Z wudaća: pjatk, 13 januara 2017

Genf (dpa/SN). Konferencu wo znowazjednoćenju Cyperna su wčera wječor w šwicarskim Genfje bjez konkretneho wuslědka zakónčili. Wšitcy wobdźěleni pak chcedźa pak so ručež móžno znowa zetkać, kaž zastupnikam Zjednoćenych narodow potwjerdźichu. Fachowcy wšěch stron chcedźa so 18. januara schadźować. W Genfje běchu zastupnicy grjekskich a turkowskich Cypernjanow kaž tež třoch rukowaćelskich statow Grjekskeje, Turkowskeje a Wulkeje Britaniskeje pod dohladom UNO wuradźowali.

Steinmeier w Kolumbiskej

Bogotá (dpa/SN). Zwjazkowy wonkowny minister Frank-Walter Steinmeier přebywa dźensa w Kolumbiskej, zo by wobćežny měrowy proces w južnoameriskim kraju podpěrał. W stolicy Bogotá witaštaj jeho prezident Juan Manuel Santos a wonkowna ministerka María Ángela Holguín. Wopytać chcyše Steinmeier tež jednu ze 26 kónčin, w kotrychž maja zběžkarjo organizacije Farc hač do junija swoje brónje wotedać. Kónc minjeneho lěta běchu knježerstwo a zběžkarjo měrowe dojednanje podpisali.

Gauck w składźe aktow stasi

Tež tele awto zymskeje słužby njeje dźensa dale přišło, jako so wobchad na zasněženej awtodróze A 4 pola Gummersbacha haćeše. Wichorowa nižina „Egon“ je w zapadnych zwjazkowych krajach a na sewjeru Němskeje z městnami chaotiske wobchadne połoženje zawiniła. Dźensa nawječor wočakuja zymsku frontu tež we wuchodnej Sakskej. Foto: dpa/Marius Becker

Berlin (dpa/K/SN). Howrjacy wichor „Egon“ tež w Němskej mócnje zachadźa, torhajo a ze sněhom. Tak dochadźa k mnohim haćenjam we wobchadźe, awtodróhowym kaž tež ćahowym. Žele­znica njeda ICEjam nachwilnje wěstoty dla spěšnišo hač 200 km/h jězdźić, tak zo su pućowacy dlěje po puću. Wjele lětow dyrbi wupadnyć. W dźělach Posaarskeje a Bayerskeje je milina wupadnyła, dokelž běchu padace štomy abo hałzy milinowody wobškodźili. Haćenja na dróhach a wupady miliny su tež w Delnjej Sakskej, Badensko-Württembergskej a dalšich zwjazkowych krajach. W Durinskej knježi sněhowy chaos. Někotre šulske busy su we wějeńcach tčacy wostali.

Jackpot při parkowanskim awtomaće dobył je 48lětny muž w bayerskim Memmingenje. Jako chcyše muž z pjećeurowskej bankowku parkowanski lisćik zapłaćić, wróći jemu defektny awtomat hromadu drobnych pjenjez – dokładnje 201,50 eurow. Sprawny muž wšak woteda pje­njezy na policajskej straži. Awtomat pak je mjeztym zwuporjedźany.

Móšeń z lódzymneje rěki wućahnył je wuchowanski płuwar w Hornjej Pfalcy a je tak žonje z wuskosćow pomhał. 30lětnej bě móšeń z pjenjezami, wupokazom a pjenježnej kartu w Ambergu do rěki Vils padnyła. Jeje synk bě do toho spytał swoju čapku do rěki ćisnyć. Mać drje móžeše tomu zadźěwać, při tym pak jeje móšeń do wody padny. Žona zawoła policija a ta towaršnosć za wuchowanje žiwjenja. Płuwar zalěze do rěki a móžeše 30lětnej móšeń skónčnje přepodać.

Berlin (dpa/K/SN). Zwjazkowy justicny minister Heiko Maas (SPD) je přiznał, zo su přisłušne městna ze Syričanom, kiž bě na Berlinske hodowne wiki atentat skućił, wopak wobchadźeli a zo zdźěła wón wotpowědnu rozprawu. „Po tym štož je so stało a štož je so mjeztym wukopało, njemóže nichtó rjec, zo njejsu žane zmylki byli“, rjekny Maas wčera wječor w telewiziji ZDF. K tomu wón zwurazni, zo budźe přepytowane, čehodla njeběchu njeskutkej zadźěwać móhli, byrnjež Anis Amri instancam hač k Centrumej za wotwobaranje terora znaty był. Zwjazkowy nutřkowny minister Thomas de Maizière (CDU) je hižo někotre dny po njeskutku tajku rozprawu připowědźił.

Wojerske jednotki USA su, po puću do wuchodneje Europy, wčera a zawčerawšim tež we Łužicy byli. Wone přisłušeja kontingentej 4 000 wojakow NATO, kotřiž maja pječa Baltikum a Pólsku před Ruskej škitać. Tež Łužičenjo so starosća. Kemšerjo budu njedźelu w Slepom wo tym w prědowanju a próstwach słyšeć.

Prěni raz wotměje so wot 2. do 4. februara na sydom městnach Budyskeho a Zhorjelskeho wokrjesa Hornjołužiski festiwal dźěćaceje hudźby. „Tak přeju sej komunalnu kulturnu politiku“, chwaleše wčera Budyski wyši měšćanosta Alexander Ahrens iniciatorow Beatu Tarrach a Reinharda Simmgena, kotrajž hižo dawno tudyšu hudźbnu scenu wobohaćataj – a to nic jenož na dobro dźěći, ale tež serbskich skupin. 30 spěwytwórcow je wuměłska nawodnica festiwala Beate Tarrach přeprosyła – šansa to tež za staršich so wobhonić, što dźensa wšitko na polu dźěćaceho spěwa mamy. Tež Serbow su organizatorojo zapřijeli – němskorěčny poskitk wězo dominuje. Ale štó wě, snano hodźi so na přichodnych­ tajkich festiwalach hišće bóle pokazać, kajki bohaty spěwny pokład Serbja­ maja. Hudźba zwjazuje přez kul­turne mjezy – ćim bóle na dźěćacej runinje.­ Cordula Ratajczakowa

W Pólskej žołma namócnosćow přećiwo wukrajnym hosćencarjam wudyriła

Waršawa. Pólska je prěnje dny noweho lěta žołmu brutalnych namócnosćow přećiwo wukrajnikam dožiwiła. Swoje wuchadźišćo mějachu nadpady silwester w Ełku, měsće ze 60 000 wobydlerjemi na sewjeru kraja njedaloko litawskeje mjezy. Tam dóńdźe k rozestajenju mjez wopitymi pólskimi młodostnymi a algeriskim hosćencarjom, kiž předawaše kebab. Rozestajenje wuwjercholi w bijeńcy, při kotrejž z Tuneziskeje pochadźacy kuchar jednoho z pólskich młodostnych z nožom zakłó. Dźeń po tym dóńdźe k masiwnym nadpadam Polakow na hosćency wukrajnych mějićelow po wšěm kraju. Nadpadnicy atakowachu durje a wu­kładne wokna z kamjenjemi a ben­cinowymi blešemi. Do někotrych barow so zadobychu a je dospołnje rozbichu. Namócnosće­ registrowachu mjez druhim tež we­ Wrócławju, Legnicy a Lubinje. Medije­ rěča mjeztym wo „pogromowej atmosferje“.

Praha (ČŽ/K). Něhdyši předsyda Komunistiskeje strony Čěskosłowakskeje, 94lět­ny Miloš Jakeš, wupraja so w rozmołwje z ruskej internetnej nowinu Gazjeta.Ru wo podawkach w Sowjetskim zwjazku po nastupje Michaila Gorbačowa jako generalneho sekretara tamnišeje komunistiskeje strony. A wón měni: Po­litika pjerjestrojki poslednjeho sowjetskeho nawody njebě trěbna.

Jan Friedl und Jens Pannasch (wotprawa) z drjewotwarskeje firmy Rösch z Dźěwina (Groß Düben) staj tele dny započałoj, ponowjenje Wile Schönblick w Mužakowskim kupanskim parku přihotować. Za to staj drjewjane wobhrodźenja wotšrubowałoj, zo njeby so zdźěla hišće dosć derje zdźeržana historiska balkonowa konstrukcija wobškodźiła, hdyž dźěłaćerjo twarskich firmow přichodny čas nutřkowny dźěl twarjenja­ a fasadu ponowja. Foto: Joachim Rjela