Serbscy gymnaziasća a dalši z oratorijom „Podlěćo“ zahorili

Róžant (CRM/SN). Po jara wuspěšnym předstajenju našočasneho duchowneho oratorija „Serbske jutry“ přez serbske chóry a orchester SLA w Drježdźanach a Budyšinje skutkowaše wčerawši poskitk chóra 1. serbskeje kulturneje brigady Budyšin ze solistami a samsnym orchestrom w Róžeńčanskej putniskej cyrkwi zaso kaž magnet. Znowa steješe cyrkwinski hudźbny direktor Friedemann Böhme za dirigentskim pultom, štož zaruči tež Korle Awgusta Kocorowemu oratorijej „Podlěćo“ z cyklusa „Počasy“ po dźensnišich kriterijach płaćiwu interpretaciju. Po klawěrnej předłoze komponista běše Würzburgski hudźbnik Christian Kabitz nětko tež za tule twórbu Kocora nowu orchestrowu wersiju stworił, kotraž zdawa so předstawam tajkeje kompozicije z doby romantiki přiměrjena być.