London (kh/SN). Italscy serijowi rjekojo su finale europskich koparskich mišterstwow 2020 docpěli. Po 32 hrach bjez poražki je Squadra Azzurra tež Španisku přewinyła. Za to pak trjebaše po taktiskej hrě třělenje jědnatkow, kotrež doby před 60 000 přihladowarjemi w Londonskim Wembleyjowym stadionje z 5:3. W tajkim krimiju njejsu Španičenjo na kóncu trěbne čuwy měli.
Španiski trenar Luis Enrique je ze swojej prěnjej zestawu italskeho kolegu Roberto Mancinija překwapił. Zo budźe Dani Olmo w nadběhu za zranjeneho Pabla Sarabiju hrać, běše hišće wotwidźeć. Prěni raz na turněrje pak wzda so Enrique stajneho nadběhowarja Álvara Moraty a pósła za njeho Mikela Oyarzabala na hrajnišćo.
Překwapjenka by so nimale zešlachćiła. Po sylnym započatku Italskeje stabilizowachu so Španičenjo a dóstachu wulkotnu šansu k nawjedowanju. Po genialnym pasu 18lětneho stara turněra Pedrija bě Oyarzabal Giorgija Chiellinija a Leonarda Bonuccija přewinył, njezamó pak bul w najlěpšej poziciji kontrolować.