Budyšin/Žitawa (SN/bn). Hižo něšto tydźenjow pyša wobrazy a basnje wubrane twarjenja w Budyšinje a Žitawje. W sprjewinym měsće su wotpowědne wulkoformatowe plakaty, na přikład na Hošic hasy, na Cyrkwinskej a na Mjasowych wikach, připrawjene. Wuměłstwowa akcija je wuslědk dołho zrawjaceje mysle lyrikarja a wjelelětneho sobudźěłaćerja kulturneho běrowa města Budyšina Andreasa Henniga a fotografa Matthiasa Webera, bydlaceho we Wulkich Hendrichach (Großhennersdorf). „Zakładnu ideju mějachmoj hižo spočatk 1990tych lět. Hladajcy na tójšto wobškodźenych fasadow w Žitawje kaž tež w Budyšinje smój sej prajiłoj: Tu měłoj raz něšto wuspytać, snano wosobinsku formu tak mjenowaneje streetart. Lětsa bě tak daloko, zo běchmoj sej wěstaj: Nětko je načasu! Požadachmoj so z konceptom pola Kulturneje załožby Sakskeje wo spěchowanje projekta – ćišć tajkich plakatow dźě runjewon darmotny njeje – a dachmoj so po přizwolenju do dźěła,“ Andreas Hennig rozłoži.