Literarisce po starym měsće

Choćebuz. Delnjoserbska biblioteka přeproša dźensa, pjatk, na „Literarne přechodźowanje po serbskich slědach w Choćebuskim starym měsće“. Nimo sobudźěłaćerkow a sobudźěłaćerjow knihownje čitaja tež čłonki wotrjada Serbskeho instituta za regionalne wuwiće a škit mjeńšinow na ze serbskeho wida (kulturno)stawiznisce wažnych městnach hodźace so teksty. Dwurěčne darmotne přechodźowanje započnje so w 19.30 hodź. při studni na Starych wikach.

Předpředań zahajili

Budyšin. Serbski ludowy ansambl informuje, zo su wotnětka zastupne lisćiki za předstajeni oratorija „Žně“ 18. a 19. awgusta w Budyskej měšćanskej hali „Króna“ na předań. Twórbu Korle Awgusta Kocora a Handrija Zejlerja interpretuja chór 1. serbskeje kulturneje brigady, orchester SLA a solisća. Cyłkowny nawod wukonja Friedemann Böhme, kiž so z koncertomaj ze zastojnstwa dirigenta brigady rozžohnuje. Dokelž je pokładnja SLA wot jutřišeje soboty do 14. awgusta zawrjena, hodźa so tikety jeničce online knihować (hlej www.ansambl.de).

Wuhotuja „1. lěćny swjedźeń“