Z wudaća: póndźela, 16 januara 2017

Woheń z bydlenja sapał

Wojerecy. Wšo druhe hač měrne zymske dopołdnjo mějachu wčera wohnjowi wobornicy we Wojerecach. Tam bě něhdźe w 10.30 hodź. w jědnaćeposchodowym wysokodomje na Virchowowej woheń wudyrił. Płomjenja sapachu z bydlenja na sedmym poschodźe. 40lětny woby­dler w tym času doma njebě. Ze susodneho bydlenja dyrbjachu 82lětnu woby­dlerku ewakuować. Balkon palaceho so bydlenja docpěchu wobornicy z wjerćitym rěblom. Krótko do 11.30 hodź. běchu płomjenja zhašane. Nimo Wojerowskeje powołanskeje wobory běchu dobrowólni wobornicy z Kinajchta, Němcow a Michałkow zasadźeni. Přičina wohenja dotal znata njeje. Wohnjowoborny fachowc je wčera móžne slědy přepytował. Přećiwo 40lětnemu wobydlerjej zahajichu jednanje lochkomyslneho zapalerstwa dla. Swoje bydlenje wšak wón najprjedy raz wužiwać njemóže. Načinjenu wěcnu škodu trochuja na 10 000 eurow. Na zbožo so při wohenju a hašenju nichtó zranił njeje.

Za atraktiwne wjesne žra

Drježdźany. Sakske statne ministerstwo za wobswět a ratarstwo je dźensa druhu namołwu programa „witalne wjesne žra a srjedźišća“ zahajiło. Tak móža­ gmejny nětko zaso wo spěchowanske srědki prosyć. Zaměr je wjesne kónčiny zesylnić. Tak móža próstwarjo srědki za saněrowanje abo wottorhanje twarjenjow runje tak zasadźić kaž za wutworjenje atraktiwnych wjesnych žrow.

Wo reformje rěčeli

Podstupim. Braniborski ministerski prezident Dietmar Woidke (SPD) je dźensa w Podstupimje z kritikarjemi dwělomneje wokrjesneje reformy rěčał. Tež Choćebuski wyši měšćanosta Holger Kelch (CDU) reformu kategorisce wotpokazuje. W běhu zetkanja wšak njeje k žanomu rozrisanju dóšło.

Industrija z dobytkom

Kamjenc. Sakske industrijne přede­wzaća su loni po předležacej bilancy dobytk­ nadźěłali. Tole wozjewi dźensa krajny statistiski zarjad ze sydłom w Kamjencu. Tak je cyłkowny wobrot wot januara do oktobra wo 0,9 procentow na 47,7 miliardow eurow rozrostł. Produkcija jězdźidłow a jězdźidłowych dźělow pak registrowaše wulke straty.

Serbski sejm z přitomnymi ideje k spěchowanju rěče wuwił

Budyšin (SN/MiR). Prěni kubłanski wjeršk iniciatiwneje skupiny Serbski sejm sobotu w Budyskim Kamjentnym domje bě poradźeny. Přitomni dojednachu so na pjeć nadawkow, kotrež su w serbskim kubłanje wosebje wažne. To su šulerski transport, znowawutworjenje hornjoserbskeho rěčno-kulturneho kubłanišća, wysokeje šule w Budyšinje, wutworjenje profesurow sorabistiki w Lipsku, Drježdźanach a Podstupimje kaž tež stipendije za studijne přebytki w słowjanskim wukraju.

Dobyćerjow zhromadnje wupisaneho kruchoweho wubědźowanja „Lausitzen“ Budyskeho Němsko-Serbskeho ludoweho dźiwadła, Złokomorowskeho Noweho jewišća a Statneho dźiwadła Choćebuz su wčera we wobłuku zarjadowanja Łužiske literarne dopołdnjo w Budyskim Dźiwadle na hrodźe wuznamjenili.

Sakski burski zwjazk zhladuje na aktualne połoženje ratarjow a na wuhlady lěta 2017. Niske płaćizny za wudźěłki ratarjow masiwnje wobćežuja, štož so na likwiditu zawodow wuskutkuje.

Po tym zo bě loni Kaščanski młodźinski klub dartowy turněr zarjadował, su lětsa Wotrowscy młodostni na tajki přeprosyli, zo móhli zwěsćić, štó z kłokami najlěpje tarč trjechi. Dohromady 32 wobdźělnikow lětuši turněr přiwabi. Prěnje městno wubědźi sej Oliver Schmidt (srjedźa), kiž so w finalu ze 4:3 přećiwo Jakubej Wjacławkej (nalěwo) přesadźi. Tomaš Wićaz wobsadźi třeće městno. Něhdźe dwaceći ludźi je bój­ z kłokami wobkedźbowało. Foto: Marcel Rjeda

Flensburg (SN). Młodźina europskich narodnych mjeńšin (MENS) pyta kreatiwnych producentow, kotřiž chcedźa so na widejoprojekće wobdźělić. Projekt pod hesłom „Camera obscura numerus minor“ přewjedźe MENS we wobłuku kampanje DiversityConnects w kooperaciji z partnerami. Wulkomyslnu pjenježnu podpěru za swoju ideju dóstanu młodostni wot Renaty­ Schnack, kotraž skutkuje w nadawku Schleswigsko-Holsteinskeje jako zamołwita za mjeńšiny. Loni přija wona myto danskeho kulturneho towarstwa Grænseforeningen za zasłužby na polu kultury a w zhromadnym žiwjenju w dansko-němskim pomjeznym kraju. Myto je 15 000 krónow (něhdźe 2 000 eurow) hódne. Wona přewostaji mytowanski pjenjez za projekt młodźiny. Partneraj za projekt stej Federalistiska unija europskich narodnych mjeńšin a Flensburgski Dom mjeńšin. Najlěpše tři widejofilmy budu z třista, dwěsćě resp. sto eurami mytowane. MENS chce dobyćerjow na přepodaće myta do Domu mjeńšin w Flensburgu přeprosyć, hdźež móža cyły kónc tydźenja přebywać. Na­drobniše informacije pod

Biškek (dpa/K/SN). Turkowske transportne lětadło je dźensa w centralnoaziskej Kirgiziskej tragisce znjezbožiło, zo zrazy dosrjedź sydlišća njedaloko stolicy Biškek, jako chcyše na lětanišću Manas přizemić. Kirgiziske strowotniske ministerstwo zdźěla, zo je 32 smjertnych woporow, mjez nimi mnohe dźěći. Z kotreje přičiny je mašina Boeing 747-400 lětanskeje towaršnosće ACT znjezbožiła, wo tym dotal hišće ze žaneje strony informacijow njeje.

Parlament reformu schwalił

Ankara (dpa/SN). Najebać protesty opozicije je turkowski prezident Recep Tayyip Erdoğan po puću k reformje wustawy na dobro­ prezidialneho systema w Turkowskej wažny zadźěwk přewinył. W parlamenće su zapósłancy sobotu wječor tež poslednimaj zbywacymaj artiklomaj z wjetšinu přihłosowali, statna powěsćernja Anadolu rozprawja. Prezidialny system by Erdoğanej wjace mocy spožčił a parlament wosłabił. Tak by potom statny­ a zdobom knježerstwowy šef był.

Za zmylkami pytali

Kołpje a kački na Wołtawje a na kromje rěki w čěskej stolicy Praze nimaja ze zymskim wjedrom wočiwidnje žane problemy. Tež Čěska je wot tuchwilneje zymy potrjechena­. Přichodne dny dyrbja tam kaž pola nas z kru­tymi zmjerzkami ličić. Foto: dpa/František Gela

Berlin (dpa/K/SN). Zwjazkowy hospodarski minister Sigmar Gabriel (SPD) pomina, njenastróžić so kritiki designowaneho prezidenta USA Donalda Trumpa na němskich awtotwarcach. „Móžu jenož radźić měrni wostać a wočaknyć, što so stanje“, rjekny šef SPD. Trump bě w interviewje z nowinu Bild a Londonskej Times na němske awtomobilownje hladajo prajił: „Wězo smědźa wone za USA awta twarić, ale za kóžde awto do USA zapłaća 15 procentow dawka.“ Nastupajo móžne chłostanske cło Gabriel zwurazni: „Ameriska awtoindustrija budźe tak špatniša; słabša a dróša.“ Nimo toho budu so USA njemało dźiwać, jeli Trump tež na dodawanske dźěle chłostanske cło napołoži.