Policija (13.08.15)
Janšojce. Wot 25. julija pytaja za 15lětnej Susannu Göthel z Drježdźan. Wona bě w Janšojskim zarjadnišću projekt „Neustart“ zaměstnjena. Kaž policija dźensa zdźěli, je młodostna přebywanišćo do njeznateho směra wopušćiła. Zastojnicy nětko tež w Hornjej Łužicy za něhdźe 165 centimetrow wulkej, čerwjenowłosatej šwižnej holcu w čornym kožanym kabaće a čornych legginsach pytaja. Dotal ju tež po přepruwowanju kontaktnych adresow w Drježdźanach našli njejsu. Pokiwy přijimuje Choćebuska policajska direkcija pod telefonowym čisłom 0355/ 49 37 12 27.
Tři Hwězdy. Dokelž je wutoru popołdnju Peugeot, kotryž chcyše nalěwo na awtodróhu wotbočić, jemu napřećo přijěducemu VWjej předjězbu wzał, awće do so zrazyštej. 28lětna sobujěduca a tři dźěći w Peugeoće so lochko zranichu, 85lětna sobujěduca w VWju ćežko.
Policija (12.08.15)
Budyšin. Póndźelu a wutoru w nocy je so w Budyskim a Zhorjelskim wokrjesu dohromady sydom króć paliło. Wohnjowi wobornicy dyrbjachu wotpadkowe tony runje tak kaž mjeńše lěsne wohenje hašeć. Palił je so tohorunja přirow mjez Rachlowom a Komorowom pola Kulowa. Policija tuka na to, zo bě tam něchtó žehliwu cigaretu do trawy ćisnył.
Policija (11.08.15)
Biskopicy . Maja Biskopicy noweho zapalerja? Njedźelu je so popołdnju na Stołpinskej dróze paliło. Swědk bě tam ze zahrody widźał, kak něchtó na susodnej ležownosći woheń zamiškri, a informowaše hnydom wohnjowu woboru. Nimo toho napisa sej hamtske čisło awta. 22 kameradow z Biskopic a Geißmannsdorfa móžeše palacu hromadu wobručow spěšnje zhašeć. Policija nětko za zapalerjom slědźi.
Smělna. Wodźer Smarta je wčera w Póckowach na dróze do směra na Smělnu kontrolu nad wodźidłom zhubił a zajědźe w křiwicy do hrjebje. Awto so přećisny, při čimž so šofer ćežko zrani. Dyrbjachu jeho do chorownje dowjezć. Póckowska wohnjowa wobora je městnosć njezboža zawěsćiła.
Policija (10.08.15)
Liboń. 54lětny wodźer motorskeho typa Yamaha z pobóčnym wozom je so sobotu popołdnju w lěwicy pola Libonja přećisnył. Wón so při tym ćežko zrani.
Šešow. Minjeny pjatk popołdnju je so na dwěmaj hektaromaj přeworaneho pola blisko Šešowa paliło. 36 wohnjowych wobornikow z Njeswačidła, Łuha, Zarěča a Rakec měješe woheń na zbožo spěšnje pod kontrolu a płomjenja zhaša.
Policija (07.08.15)
Hamor. Na statnej dróze 131 pola Hamora sta so wčera wječor z dotal njeznateje přičiny tragiske wobchadne njezbožo. Něhdźe w 19.30 hodź. poča so mjez Krynhelecami a Hamorom VW Golf-kabriolej w lěwej křiwicy suwać, zajědźe z dróhi a prasny na to do štoma. Byrnjež wuchowanscy sanitetarjo spěšnje na městnje byli, njemóžachu woni hižo pomhać. 27lětny wodźer awta hišće na městnje njezboža zemrě. Wobdźěłanje njezboža a rumowanje traještej něhdźe hač do 23 hodź. Kaž policija zdźěli, nasta wěcna škoda w pjećcyfrowym wobłuku. Wobchadna njezbožowa słužba Zhorjelskeje policajskeje direkcije nětko přepytuje, kak je k njezbožu dóšło.
Policija (06.08.15)
Budyšin. Na swětłym dnju chcyše wčera rano muž w Budyšinje awto listonoša pokradnyć. Tón bě jězdźidło we 8.30 hodź. na Niemöllerowej wopušćił a klučik tčacy wostajił. Tónle wokomik skućićel wuži, zalěze do awta a chcyše wotjěć. Přewjele jězbneje praksy wšak wón njeměješe a zajědźe z VWjom runu smuhu do kerka. Na to so pěši zminy, listonoš pak zawoła policiju. Zastojnicy 41lětneho paducha dosahnychu. Wón steješe pod wliwom drogow.
Policija (05.08.15)
Konjecy. W pódlanskim twarjenju w Konjecach je so wčera popołdnju z dotal njeznateje přičiny křesło zapaliło. Žnjencarjo na susodnym polu běchu płomjenja wuhladali a informowachu wohnjowu woboru a wobydlerjow. Wobornicy wšitko zhašachu, zranił so nichtó njeje.
Policija (04.08.15)
Halštrow.Wobchadne njezbožo z třomi wobdźělenymi jězdźidłami sta so wčera wječor na statnej dróze S 94 mjez Rušicu a Halštrowom. Wodźerka Nissana chcyše před njej jěducy Audi přesćahnyć. Jeho šofer pak to přewidźa, wujědźe tohorunja k přesćehnjenju a šmórny so Nissana. Tón storči na to do dalšeho awta, VWja. Při njezbožu bu młoda žona snadnje zranjena, njetrjebaše pak do chorownje. Wobornicy městno zrumowachu.
Policija (03.08.15)
Kamjenc. Wohnjowych wobornikow z Kamjenca, Jěžowa, Lückersdorfa, Gelenauwa a Bambrucha wołachu sobotu wječor k zasadźenju do Jěžowa, zo bychu tam woheń we wulkim konjencu hašeli. Konje wšak w nim na zbožo njeběchu, dokelž su w lěću na pastwje. Město toho wužiwa konjacy wikowar Bernd Lichthorn halu tuchwilu jako skład za mašiny. Mjeztym zo móžachu někotre z nich wuchować, so tam składowane walčki syna a słomy spalichu. Tež solarna připrawa na třěše hale so dospołnje zniči. Dokelž w bliskosći hydrant pobrachowaše, dyrbjachu wodu za hašenje z rěki klumpać. Kelko škody je při wohenju nastało, njehodźi so hišće rjec, rozměr pak je po słowach wobsedźerja imensny.
Policija (31.07.15)
Budyšin. Njeznaći su w nocy na štwórtk na Budyskej Friedricha Lisztowej šulske twarjenje z hokatymaj křižomaj pomórali. Bydlenske drustwo, kotrež dom wobhospodarja, je jeju hnydomne wotstronjenje postajiło. Decernat statneho škita njeskutk přepytuje.
Budestecy. Policija je w běhu dweju tydźenjow ćežke rubježnistwo wujasniła, kotrež bě so 16. julija w Budestecach stało. Tehdy njeznaty bě so do domu wuměnkarki zadobył, ju sputał a jej z nožom hrozył. Pokradnył je něšto mało pjenjez a ec-kartku žony, z kotrejž spyta bjez wuspěcha pjenjezy wotzběhnyć. 26lětny z Lubijskeje kónčiny je nětko zajaty.
