Z wudaća: wutora, 25 apryla 2017

Berlin (dpa/K/SN). Na mjezynarodnym wjeršku W 20, kotryž chce žonam lěpše hospodarske połoženje skićić, je tež Ivanka Trump, dźowka prezidenta USA Donalda Trumpa wobdźělena. Wot kanclerki Angele Merkel (CDU) přeprošena njepłaćena poradźowarka hłowy stata za to wustupuje, po cyłym swěće zběrać podpěru za inwesticije do programow, zmóžnjace žonam nawjedowanje tež w ekonomiji.

Protesty sej mortweju žadali

Caracas (dpa/K/SN). Při protestach w boju wo móc we Venezueli staj znowa dwaj čłowjekaj zahinyłoj. W zapadovenezuelskim měsće Mérida bu jedyn ze so­budźěłaćerjow městneho zarjadnistwa z kulku do šije morjeny. Štyri wosoby poćerpjechu zranjenja. W Barinasu su „aktiwisća“ na motorskich muža zatřělili. Knježerstwo opoziciji wumjetuje, zo je wina na tragediji. Morjeni su ludźo, kotřiž demonstrowachu za socialistiskeho prezidenta Venezuele.

Dalši Afghanojo domoj pósłani

Skulpturu „Pomnik za stajny nowozapočatk“ w susodstwje Drježdźanskeje cyrkwje Našeje knjenje su dźensa oficialnje po­swjećili. 7,46 metrow wysoka konstrukcija z wocla, aluminija a bronzy, kotruž běštaj wuměłcaj Heike Mutter a Ulrich Gent stworiłoj,­ ma hač do lěta 2019 na Nowych wikach sakskeje stolicy stejo wostać. Foto: dpa/Arno Burgi

Z wostudy na chorołožu je štyrilětna holca nakupować šła. Jako chcyše w drogeriji w frankskim Bad Kissingenje sama při kasy­ stejo nakup w hódnoće 50 eurow z kapsnymi pjenjezami – runje tři eura w lutych centach – zapłaćić, ju předawarka narěča. Sprawnje holčka wuzna, zo njesmě chorosće dla do pěstowarnje a zo so jej wostudźi. Přećel maćerje bě na nju kedźbował. Holčka pak so we wokomiku njekedźbnosće zminy. Policija přepoda holcu mužej, kiž bě so hižo přizjewił.

Při wobdźěłanju panochtow je kruwa Kuki w badensko-württembergskim Böb­lingenje ćeknyła a železniski wobchad zlemiła, po tym zo bě na kolije běžała. Skoćo njeda so ani wot wobsedźerja ani wot přećelow a policije popadnyć. Skótnej lěkarce so poradźi kruwu pohłušić. Dowjezechu ju wróćo k ratarjej. Při honjeńcy wšak bě Kuki štyri awta wobškodźiła a 5 000 eurow škody zawostajiła.

Budyšin (SN/MkWj). Zapósłanc CDU w Sakskim krajnym sejmje Marko Šiman sej žada, zo ma so zarjadować nowa serbska rěčna šula. Tak móhli hrožacemu njedostatkej­ serbskich wučerjow zadźěwać. Tole potwjerdźi serbski zapósłanc na dźensnišej nowinarskej rozmołwje w Budyšinje. Wón je po swojich wuprajenjach minjene wosom lět wuwiće na tym polu wobkedźbował a je sej wěsty, zo je „pjeć mjeńšin do dwanaćich“. Přichodne pjeć lět poda so něhdźe połojca wšěch serbskich wučerjow na wuměnk. Šiman je přeswědčeny, zo njeje problem ze swójskimi mocami hižo rozrisajomny. Za­mołwići dyrbjeli tuž tempo masiwnje powjetšić a njeměli hižo dlěje čakać, „hewak budźe hišće hórje“.

Jerusalem (dpa/K/SN). Wopyt němskeho wonkowneho ministra Sigmara Gabriela (SPD) w Israelu je ze šmjatkami zwjazany. Dźensa popołdnju chcyše so Gabriel z ministerskim prezidentom Benjaminom Netanjahuwom zetkać a tohorunja z ludźimi, wojowacymi wo čłowjeske prawa. Dokelž pak to Netanjahuwej njeje hódź, staji wón hosćej hrubje alternatiwu: pak z nim pak z tamnymi. Wonkowny minister k tomu rano w telewiziji ZDF praji: „Je tola něšto dospołnje normalne, zo rěčimy na wopytach we wukraju tež ze zastupnikami ciwilneje towaršnosće.“ Tak njeby dźě nichtó na to ani pomyslił Netanjahuwej wotprajić zetkanje, by-li so wón w Němskej z kritikarjemi knježerstwa trjechił. Gabriel měješe wotpohlad, ze zastupnikami organizacije Breaking the Silence porěčeć, kotraž kritizuje sy­dlensku politiku knježerstwa. Dopołdnja wopyta wón w Jerusalemje wopomnišćo Yad Vashem a wuzna so k zamołwitosći Němskeje za holocaust.

Wuměłstwowy bus poda so lětsa na zapad Hornjeje Łužicy

Budyšin (SN/CoR). Je to lětsa štwórty króć, zo přeproša wuměłstwowy bus zajimcow na wotkrywansku jězbu do kulturnych zarjadnišćow Hornjeje Łužicy. Tura 24. a 25. junija wusměri so tónraz na zapad Budyskeho wokrjesa.

Štož sym wčera wječor na hłownej zhromadźiznje Towarstwa Cyrila a Metoda dožiwił, bě mi kubłanska hodźina na polu bazoweje demokratije. Čłonojo towarstwa su namjet za pomnik zbóžneho Alojsa Andrickeho najprjedy raz na wědomje wzali. Jan Brězan bě jón z wulkej prócu a wosobinskim zasadźenjom zdźěłał. A tola bjerjechu sej prawo, wo tym diskutować a swójske namjety přinošować. Wšako je nastajenje pomnika tež wažny cyrkwinskopolitiski podawk w Serbach, sahacy daloko do přichoda. Skónčnje so dojednachu, zamołwitosć za to na wjacore ramjenja rozdźělić a „proces kreatiwneho rozmyslowanja zahajić“, kaž to Sonja Hrjehorjowa formulowaše. Sym sej wěsty, zo so tež ludźo zwonka towarstwa za projekt zajimuja. To płaći za formu postawy runje tak kaž za městnosć, na kotrejž měł pomnik stać. Směmy na zajimawe diskusije wćipni być. Marko Wjeńka

Praha (ČŽ/K). Produkcija awtow w Čěskej je minjeny kwartal nowy rekord docpěła. Tak bu 3 807 342 wozydłow zhotowjenych, štož je přirost wo 10,7 procentow porno samsnemu časej lońšeho lěta. Na eksport je 359 765 eksemplarow šło, tuž dźesaćina wjace hač prěnje tři měsacy 2016. Na domjacych wikach zwyši so wotbytk wo 13,7 proc. Tele ličby publikuje Zjednoćenstwo awtomobiloweho přemysła (AutoSAP). Mladoboleslavska Škodowka sama je produkciju wo 19 proc. zwyšiła a 32 327 awtow zhotowiła. Hyundai naprodukowa 98 100 awtow, štož je wosom procentow přibytka. Zawod Peugeot-Citroën wopušći 56 915 wozow, to je dźesaćina mjenje hač w 1. kwartalu 2016. „Nam je so zaso wobkrućiło, štož bě hižo loni płaćiło, mjenujcy zo naše awtomobilownje industrijnu produkciju ćahnu“, rjekny prezident AutoSAP Bohdan Wojnar. Jich wuslědki wuskutkuja so přewšo pozitiwnje na dźěłowe wiki. Produkcija awtow je tuchwilu tak dynamiska, dokelž su wozydła dale po cyłej Europje wulce prašane. Zwjeselace tohorunja je, zo je tež produkcija nakładnych awtow Tatra rozrostła, praji Wojnar.

Wulka syła ludźi přichwata minjeny pjatk w Drježdźanach-Čertnicy (Zschertnitz) do domu Priscille Ann Siebert, zo bychu jej k stoćinam zbožo wupřeli. Drježdźanske nowiny pisachu, zo je wuměłča tež jako molerka serbskich křižerjow znata. A tak so słušeše, zo běchu na tak wosebitym dnju – „molerki křižerjow“ w jutrownym tydźenju – mjez gratulantami tež Serbja.