Spočatk tydźenja roznjese so po Serbach powěsć, zo je 29. měrca w 74. žiwjenskim lěće zemrěła w Lipsku bydlaca serbska spisowaćelka Angela Stachowa. Z njej zhubimy awtorku, kotraž je předewšěm w 1970tych a 1980tych lětach serbsku lite­raturu z wurjadnymi powědkami wobohaćiła, wo kotrychž so často kontrowersnje diskutowaše. Pěkne a spodobne stawiznički njeběchu jeje wěc.

Angela Stachowa narodźi so 16. awgusta 1948 w Praze jako dźowka serbskeho spisowaćela a wučerja Jurja Měrćinka. Wona wotrosće w Budyšinje a złoži 1967 abituru na Serbskej rozšěrjenej wyšej šuli w Małym Wjelkowje. Runočasnje dósta fachowy list jako mechanikarka dalokopowěsćownistwa. Po tym zo bě lěto jako wolontarka w redakciji Noweje doby dźěłała, studowaše na Techniskej uniwersiće w Drježdźanach a zakónči studij jako diplo­mowa inženjerka ekonomije. Z lěta 1973 dźěłaše jako wědomostna asistentka na Karla Marxowej uniwersiće w Lipsku, doniž njesta so 1976 ze swobodnej spisowaćelku. Z toho časa bydleše w Lipsku. Wot 1990 do 1994 bě za PDS čłonka Němskeho zwjazkoweho sejma.