Pěstowarnja, pjenjezy a puće
Worklečanska gmejnska rada je wšelke tematiske pola worała
Worklecy (SN/MG). Před poł lětom je Vanessa Krahl nawodnistwo Worklečanskeje pěstowarnje přewzała. Štwórtk poda wona na posedźenju gmejnskeje rady mjezyfacit swojeho dźěła. Chětro wjele je wona hižo nastorčiła: Personelna situacija je so polěpšiła, rozkory ze staršimi su złahodźane a tež zhromadne dźěło w kolegiju je so polěpšił, wona powěda. Wot klětušeho, tak Krahl dale, móža woni tež dźěći dalšich gmejnow do přebywanišća přiwzać, wšako ličby porodow pomału spaduja. Lětsa pak chcedźa w pěstowarni najprjedy raz mjeńše dźěła w zachodnym wobłuku a zahrodźe zwoprawdźić. „Za to smy sebi hižo wulku ličbu darow nahromadźili“, Krahl doda.
Za škit přirody a družin zwěrjatow
Wojerowski zwěrjenc swój angažement za škit přirody a družin dale wutwarja. Ćežišćo při tym je zachowanje domjaceje biodiwersity, spěchowanje trajnych přirodoškitnych projektow a wobswětowym kubłanju.
Wojerecy (SN). Na wšěm tym mjenowanym maja tež wopytowarjo wulki podźěl. Wšako wužiwa Wojerowski zwěrjenc dźěl zastupneho pjenjeza za wutwar regionalneho a mjezynarodneho škita přirody a družin. Na te wašnje je wón mjeztym 17 035,50 eurow nazběrał. Mjez podpěrowanymi su wjacori dołholětni partnerojo, kaž přirodoškitna stacija Njeswačidło a Wojerowska městna skupina Němskeho přirodoškitneho zwjazka (NABU). Nimo toho stara so zwěrjenc wot lěta 2018 wo zasydlenje někotrych ze swojich nowonarodźenych kuliškow (Steinkauz) w Sakskej, Braniborskej a Smolinach.
Na mjezynarodnej runinje su so Załožba za škit družin, Sancob (Southern African Foundation for the Conservation of Coastal Birds) a přirodoškitna iniciatiwa zwěrjo zwěrjenca a WildCats Conversation Alliance, kotraž so za wohrožene rubježne kóčki w Aziji zasadźa, nad pjenjezami z Wojerec wjeselili.
Na jasnych ranjach schadźa słónco w poslednim času stajnje wosebje ...
Krótkopowěsće (01.03.24)
Milina wupadnyła
Chrósćicy/Ralbicy-Róžant. We wjacorych domjacnosćach mjez Połčnicu a Kamjencom je milina wčera dopołdnja za nimale hodźinu wupadnyła. Tež někotre wsy w gmejnomaj Chrósćicy a Ralbicy-Róžant běchu potrjechene. Rěčnica SachsenEnergie mjenowaše zmylk w kablu jako přičinu. Njeje dotal hišće jasne, kak je tutón nastał. Zwuporjedźenske dźěła su wotzamknjene, milina zaso je.
Na probu bydlić w Gubinje
Gubin. Zajimcy móža w Gubinje, wokrjes Sprjewja-Nysa, wot julija hač do septembra na probu bydlić. Sam abo samo ze swójbu móža woni dospołnje wuhotowane bydlenje za dobu dweju do štyrjoch tydźenjow wužiwać. Jeničce pódlanske kóšty maja zapłaćić, rěčnica delnjołužiskeho města zdźěli. Před lětami je hornjołužiske město Zhorjelc podobnu akciju wospjet přewjedło.
Dźiwinowe parki njepřistupne?
Nowačk 3. městno docpěł
Što je Konrada Zuseho inspirěrowało?
Žadaja sej přewidny proces
Chcedźa dalši koncept za drobnowikowanje a nakupowanske centry
Wojerecy (AK/SN). Wojerowska měšćanska rada je na swojim posedźenju wutoru měšćanosće Torstenej Ruban-Zehej (SPD) nadawk za dalši koncept za drobnowikowanje a nakupowanske centry přepodała. 20 radźićelow bě za to hłosowało, pjeć radźićelow frakcije CDU přećiwo tomu. Torsten Ruban-Zeh liči ze štyrjomi měsacami, kotrež budu za zhotowjenje koncepta trěbne, a nadźija so, zo móže měšćanska rada hišće do kónca lěta wo nim wothłosować.
Wo mosće horco diskutowali
Němcy. Wobydlerska zhromadźizna je mnohich wobydlerjow Němcow póndźelu do gmejnskeho domu wabiła. Na žurli běchu nimale wšitke městna wobsadźene, štož wulki zajim ludźi wotbłyšćowaše. Wjesny předstejićer Eugen Diesterhöft přitomnych tež serbsce witaše. Ze stron města Wojerecy běchu socialny měšćanosta Mirko Pink, hłowny zamołwity twarskeho zarjada Dietmar Wolf a dalši sobudźěłaćerjo radnicy přitomni.
Policija (29.02.24)
Wobšudnicy po puću
Budyšin. W Budyskim wokrjesu běchu minjene dny wobšudnicy zaso jara aktiwni. Dwěmaj škodowanymaj napřećo wudawachu so jako sobudźěłaćerjo jeju domjaceje banki. Po zdaću běchu w swojej róli tak přeswědčiwi, zo přepodachu jim wopory wosobinske přistupne daty swojich kontow. Po tutym puću wotknihowachu skućićeljo pjenjezy z konta woporow.
Inwestuja do šule, wobory a radnicy
Inwesticije w lěće 2024 w Rakečanskej gmejnje su hižo dlěje planowane. Za nje trjebaja tójšto swójskich srědkow. Te drje maja k dispoziciji, su pak tež rizika, kotrež gmejna wobwliwować njemóže.
Rakecy (UM/SN). Za lěto 2024 Rakečanska gmejna wjacore naročne projekty planuje. Po wjacore lěta trajacych přihotach chcedźa je nětko skónčnje zwoprawdźić. Na prěnim městnje mjenuje wjesnjanosta Swen Nowotny (CDU) energetiske saněrowanje zakładneje šule. Nimo toho chcedźa kubłanišćo tak wuhotować, zo je wone bjez zadźěwkow přistupne. Za to chcedźa tam lift přitwarić. Poprawom bě tónle projekt hižo za lěto 2023 planowany. „Nadźijomnje dóstanjemy tak spěšnje kaž móžno připrajenje za spěchowanske srědki, tak zo móžemy lětsa twarić započeć“, praji Rakečanski wjesnjanosta. Nic mjenje wažny je twar gratownje za dobrowólnu wohnjowu woboru w Stróži. „Wšitko pak wotwisuje wo toho, hač nam spěchowanske srědki přizwola“, Swen Nowotny podšmórnje.
