Nowy wotrjad Serbskeho instituta (SI) za regionalne wuwiće a škit mjeńšin je wčera w Choćebuzu oficialnje swoju dźěławosć zahajił – z přednoškom wo rewitalizaciji serbšćiny.
Choćebuz (SN/mb). Nowy wotrjad pod nawodom dr. Lutza Laschewskeho ma předewšěm dwaj wobłukaj na starosći: wožiwjenje serbšćiny, wosebje delnjoserbšćiny, a skrućenje hódnoty serbskeje kultury (tak mjenowana walorizacija). Při tym chcedźa sobudźěłaćerjo ze skupinami zajimcow a lokalnymi akterami kooperować.
Do teama słušeja wědomostni sobudźěłaćerjo Julija Běrinkowa, dr. Jean-Rémi Carbonneau, dr. Jenny Hagemanowa, dr. Fabian Jacobs, Sophie Rädel, Gregor Schneider, Hannah Wellpott a projektna managerka Susann Vogel. Rěčny niwow je wšelaki, ale wšitcy chodźa na intensiwne kubłanje w delnjoserbšćinje, kaž referentka SI za zjawnostne dźěło Madlen Domašcyna našemu wječornikej na naprašowanje zdźěli.
Hory (AK/SN). Něhdźe 30 wćipnych připosłucharjow je knižna premjera na žurli na Horach přiwabiło. Serbski spisowaćel Křesćan Krawc předstaji tam wčera swój nowy roman „Der Wassermannräuber – Ein Oberlausitzkrimi“. Hosćićelej běštej tradiciske towarstwo Halštrowski kraj a publikaciju wudawace nakładnistwo Oberlausitzer Verlag.
Budyšin (SN/bn). Dołho trajacy přiklesk, někotrežkuli „brawo!“ a bjezposrědnje „yeah!“ kaž tež tójšto chwalacych słowow po zarjadowanju – zazběh noweho rjadu sinfoniskich koncertow Serbskeho ludoweho ansambla je so hudźbnikam pod nawodom Georgiosa Balatsinosa hladajo na wothłós publikuma bjezdwěla zešlachćił. Přiwšěm so tón abo tamny wopytowar nad snadnym zajimom dźiwaše, wšako zličichu předwčerawšim na žurli SLA jenož něhdźe 30 hosći.
Koncept rjadu je z jónkróćnym koncertom „přirunować rozdźělne narodne hudźbne rěče na zakładźe třoch kompozicijow, kotrež su do wěsteje měry runočasnje nastali“, kaž w programowym zešiwku rěka. Zdobom ma so „tworjenje serbskich komponistow w europskim konteksće předstajić“, bě intendant SLA Tomas Kreibich-Nawka zahajiwši aktualnu hrajnu dobu připowědźił. Wotpowědnje wopřijimaše zahajacy program serbski, us-ameriski a grjekski přinošk.
Budyšin (SN/HaJ). Nimale sto ludźi bě wčera wječor na knižnu premjeru na hród we Lichanju přichwatało. We woćěmnjenej žurli pokaza diaprojektor na běłu sćěnu lodźišćo ze zmjerznjenymi roztorhami. „To je zamjerznjeny spjaty jězor“, přispomni fotografikar Jürgen Maćij składnostnje prezentacije swojeje w Ludowym nakładnistwje Domowina wušłeje knihi „Ducy domoj – Unterwegs nach Hause. Fotografien 1972–2022“. Publikacija přewodźuje wosebitu wustajeńcu Budyskeho Serbskeho muzeja, kotruž chcdźa lětsa 12. nowembra wotewrić a hač do klětušeho 25. februara spřistupnjeć.
Budyšin (SN/bn). Křesćan „James“ Młynk słuša k wusahowacym wosobinam łužiskeje hudźbneje sceny 1980ych a 1990ych lět. Solo kaž tež jako čłon wjacorych skupinow spisa retomas rockowych a popowych titulow, jako spěwar a gitarist bě do tójšto produkcijow mjez druhim Serbskeho rozhłosa zapřijaty. Składnostnje lětušich 65. narodninow kaž tež 20. posmjertnin wěnowachu jemu předwčerawšim we wobłuku rjadu „Open mic night“ Kamjentneho domu wosebity wopomnjenski wječor w Budyšinje. Iniciatorej wječora Torstenej Wiegelej bě zarjadowanje zdobom składnosć, so zjawnje jako jednaćel Kamjentneho domu rozžohnować. So předewšěm swojim „wjelelětnym sobudźěłaćerjam“ dźakujo zaspěwa wón „My way“, přebasniwši tekst na kóncu: „We did it our way“.