Z wudaća: wutora, 25 apryla 2017

Arnsdorfske KT

– ST Marijina hwězda 0:0

Zestawa hosći: O. Schmidt – Wróbl, Njek, Škoda, R. Hawš, Peschmann (89. Čornak), O. Hawš, T. Jurš, P. Schmidt, Winkler, Pakoßnick (79. D. Jurš)

K dalšej směrodajnej partiji poda so prěnje koparske mustwo Sportoweho towarstwa Marijina hwězda do Arnsdorfa. Bohužel pak dosahaše sobotu na kóncu jenož k bjezwrotowemu remisej, byrnjež hosćo přez dołhi čas hru postajeli. Z wěsteje defensiwy postarachu so woni wo někotre rjane nadběhi. W 4. min. namaka Oskar Hawš w wrotarju domjacych swojeho mištra, w 22. min. bu Paul Schmidt w poslednim wokomiku blokowany. Wobě móžnosći bě Alex Winkler přihotował. Pančičenjo ćišć dale zesylnichu, tak zo měješe hosćićel w škiće chětro wjele dźěła. W 26. min. prasny třělwa Tomaša Jurša na nutřkownu žerdź. Dźesać mjeńšin do połčasa njebě fortuna znowa na jich stronje, a Jakob Pakoßnick sadźi wólny kop do aluminija.

FC Hornja Łužica Neugersdorf

– FSV Budissa Bautzen 2:0 (1:0)

Zestawa hosći: Wohlfeld – Kolan, Iliadis (86. Šisler), Hausdorf, Heppner, Milde, Pfanne (31. Kloß), Hoßmang, Salewski, Němec (65. Müller), Rosendo

Z derbyja w Neugersdorfje bychu sej koparjo Budissy Budyšin rady dypk sobu wzali. Prěnje móžnosće woni tež mějachu. Daloka třělwa Franza Pfanny pak dźěše snadnje nimo wrotow. Někotre mjeńšiny pozdźišo poda so samsny hrajer sam na wrotarja domjacych, zo by jeho přewinył, njebě pak wuspěšny. Hosćićeljo sčinichu to lěpje a docpěchu přez Bocara Djuma nawjedowanje (22.). Dalši dyr do tyła dósta Budissa w 31. min. Pfanne bu foulowany, so při tym zrani a dyrbješe so wuměnić dać. Krótko do połčasa móhli hosćo hišće wurunać. Třělwu Paula Mildy pak Neugersdorfski wrotar wotpopadny.

W zwjazkowej koparskej lize muži hraje mustwo RB Lipsk super sezonu; mało ludźi pak wě, zo tam w Lipsku tež rodźena Budyšanka Aline Wegerdt za bulom honi. Ze 17lětnej łužiskej zastupjerku žonjaceho mustwa RB Lipsk je so za Serbske Nowiny Hanspeter Benad rozmołwjał.

Hdźe sće kopańcu hrać započała?

A. Wegerdt: To bě w mojim ródnym měsće pola Budissy (po tym hraješe wona pola FFV Lipsk, přisp. red.)

Što běchu dotalne wjerški Wašeje karjery?

A. Wegerdt: Z koparskej wubranku Sakskeje smy w starobnej skupinje turněr Sewjerowuchodneho koparskeho zwjazka Němskeje dobyli.

Kotre cile hišće maće?

A. Wegerdt: Chcu z RB Lipskom rady do regionalneje ligi postupić a snano raz w němskej zwjazkowej lize hrać.

Što činiće, hdyž za bulom njehoniće?

A. Wegerdt: To zetkawam so z přećelkami a přećelemi abo ze swójbnymi. Šulske wěcy su tež wažne. A nakupować wězo tohorunja rady chodźu.

Kak so Wam w Lipsku pola RB lubi?

A. Wegerdt: Tu hraja jara dobru kopańcu a hrajerki móža so optimalnje dale wuwiwać. Jónkrótne su přećelstwa, kotrež tu nastawaja. Zamołwići a trenarjo su cyle jednorje perfektni.

Berlin (B/SN). Po słowach politikarja CDU dr. Heinera Geißlera měli so cyr­kwje mócnarjam zemje spjećować. To rjekny něhdyši zwjazkowy minister w přiłoze nowiny Zeit „Christ & Welt“. Město toho „chwala cyrkwje Boha z pozawnami z wěžow swojich dale a prózdnišich Božich domow.“ W swěće kapitalizma, gigantiskeje financneje industrije ze swojimi towaršnostnymi „idealemi“ egoizmom, nahrabnosću, skuposću, konsumom a karjeru je „Jězus dospołne­ sćělesnjenje čłowjeskosće a miłosće“.

Schulz zasudźa namołwu AfD

Najrjeńše jejka wuzwolili

Budyšin. Mjez 35 kolekcijemi jednotliwcow w starobje štyrjoch do 25 lět a 92 kolekcijemi 2. do 4. lětnika Kulowskeje Krabatoweje šule je jury Spěchowanskeho kruha za serbsku ludowu kulturu wčera najrjeńše serbske jutrowne jejka dorosta wuzwoliła. Spěchowanske myto dóstanje 16lětna Sophie Hejduškec z Noweho Łusča. Dobyćerske kolekcije wustaja nětko w Budyskej SKI.

Mytuja twarske projekty

Drježdźany. Sakska pyta za najrjeńšim domom we wjesnych kónčinach. Hač do 15. meje móža priwatnicy, předewzaćeljo a komunalni twarcy kaž tež architekća a inženjerojo swoje projekty za krajne wubědźowanje „Twarić we wjesnych kónčinach“ zapodać. Wuznamjenić chcedźa přikładnje ponowjene twarjenja runje tak kaž dospołnje nowe.

Wjace potrěbnych doma hladaja

Kamjenc. Lěta 2015 su w Sakskej 117 677 hladanja potrěbnych doma zastarowali. To bě 14 725 wjace hač 2014. Wo wjace hač połojcu potrěbnych starachu so swójbni abo přećeljo, za čož dóstachu hladanski pjenjez. Něhdźe 50 000 ludźi trjebaše ambulantnu słužbu, zdźěla statistiski krajny zarjad w Kamjencu.

51. olympiada serbskeje rěči wabi šulerjow do zaběry z powołanjemi

Wodowe Hendrichecy (SN/MiR). 70 šulerjow-serbšćinarjow wobdźěla so tele dny na 51. olympiadźe serbskeje rěče. Patronat přewzała je sakska ministerka za kultus Brunhild Kurth (CDU). Dźěći wuknu na dźewjeć zakładnych a wyšich šulach kaž tež na štyrjoch gymnazijach Hornjeje a Delnjeje Łužicy. Mjez wobdźělnikami je 25 z Delnjeje Łužicy, šěsć hólcow a 19 holcow. „Tajku wulku ličbu wobdźělnikow z Delnjeje Łužicy dotal njemějachmy“, praji předsydka Serb­skeho šulskeho towarstwa Ludmila Budarjowa, nošerja zarjadowanja, „wjeselimy so jara, zo zajim wottam přiběra.“ Wjelelětna­ wučerka za delnjoserbšćinu a čłon­ka předsydstwa SŠT Margit Hašcyna rozłoži: „Za přičinu tak sylneje skupiny mam zajim jako sćěh spomóžneje Witaj-wučby na kubłanišćach Delnjeje Łužicy. Dale přisporja jón zawěsće tež tuchwilny bój wo dalewjedźenje wučby delnjoserbšćiny. Tež něhdyši wobdźělnicy rozprawjeja přichodnym wo dožiwjenjowpołnych dnjach a wabja tak za olympiadu.“

Pančicy-Kukow (SN/JaW). Klóšter Mari­jina hwězda ma wot wčerawšeho nachwilne nawodnistwo. Kaž klóšter w nowinskej informaciji wozjewja, je tuchwilna 43. abatisa Philippa Kraft po pjećlětnym skutkowanju jako nawodnica za- ­stojnstwo złožiła. Zdobom wona Pančičansko-Kukowski klóšter kaž tež rjad cisterciensow­ cyle wopušći. Abatisa Philippa bě wčera rjadniske sotry konwenta kaž tež wšitkich sobudźěłaćerjow klóštra wo tym informowała, mjenujo za swój rozsud wosobinske přičiny.

Generalny abt Mauro-Giuseppe Lepori, kiž bě minjenu njedźelu w klóštrje přebywał, je wotstup abatisy Philippy Kraft přiwzał a powoła dotalnu pri­orku klóštra, sotru Gabrielu Hesse, na jedne lěto za administratorku. Wona ma wšitke prawa a winowatosće abatisy. „Budźe-li načasu, budu nowowólby“, rěka w zdźělence klóštra. „Wotstup abatisy Philippy jara wobžarujemy. Za jeje skutkowanje a jeje zasadźenje na dobro klóštra Marijineje hwězdy, jako rjadniska sotra kaž tež w pjeć lětach jako abatisa, so jej dźakujemy a přejemy jej za přichod Bože žohnowanje.“

Towarstwo Cyrila a Metoda chce přichodny čas dźěłowu skupinu wutworić, kotraž ma postajenje pomnika za zbóžneho kapłana Alojsa Andrickeho přihotować. Na to su so čłonojo TCM na swojej wčerawšej hłownej zhromadźiznje w Kulowje dojednali.

Zły Komorow (SN). Z Łužiskim transferowym mytom je Łužiska hospodarska iniciatiwa (WiL) najlěpše z wosom zapodatych projektow wčera w Złym Komorowje wuznamjeniła. 1. myto spožči jury firmje Attomol molekularne diagnostiki Bronkow a BTU za tam wuwite testowe graty za medicinsku diagnostiku, z kotrymiž maja so mutacije, rozbudźaki chorosćow a awtoimunowe schorjenja dopokazać. W kooperaciji z BTU chcedźa po płaćiznje přihódne diagnostiki z wjetšim medicinskim wužitkom poskićeć.

Za Projekt „Optimowane wodźenje zasadźenja a samokontrola jězbneho wašnja decentralnych energijowych připrawow“ počesćichu Žitawske předewzaće Use my energy a tamnišu wysoku šulu z 2. mytom. Z nowym saněrowanskim jednanjom, złožowacym so na włokniny, maja so wobškodźene betonowe šachty we wopłóčkowych systemach njewotwisnje wot počasa saněrować. Za to dóstaštej towaršnosć Łužiska rjedźenska technika Łukow a fachowy wobłuk BTU za lochkotwar 3. myto.