasizma - šula za kuražu.“ Wón bě so na syćowym zetkanju zańdźenu sobotu w Serbskim šulskim a zetkawanskim centrumje wobdźělił.