Předsydstwo SJ Chrósćic přepoda před winowatostnej dypkowej hru přećiwo Póstej Germaniji Budyšin Lucianej Zahrodnikej a Janej Boguszej pokal za stotu dypkowu hru w Chróšćan trikoće.

24lětny Lucian Zahrodnik je wažny hrajer stajneho mustwa, takrjec prěnjeje jědnatki Chróšćanow. Po prawej stronje smali wón kóždu hru horje a dele, druhdy jako zakitowar, druhdy skerje ofensiwnišo, jako hrajer srjedźneho pola. Tak tež často nadběhowarjow z dobrymi flankami posłužuje.

Nadběhowar SJC je 25lětny Jan Bogusz. W škiće přećiwnikow Chróšćan stajnje strach wubudźa a wusahuje tam ze swojej dobrej techniku, wotzamknjenjom, ale tež ze swojej staturu. W sto hrach je Bogusz tež hižo 32 wrotow za SJC docpěł. Tak je mustwje hižo mnoho dypkow zaručił.